ភ្នំពេញ៖ កម្ពុជា នឹងបន្តកំណើនសេដ្ឋកិច្ច ក្នុងអត្រា ៧,១ភាគរយ នៅឆ្នាំ២០១៩ខាងមុខ។ វិស័យដែលទ្រទ្រង់កំណើនសេដ្ឋកិច្ចកម្ពុជានេះ រួមមានវិស័យឧស្សាហកម្ម សេវាកម្ម និងកសិកម្ម។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បាននិយាយថា មូលហេតុដែលវិស័យសេដ្ឋកិច្ចកម្ពុជា នៅរក្សាកំណើនរង្វង់៧ភាគរយនេះ ដោយសារមានវិស័យ៣សំខាន់ ក្នុងការជួយទ្រទ្រង់ ក្នុងនោះកំណើនវិស័យឧស្សាហកម្ម នៅបន្តរក្សាភាពរឹងមាំ ក្នុងអត្រាកំណើនប្រចាំឆ្នាំ ១០ភាគរយ ដែលមានជាអាទិ៍ ដូចជា វិស័យសំណង់ វិស័យកាត់ដេរ វិស័យកម្មន្តសាលមិនមែនកាត់ដេរ ទាំងសម្រាប់ការនាំចេញនិងបម្រើក្នុងស្រុកជាដើម។
ចំណែកវិស័យសេវាកម្ម នៅបន្តកំណើនក្នុងអត្រា៧ភាគរយ ខណៈវិស័យកសិកម្ម ដែលអាចសម្រេចបានកំណើនក្នុងរង្វង់១,៨ភាគរយ។ នេះជាការបញ្ជាក់របស់លោក អូន ព័ន្ធមុនីរ័ត្ន។
ថ្លែងក្នុងជំនួបជាមួយលោក Phillippe BAUDRY ទីប្រឹក្សាសេដ្ឋកិច្ច នៃស្ថានទូតបារាំង រដ្ឋមន្ត្រីក្រសួងសេដ្ឋកិច្ចកម្ពុជា បាននិយាយដូច្នេះថា៖«តាមការព្យាករណ៍ក្នុងក្របខ័ណ្ឌម៉ាក្រូសេដ្ឋកិច្ចសម្រាប់ឆ្នាំ២០១៩ ខាងមុខនេះ កំណើនសេដ្ឋកិច្ចកម្ពុជា នឹងបន្តសម្រេចបានក្នុងអត្រា៧,១ ភាគរយ ដែលប្រហាក់ប្រហែលនឹងកំណើនឆ្នាំ២០១៨នេះ»។
ផ្នែកតាមការព្យាករណ៍ អត្រាអតិផរណាជាមធ្យមប្រចាំឆ្នាំ ត្រូវបានប៉ាន់ស្មានថា ស្ថិតនៅក្នុងកម្រិតអាចគ្រប់គ្រងបាន ក្នុងអត្រា ៣,១ភាគរយ សម្រាប់ឆ្នាំ២០១៩។ ហើយបើផ្អែកតាមសូចនាករម៉ាក្រូសេដ្ឋកិច្ច កម្ពុជានៅតែអាចបន្តសម្រេចបានកំណើនសេដ្ឋកិច្ច ក្នុងរង្វង់៧ភាគរយ ទៅ៧,២ភាគរយក្នុងមួយឆ្នាំ នៅក្នុងរយៈពេលខ្លី និងមធ្យមខាងមុខ។ នេះបើតាមលោក អូន ព័ន្ធមុនីរ័ត្ន។
លោក Phillippe BAUDRY បាននិយាយថា ការអភិវឌ្ឍ និងការរីកចម្រើនលឿនរបស់កម្ពុជា ក្នុងបរិការណ៍បច្ចុប្បន្ន ជាពិសេសកំណើនសេដ្ឋកិច្ចខ្ពស់ ដែលជាមធ្យម៧ភាគរយនេះ នាំឲ្យកម្ពុជា ជាប់ចំណាត់ថ្នាក់លេខ៦ ក្នុងចំណោមប្រទេស ដែលមានសេដ្ឋកិច្ចរីកចម្រើនលឿន នៅលើពិភពលោក។
ទីប្រឹក្សាសេដ្ឋកិច្ច នៃស្ថានទូតបារាំង បានបញ្ជាក់ដូច្នេះថា៖«បារាំងនឹងបន្តខិតខំប្រឹងប្រែង និងពង្រីកកិច្ចសហប្រតិបត្តិការលើគ្រប់គោលនយោបាយ និងវិស័យអាទិភាពរបស់រាជរដ្ឋាភិបាលកម្ពុជា នឹងប្រឹងប្រែងចែករំលែកនូវបទពិសោធន៍នានាពីឆាកអន្តរជាតិ ។ បន្តការគាំទ្រទាំងផ្នែកហិរញ្ញវត្ថុ និងផ្នែកបច្ចេកទេស ដើម្បីជួយជំរុញដល់ការអភិវឌ្ឍ និងវិនិយោគ ទាំងលើវិស័យសាធារណៈ ក៏ដូចជា វិស័យឯកជនឲ្យកាន់តែរីកចម្រើនបន្ថែមទៀតនៅកម្ពុជា»។
បច្ចុប្បន្ននេះ កម្ពុជា កំពុងប្រឈមមុខ នឹងបញ្ហាដកប្រព័ន្ធអនុគ្រោះពន្ធ (Everything But Arms) ពីសំណាក់សហភាព ដោយសារបញ្ហានយោបាយ និងសិទ្ធិមនុស្សនៅកម្ពុជា។ សហភាព ត្រូវការរយៈពេល១ឆ្នាំ ក្នុងការបន្តដំណើរការនីតិវិធីដក ឬមិនដកប្រព័ន្ធអនុគ្រោះពន្ធនេះ ដើម្បីត្រួតពិនិត្យស្ថានការណ៍កម្ពុជា មុននឹងសម្រេចចុងក្រោយ។