រថយន្ត
អន្តរជាតិ
×![]()
ដោយ: ធីតា
ចំនួនរថយន្ត និងចម្ងាយហោះហើររបស់យន្តហោះ នឹងកើនឡើងទ្វេរនៅឆ្នាំ២០៤០ បើប្រៀបធៀបទៅនឹងឆ្នាំ២០១៥ ។ នេះបើតាមការសិក្សារបស់ភ្នាក់ងារស្រាវជ្រាវការវិនិយោគអាមេរិក Bernstein។ រថយន្តដែលបើកនៅលើផ្លូវថ្នល់នឹងកើនដល់២ពាន់លានគ្រឿង ខណៈចម្ងាយនៃការហោះហើរលើអាកាសនឹងកើនដល់២០ទ្រីលានគីឡូម៉ែត្រផងដែរ នៅឆ្នាំ២០៤០ ។
កំណើននៃការប្រើប្រាស់រថយន្ត និងកំណើនចម្ងាយនៃការហោះហើរផ្លូវអាកាស កើតឡើងដោយសារតែសន្ទុះតម្រូវការនៅលើទីផ្សារ ដូចជាចិន និងឥណ្ឌា។ នៅប្រមាណ២២ឆ្នាំខាងមុខ ទៀត គេរំពឹងថា ចំនួនមនុស្សសរុបនឹងកើនឡើងទៅដល់ប្រមាណ ៩,២ពាន់លាននាក់។
Bernstein បានគូសបញ្ជាក់ថា កំណើនចំណូលប្រចាំថ្ងៃនៅតាមតំបន់នីមួយៗ ធ្វើឲ្យមនុស្សមានតម្រូវសម្ភារកាន់តែខ្ពស់ផងដែរ ក្នុងនោះមាន យានយន្ត និងការហោះហើរជាដើម។ បើតាមការផ្សាយរបស់ Business Insider ពលរដ្ឋដែលរស់នៅប្រទេសអភិវឌ្ឍន៍ ក៏មានតម្រូវការប្រេងឥន្ទនៈ កាន់តែខ្ពស់ផងដែរ ជាពិសេសសហរដ្ឋអាមេរិក ជប៉ុន អាល្លឺម៉ង់ បារាំង ចក្រភពអង់គ្លេស កូរ៉េខាងត្បូង ចិន និងឥណ្ឌា។
បើតាមការសិក្សារបស់ Bernstein កំណើនរថយន្តកើនពី១,២ពាន់លានគ្រឿងនៅឆ្នាំ២០១៥ ដល់១,៥ពាន់លានគ្រឿងនៅឆ្នាំ២០២៥ ហើយបន្តដល់២ពាន់លានគ្រឿងនៅឆ្នាំ២០៤០ ។ ប្រភេទរថយន្តដឹកទំនិញ ក៏នឹងមានការកើនឡើងជាបន្តបន្ទាប់ផងដែរ ដោយមាន៣៧៧លានគ្រឿងនៅឆ្នាំ២០២៥ កើនដល់៥០៧លានគ្រឿងនៅឆ្នាំ២០២៥ ហើយបន្តឡើងដល់៧៩០លានគ្រឿងនៅឆ្នាំ២០៤០ ។
ដោយឡែកចម្ងាយនៃការហោះហើរវិញ កើនពី៩ទ្រីលានគីឡូម៉ែត្រ នៅឆ្នាំ២០១៥ ដល់១២ទ្រីលានគីឡូម៉ែត្រនៅឆ្នាំ២០២៥ និងបន្តដល់២០ទ្រីលានគីឡូម៉ែត្រនៅឆ្នាំ២០៤០ ដោយគិតតាមចំនួនគីឡូម៉ែត្ររបស់អ្នកដំណើរដែលបង់ប្រាក់ (RPK)៕
© រក្សាសិទ្ធិដោយ thmeythmey.com
