អន្តរជាតិ
អារ៉ាប់រួមរកឃើញប្រភពប្រេងថ្មី ស្របពេលអ៊ីរ៉ង់រងទណ្ឌកម្មអាមេរិកលើការនាំចេញប្រេង
រូបភាព AFP
×![]()
ក្រុមហ៊ុនប្រេងរដ្ឋដ៏ធំរបស់អេមីរ៉ាតអារ៉ាប់រួម នៅថ្ងៃទី០៤ ខែវិច្ឆិកា បានប្រកាសរកឃើញប្រភពប្រេង និងឧស្ម័នថ្មី ដោយសង្ឃឹមថា នឹងអាចផ្គត់ផ្គង់តម្រូវការសម្រាប់ខ្លួនឯងគ្រប់គ្រាន់ ខណៈទណ្ឌកម្មរបស់អាមេរិកប្រឆាំងនឹងអ៊ីរ៉ង់បានចូលជាធរមាន។ 
ក្រុមហ៊ុនប្រេងរបស់រដ្ឋ ADNOC ដែលស្ថិតនៅក្នុងរាជធានី Abu Dhabi បានប្រកាសនៅថ្ងៃអាទិត្យថា ខ្លួនបានរកឃើញទីតាំងរុករកប្រេងថ្មី ដែលមានផ្ទុកប្រេងរាប់ពាន់លានប៉ារែល និងទីតាំងចម្រាញ់ឧស្ម័នថ្មីផ្សេងទៀត ដែលមានផ្ទុកឧស្ម័នសរុបជាង១៥ទ្រីលានម៉ែត្រគូបឯណោះ។
បើតាមទីភ្នាក់ងារ AFP ក្រុមហ៊ុនផលិតប្រេងដដែលនេះ ក៏បានប្រកាសគម្រោងពង្រីកទំហំទិន្នផលប្រេងដល់ទៅ ៤លានប៉ារែលក្នុងមួយថ្ងៃ គិតត្រឹមឆ្នាំ២០២០ និង៥លានប៉ារែលក្នុងមួយថ្ងៃ គិតត្រឹមឆ្នាំ២០៣០។ សម្រាប់គម្រោងបង្កើនទំហំផលិតកម្មប្រេងថ្មីនេះ មន្ត្រីអេមីរ៉ាតអារ៉ាប់រួម បានលើកឡើងថា គោលបំណងរបស់វាគឺដើម្បីធ្វើឲ្យរដ្ឋមួយនេះ មានសមត្ថភាពផ្គត់ផ្គង់ប្រេងសម្រាប់ខ្លួនឯងឲ្យបានគ្រប់គ្រាន់ទាំងស្រុងតែម្តង។
ទន្ទឹមនឹងនេះ រាជទាយាទអេមីរ៉ាតអារ៉ាប់រួម ព្រះអង្គម្ចាស់ Mohammed bin Zayed ក៏បញ្ជាក់នៅក្នុងបណ្តាញសង្គម Twitter ថា ក្រុមប្រឹក្សាប្រេងឥន្ធនៈកំពូលបានអនុម័តកញ្ចប់ថវិកាចំនួន ១៣២ពាន់លានដុល្លារដើម្បីជួយគាំទ្រគម្រោង៥ឆ្នាំមួយនេះ។ ក្នុងគម្រោងនោះគឺរួមបញ្ចូល យុទ្ធសាស្ត្រឧស្ម័នរបស់ក្រុមហ៊ុនប្រេងរដ្ឋ ADNOC ដើម្បីផ្គត់ផ្គង់ឧស្ម័នបានគ្រប់គ្រាប់សម្រាប់ខ្លួនឯង និងដើម្បីនាំចេញ។ តួយ៉ាងបច្ចប្បន្ននេះ អេមីរ៉ាតអារ៉ាប់រួមនៅតែពឹងផ្អែកលើកាតាសម្រាប់ការនាំចូលឧស្ម័នតាមបំពង់ Dolphin។
តាមពិតទៅ ការប្រកាសរបស់ក្រុមហ៊ុនប្រេងរដ្ឋ ADNOC របស់អេមីរ៉ាតអារ៉ាប់រួមនេះគឺធ្វើឡើង ក្រោយពីសហរដ្ឋអាមេរិកបានដាក់ទណ្ឌកម្មប្រឆាំងនឹងអ៊ីរ៉ង់។ ចំណាត់ការរបស់ក្រុងវ៉ាស៊ីនតោននេះគឺសំដៅទៅម៉ូយដុំទិញប្រេងរបស់អ៊ីរ៉ង់ ជាមួយគោលបំណងកាត់ផ្តាច់ប្រភពចំណូលដ៏សំខាន់របស់ក្រុងតេអេរ៉ង់តែម្តង។ អេមីរ៉ាតអារ៉ាប់រួម និងសម្ព័ន្ធមិត្តដ៏សំខាន់របស់ខ្លួន អារ៉ាប៊ីសាអូឌីតបានប្រកាសគាំទ្រនូវការទណ្ឌកម្មរបស់អាមេរិកថ្មីនេះ។
គួរឲ្យដឹងដែរថា អេមីរ៉ាតអារ៉ាប់រួម ដែលជាប្រទេសផលិតប្រេងធំបំផុតលំដាប់ទី៤ប្រចាំអង្គការ OPEC សព្វថ្ងៃនេះ មានសមត្ថភាពផលិតប្រេងដល់ទៅ ៣,៥លានប៉ារែលក្នុងមួយថ្ងៃ៕
Tag:
អេមីរ៉ាតអារ៉ាប់រួម
ប្រេងនិងឧស្ម័ន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
