ជាតិ
បុណ្យអុំទូក
ខេត្តសៀមរាបប្រារព្វពិធីអុំទូក រយៈពេល២ថ្ងៃ
× សៀមរាប៖ រដ្ឋបាលខេត្តសៀមរាប បានប្រកាសពីកាលបរិច្ឆេទនៃកម្មវិធីប្រណាំងទូកង ឬបុណ្យអុំទូកក្នុងឆ្នាំ ២០១៨នេះ។ តាមសេចក្តីជូនដំណឹង កម្មវិធីឆ្នាំនេះនឹងប្រារព្ធធ្វើនៅថ្ងៃទី ២១ និង២២ វិច្ឆិកា នៅតាមបណ្ដោយស្ទឹងសៀមរាប។
ដូចរាល់ឆ្នាំ កម្មវិធីបុណ្យអុំទូកនៅខេត្តសៀមរាប គឺធ្វើឡើងដំណាលគ្នាទៅនឹងកម្មវិធីនៅរាជធានីភ្នំពេញដែរ តែត្រឹមរយៈពេល២ថ្ងៃប៉ុណ្ណោះ ខណៈពិធីធំមានរយៈពេល៣ថ្ងៃ គឺចាប់ពីថ្ងៃទី ២១ ដល់២៣ វិច្ឆិកា ឆ្នាំ ២០១៨។ យោងតាមសេចក្តីជូនដំណឹងរបស់រដ្ឋបាលខេត្តសៀមរាប ការប្រណាំងទូកង នឹងត្រូវរៀបចំធ្វើនៅទីតាំងចាស់ គឺវេទិកាមុខស្នាក់ការគណបក្សប្រជាជនកម្ពុជា។
ក្រៅពីនោះ កម្មវិធីដទៃទៀតដូចជា ការសម្ដែងសិល្បៈប្រពៃណី អកអំបុក សំពះព្រះខែ ធ្វើឡើងនៅលើសួនច្បារមុខសណ្ឋាគារ មហាសណ្ឋាគារអង្គរ ឬសួនច្បារព្រះរាជដំណាក់។
ជាមួយនឹងសេចក្តីជូនដំណឹងចុះថ្ងៃទី១៧ តុលា រដ្ឋបាលខេត្តសៀមរាបក៏បានប្រាប់ដល់ស្ថាប័ននានាដែលមានបំណងចង់ចូលរួមប្រណាំងទូកង ឱ្យទៅទទួលពាក្យនៅសាលាខេត្តសៀមរាប៕
© រក្សាសិទ្ធិដោយ thmeythmey.com