ជាតិ
នយោបាយជាតិ
អនុប្រធានសភាចិន៖ មិត្តភាពរវាងកម្ពុជា-ចិន គឺរឹងមាំយូរអង្វែង ជំនួបរវាងលោក ចាង ឈុនហ៊្សាន អនុប្រធានសភាចិន និង សម្តេច ហេង សំរិន ប្រធានរដ្ឋសភាកម្ពុជា នៅវិមានរដ្ឋសភាកម្ពុជា នាថ្ងៃទី២ ខែវិច្ឆិកា ឆ្នាំ២០១៨។ រូបពីរដ្ឋសភា
× ភ្នំពេញ៖ ទំនាក់ទំនងរវាងកម្ពុជានិងចិន ប្រៀបដូចជាដែកថែប ដែលមានលក្ខណរឹងមាំនិងយូរអង្វែង។ នេះជាការលើកឡើងរបស់លោក ចាង ឈុនហ្ស៊ាន (Zhang Chunxian) អនុប្រធានសភាតំណាងប្រជាជនចិន ក្នុងជំនួបជាមួយសម្តេច ហេង សំរិន ប្រធានរដ្ឋសភាកម្ពុជា នៅព្រឹកថ្ងៃទី២ ខែវិច្ឆិកា ឆ្នាំ២០១៨។
បើតាមសេចក្តីប្រកាសព័ត៌មានរបស់រដ្ឋសភាកម្ពុជា លោក ចាង ឈុនហ្ស៊ាន បានអះអាងនៅចំពោះមុខសម្តេច ហេង សំរិន ថា ប្រទេសចិន បានកសាងតំបន់ពាណិជ្ជកម្មសេរីចិន-អាស៊ាន និងបង្កើតគោលនយោបាយផ្លូវមួយខ្សែក្រវ៉ាត់មួយ ដោយទទួលបានការគាំទ្រពីប្រទេសកម្ពុជា ពិសេសសម្តេចនាយករដ្ឋមន្ត្រី ហ៊ុន សែន ខណៈមានប្រទេសខ្លះជំទាស់។ អនុប្រធានសភាតំណាងប្រជាជនចិនរូបនេះ បន្តថា គោលនយោបាយ ដែលប្រទេសចិន បានបង្កើតឡើង មិនបានគិតតែផលប្រយោជន៍ផ្ទាល់ខ្លួននោះទេ តែក៏គិតដល់ផលប្រយោជន៍អាស៊ាននិងពិភពលោកផងដែរ។
នាយករដ្ឋព័ត៌មាននៃរដ្ឋសភាកម្ពុជា បានស្រង់សម្តីរបស់លោក ចាង ឈុនហ្ស៊ាន ទៅសរសេរក្នុងសេចក្តីប្រកាសព័ត៌មាន យ៉ាងដូច្នេះថា៖«កម្ពុជាជាប្រទេសមួយក្នុងចំណោមប្រទេសជាច្រើន ដែលទទួលបានផលប្រយោជន៍ពីតំបន់ពាណិជ្ជកម្មសេរីចិន-អាស៊ាន និងគោលនយោបាយផ្លូវមួយខ្សែក្រវ៉ាត់មួយ របស់ប្រទេសចិន»។
សម្តេច ហេង សំរិន បានសម្តែងនូវមោទនភាពចំពោះកិច្ចប្រឹងប្រែងរួមគ្នារវាងកម្ពុជានិងចិន ដែលបានធ្វើឲ្យទំនាក់ទំនងមិត្តភាពនៃប្រទេសទាំងពីរ មានភាពល្អប្រសើរជាងពេលណាៗទាំងអស់។ ប្រធានរដ្ឋសភាកកម្ពុជា យល់ឃើញថា ឆន្ទៈរបស់ថ្នាក់ដឹកនាំប្រទេសទាំងពីរ គឺបន្តពង្រឹងទំនាក់ទំនង និងកិច្ចសហប្រតិបត្តិការ ឲ្យកាន់តែរឹងមាំថែមទៀត ទោះស្ថិតក្នុងកាលៈទេសៈណាក៏ដោយ ជាពិសេស កិច្ចសហប្រតិបត្តិការក្នុងភាពជាដៃគូរយុទ្ធសាស្ត្រគ្រប់ជ្រុងជ្រោយ ដែលបាននិងកំពុងទទួលលទ្ធផលជាផ្លែផ្កាលើច្រើនវិស័យ។
ប្រធានរដ្ឋសភាកម្ពុជា បានវាយតំលៃខ្ពស់ និងគាំទ្រចំពោះគំនិតផ្តួចផ្តើមរបស់ប្រទេសចិន ស្តីពី គោលនយោបាយផ្លូវមួយខ្សែក្រវ៉ាត់មួយ ដែលជាកិច្ចសហប្រតិបត្តិការសេដ្ឋកិច្ចសកល។ ប្រធានរដ្ឋសភាកម្ពុជា មានប្រសាសន៍យ៉ាងដូច្នេះថា៖«គោលនយោបាយនេះ បានដើរតួនាទីសំខាន់ ក្នុងការផ្តល់ផលប្រយោជន៍ទៅវិញទៅមករវាងប្រទេសទាំងពីរ ដោយសង្ឃឹមថា គម្រោងនេះ នឹងជួយទាក់ទាញវិនិយោគិន និងការអភិវឌ្ឍវិស័យឧស្សាហកម្មទេសចរណ៍មកប្រទេសកម្ពុជាបន្ថែមទៀត»។
ចាង ឈុនហ្ស៊ាន និងគណៈប្រតិភូចិន មកបំពេញទស្សនកិច្ចជាផ្លូវការនៅកម្ពុជា រយៈពេល៤ថ្ងៃ គឺចាប់ពីថ្ងៃទី១ ដល់ថ្ងៃទី៤ ខែវិច្ឆិកា ឆ្នាំ២០១៨។ ក្រៅពីប្រធានរដ្ឋសភាកម្ពុជា គណៈប្រតិភូចិន នឹងមានជំនួបជាមួយថ្នាក់ដឹកនាំកម្ពុជាផ្សេងទត រួមមាន សម្តេច សាយ ឈុំ ប្រធានព្រឹទ្ធសភា និង សម្តេចនាយករដ្ឋមន្ត្រី ហ៊ុន សែន នាយករដ្ឋមន្ត្រី៕
© រក្សាសិទ្ធិដោយ thmeythmey.com