ជាតិ
នយោបាយជាតិ
លោក គង់ គាំ៖ បក្សកាន់អំណាច មិនដែលទុកខ្ញុំ ជាសត្រូវទេ លោក គង់ គាំ ថ្លែងសារ កាលពីថ្ងៃទី២៣ ខែតុលា ឆ្នាំ២០១៧ ក្នុងពិធីអបអរសាទរខួបលើកទី២៦នៃកិច្ចព្រមព្រៀងសន្តិភាពទីក្រុងប៉ារីស ដែលរៀបចំនៅទីស្នាក់ការកណ្តាលគណបក្សសង្គ្រោះជាតិ កាលពីគណបក្សសង្គ្រោះជាតិ មិនទាន់ត្រូវបានរំលាយ
× ភ្នំពេញ៖ លោក គង់ គាំ ដែលធ្លាប់ជាអ្នកនយោបាយដ៏មានឥទ្ធិពលម្នាក់នៃអតីតគណបក្សប្រឆាំង និងជាមនុស្សដែលស្និទ្ធនឹងលោក សម រង្ស៊ី មិនផ្តល់ចម្លើយឲ្យច្បាស់លាស់និងដាច់ស្រេចនោះទេថា លោក ជារនុកក្នុងឬមិនមែនជារនុកក្នុងរបស់គណបក្សកាន់អំណាច។ លោក គ្រាន់តែបង្ហើបថា មេដឹកនាំនិងមន្ត្រីគណបក្សកាន់អំណាច មិនដែលរើសអើងលោកឡើយ។
តាមរយៈការផ្តល់បទសម្ភាសដល់សារព័ត៌មានថ្មីៗ លោក គង់ គាំ បកស្រាយថា កាលពី១០-២០ឆ្នាំមុន ពេលលោក ចេញពីគណបក្សកាន់អំណាច ទៅចូលគណបក្សប្រឆាំង គឺប្រធាននិងថ្នាក់ដឹកនាំគណបក្សប្រឆាំង ពុំដែលដាក់ការសង្ស័យថា លោក ជារនុកក្នុងរបស់គណបក្សកាន់អំណាចនោះទេ។ ហើយមកដល់ពេលនេះ បើទោះបីជាលោក លែងស្ថិតក្នុងរចនាសម្ព័ន្ធនៃអតីតគណបក្សប្រឆាំង ហើយហាក់ដូចជានិយាយនិងធ្វើអ្វីៗខុសពីថ្នាក់ដឹកនាំនៃអតីតគណបក្សប្រឆាំងបន្តិចក្តី ក៏មេដឹកនាំនៃគណបក្សប្រឆាំង ពុំដែលគិតអាក្រក់ទៅលើរូបលោក ថាជារនុកក្នុងរបស់គណបក្សកាន់អំណាចដែរ។
លោក គង់ គាំ អតីតសមាជិកព្រឹទ្ធសភា និងធ្លាប់ជាប្រធានគណបក្សភ្លើងទៀន បានបញ្ជាក់យ៉ាងដូច្នេះថា៖«មេដឹកនាំកំពូលនៃអតីតគណបក្សប្រឆាំង និង មេដឹកនាំកំពូលនៃគណបក្សកាន់អំណាច មិនដែលសង្ស័យថា ខ្ញុំភ្ជាប់ខ្លួនជាភ្នាក់ងារសម្ងាត់របស់អ្នកណាឡើយ។ ហើយខ្ញុំគិតថា ថ្នាក់ដឹកនាំនៃគណបក្សកាន់អំណាច នៅតែចាត់ទុកខ្ញុំជាគ្នាឯង មិនយកខ្ញុំធ្វើជាសត្រូវទេ»។
លោក គង់ គាំ បន្តថា អ្វីដែលលោក លើកឡើងជុំវិញដំណើរការនៃការដកប្រព័ន្ធអនុគ្រោះពន្ធ EBA ចេញពីកម្ពុជា និង ការបោះឆ្នោត គឺក្នុងនាមជាប្រជាពលរដ្ឋធម្មតា មិនមែនក្នុងនាមជាអ្នកនយោបាយខាងណាឡើយ។ លោក បន្ថែមបែបនេះថា៖«ខ្ញុំ បញ្ចប់សមាជិកភាពរបស់ខ្ញុំ និងតំណែងជាប្រធានគណបក្សភ្លើងទៀន យូរហើយ ហើយក៏មិនមែនជាថ្នាក់ដឹកនាំគណបក្សប្រឆាំងទៀតដែរ ដូច្នេះ មិនអាចនិយាយថាខ្ញុំប្តូរជំហរនយោបាយនោះទេ។ ឥឡូវខ្ញុំ ក្លាយជាប្រជាពលរដ្ឋធម្មតា។ ខ្ញុំ គ្រាន់តែប្រើសិទ្ធិសេរីភាពជាប្រជាពលរដ្ឋប៉ុណ្ណោះ ក្នុងការទៅបោះឆ្នោតកន្លងមក ឬការបញ្ចេញមតិ»។
លោក គង់ គាំ ជានយោបាយម្នាក់ក្នុងចំណោយអ្នកនយោបាយទាំង១០៨នាក់នៃអតីតគណបក្សសង្គ្រោះជាតិ ដែលត្រូវបានដកហូតសិទ្ធិធ្វើនយោបាយរយៈពេល៥ឆ្នាំ ក្រោមអំណាចនៃសាលដីការបស់តុលាការកំពូល។ កូនប្រុសរបស់លោកពីរនាក់ គឺលោក គង់ បូរ៉ា និង លោក គង់ សភា ដែលជាអតីតតំណាងរាស្ត្រ ក៏ស្ថិតក្នុងចំណោមអ្នកនយោបាយទាំង១០៨នាក់នោះដែរ។
លោក គង់ គាំ ធ្វើឲ្យគេសង្ស័យថា លោក ជារនុកក្នុងរបស់គណបក្សប្រជាជនកម្ពុជា ដោយសារតែថ្មីៗ លោក បានផ្តល់បទសម្ភាសដល់វិទ្យុវាយោ ដែលស្តាប់ទៅហាក់ដូចជាចង់រិះគន់បែបបញ្ឆិតបញ្ឆៀងឲ្យថ្នាក់ដឹកនាំនៃអតីតគណបក្សប្រឆាំង ដែលសម្តែងក្តីបារម្ភពីការដកប្រព័ន្ធអនុគ្រោះពន្ធ EBA ចេញពីកម្ពុជា ខណៈកម្ពុជា មិនមានបញ្ហាផ្នែកសេដ្ឋកិច្ច។ លើសពីនេះ លោក ថែមទាំងគាំទ្រការបោះឆ្នោតអាណត្តិទី៦នេះថែមទៀត ទាំងដែលអតីតគណបក្សប្រឆាំងរបស់លោក ពុំបានចូលរួម។
ក្រោយលោក គង់ គាំ បញ្ចេញមតិទាំងនេះហើយ លោក សុខ ឥសាន អ្នកនាំពាក្យគណបក្សកាន់អំណាច ក៏សរសេរសារទៅកាន់អ្នកកាសែតតាមបណ្តាញតេឡេក្រាម ដោយចោទជាសំណួរថា «តើលោក គង់ គាំ ជារនុកក្នុងរបស់គណបក្សប្រជាជនកម្ពុជាឬទេ?»។
ទំនងជាខ្លាចមហាជនយល់ច្រឡំថា លោក គង់ គាំ ជារនុកក្នុងរបស់គណបក្សកាន់អំណាច ដូចការចោទសួររបស់លោក សុខ ឥសាន សម្តេច ហ៊ុន សែន ក៏ចេញមកបំភ្លឺខ្លួនឯងតែម្តង តាមរយៈសារព័ត៌មានហ្វ្រេសញូ។ ប្រធានគណបក្សកាន់អំណាច បកស្រាយថា ការលើកឡើងរបស់លោក គង់ គាំ គឺចេញពីឆន្ទៈផ្ទាល់របស់លោក ដោយមិនពាក់ព័ន្ធនឹងគណបក្សកាន់អំណាចឡើយ៕
© រក្សាសិទ្ធិដោយ thmeythmey.com