ប្រធានាធិបតីកូរ៉េខាងត្បូង៖ លោក គីម ជុងអ៊ុន នឹងមកកាន់សេអ៊ូលឆាប់ៗ

អន្តរជាតិ

ប្រធានាធិបតីកូរ៉េខាងត្បូង៖ លោក គីម ជុងអ៊ុន នឹងមកកាន់សេអ៊ូលឆាប់ៗ

01, Nov 2018 , 8:39 pm

រូបភាព

រូបភាព AFP

ដោយ: តន ចាន់រិទ្ធារ៉ា

ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី១ ខែវិច្ឆិកា បានប្រកាសថា មេដឹកនាំកំពូលកូរ៉េខាងជើង គីម ជុងអ៊ុន នឹងធ្វើទស្សនកិច្ចនៅរដ្ឋធានីសេអ៊ូលក្នុងពេលឆាប់ៗនេះ។ លោក មូន មិនបានផ្ដល់ព័ត៌មានលម្អិតអ្វីឡើយជុំវិញដំណើរទស្សនកិច្ចរបស់លោក គីម តែលោកបានបង្ហើបថា លោក គីម ក៏ត្រូវជួបមេដឹកនាំរុស្ស៊ី ចិន ឬជប៉ុនថែមទៀត។ មេដឹកនាំកូរ៉េខាងជើងបានសន្យាធ្វើដំណើរទៅកាន់សេអ៊ូលអំឡុងជំនួបមេដឹកនាំអន្តរកូរ៉េនៅព្យុងយ៉ាងក្នុងខែកញ្ញា។

ខណៈការចរចារវាងអាមេរិក និងកូរ៉េខាងជើងដើម្បីឈានទៅរំសាយនុយក្លេអ៊ែរនៅជាប់គាំងនោះ ទំនាក់ទំនងរវាងកូរ៉េទាំងពីរកំពុងតែស្រស់ញញឹមខ្លាំង។ ប្រធានាធិបតីកូរ៉េខាងត្បូង មូន ចេអ៊ីន និងប្រធានគណៈកម្មការកិច្ចការរដ្ឋរបស់កូរ៉េខាងជើង គីម ជុងអ៊ុន បានជួបគ្នាបីលើករួចហើយក្នុងឆ្នាំនេះ ដែលជារឿងមិនធ្លាប់មានក្នុងប្រវត្តិសាស្ត្រ។ ជំនួបរវាងមេដឹកនាំអន្តរកូរ៉េ បានធ្វើឲ្យស្ថានភាពនៅឧបទ្វីបកូរ៉េដែលធ្លាប់តានតឹងខ្លាំង ប្រែជាធូរស្រាលទៅវិញ។

ជំនួបលើកទីបួនរវាងលោក មូន និងលោក គីម ក៏នឹងកើតនៅពេលខ្លីៗខាងមុខនេះ។ លោក មូន បានប្រាប់សមាជិកសភាកូរ៉េខាងត្បូងនៅថ្ងៃទី១ ខែវិច្ឆិកា ថា ទស្សនកិច្ចរបស់លោក គីម ទៅរុស្ស៊ី និងទស្សនកិច្ចរបស់ប្រធានាធិបតីចិន ស៊ី ជិនភីង នៅកូរ៉េខាងជើង នឹងកើតឡើងឆាប់ៗ ខណៈលទ្ធភាពនៅតែមានសម្រាប់ជំនួបរវាងលោក គីម និងនាយករដ្ឋមន្ត្រីជប៉ុន ស៊ីនហ្សូ អាបេ ។ បើតាមទីភ្នាក់ងារព័ត៌មាន AFP លោកបន្ថែមថា ទស្សនកិច្ចរបស់លោក គីម នៅសេអ៊ូល ក៏នឹងកើតមានឆាប់ៗនេះដែរ។

ជាប្រធានាធិបតីមាននិន្នាការសេរីនិយម លោក មូន ប្រកាន់ជំហរទន់ភ្លន់ដាក់កូរ៉េខាងជើងដើម្បីសម្រេចឲ្យបានគោលដៅរំសាយនុយក្លេអ៊ែរពីឧបទ្វីបកូរ៉េ។ លោកដើរតួយ៉ាងសំខាន់ក្នុងការរៀបចំជំនួបប្រវត្តិសាស្ត្ររវាងលោក គីម និងប្រធានាធិបតីអាមេរិក ដូណាល់ ត្រាំ នៅឯសិង្ហបុរី។ នៅទីនោះ លោក គីម ក៏ប្រកាសការប្ដេជ្ញាចិត្តក្នុងការបោះបង់នុយក្លេអ៊ែរទាំងស្រុង។ ប៉ុន្តែក្រោយមក ដំណើរការរំសាយនុយក្លេអ៊ែរក៏ជួបបញ្ហារដាក់រដុបរហូតមក។

ការចរចាជាប់គាំង ព្រោះក្រុងវ៉ាស៊ីនតោន និងក្រុងព្យុងយ៉ាមិនយល់ស្របគ្នាលើលក្ខខណ្ឌដើម្បីរំសាយនុយក្លេអ៊ែរ។ ក្រុងព្យុងយ៉ាងដែលបានបិទទីតាំងសាកល្បងនុយក្លេអ៊ែរ និងត្រៀមបិទមជ្ឈមណ្ឌលបាញ់មីស៊ីលមួយទៀតនោះ ចង់បានការតបស្នងខ្លះពីអាមេរិកមុន ប៉ុន្តែក្រុងវ៉ាស៊ីនតោនចង់ឲ្យព្យុងយ៉ាងធ្វើសកម្មភាពឲ្យជាក់លាក់ជាងនេះសំដៅលុបបំបាត់នុយក្លេអ៊ែរទាំងស្រុង មុននឹងខ្លួនអាចផ្ដល់ការលើកទឹកចិត្តបានដូចជាការព្យួរទណ្ឌកម្ម ឬឈានដល់ការប្រកាសបញ្ចប់សង្គ្រាមកូរ៉េតែម្ដង។

អ្វីគួរឲ្យចាប់អារម្មណ៍នោះ ប្រធានាធិបតីកូរ៉េខាងត្បូងក៏បង្ហើបដែរថា ជំនួបលើកទី២ រវាងលោក គីម និងលោក ត្រាំ ស្ថិតនៅនឹងមុខតែម្ដង ខណៈប្រមុខការទូតអាមេរិក ម៉ៃ ប៉ុមប៉េអូ ធ្លាប់លើកឡើងថា ជំនួបនេះអាចកើតឡើងនៅដើមឆ្នាំក្រោយ។ លោក មូន ចាត់ទុកកិច្ចសន្ទនាក្នុងចំណោមកូរ៉េខាងត្បូង កូរ៉េខាងជើង និងអាមេរិក នឹងជួយសម្រេចឲ្យបានការរំសាយនុយក្លេអ៊ែរទាំងស្រុង និងសន្តិភាពយូរអង្វែងនៅឧបទ្វីបកូរ៉េ៕