ហ្វីលីពីន៖ អាស៊ាន-ចិនអាចដើរមិនដល់ការបង្កើតក្រមប្រតិបត្តិសមុទ្រចិនខាងត្បូងដែលមានអនុភាពគតិយុត្តិ

អន្តរជាតិ

ហ្វីលីពីន៖ អាស៊ាន-ចិនអាចដើរមិនដល់ការបង្កើតក្រមប្រតិបត្តិសមុទ្រចិនខាងត្បូងដែលមានអនុភាពគតិយុត្តិ

05, Nov 2018 , 10:59 pm

រូបភាព

ដោយ:

ប្រមុខការទូតទើបទទួលបានការតែងតាំងតំណែងរបស់ហ្វីលីពីន លោក Teodoro Locsin បានព្យាករថា ដំណើរការចរចាធ្វើក្រមប្រតិបត្តិសមុទ្រចិនខាងត្បូងរបស់ប្រទេសអាស៊ានទាំងដប់ជាមួយនឹងចិន ដែលមានចរិកលក្ខណៈចាប់បង្ខំផ្នែកច្បាប់ អាចនឹងមិនដល់គោលដៅបានឡើយ។

« យើង (អាស៊ាន-ចិន) ទំនងជាមិនអាចឈានដល់ការបង្កើតឲ្យមានក្រមប្រតិបត្តិមួយដែលមានលក្ខណៈចាប់បង្ខំផ្នែកច្បាប់បាននោះទេ»។ នេះ គឺជាសេចក្តីថ្លែងការណ៍របស់រដ្ឋមន្ត្រីការបរទេសថ្មីហ្វីលីពីន លោក Teodoro Locsin ទៅកាន់អ្នកសារព័ត៌មាន បន្ទាប់ពីបញ្ចប់ជំនួបជាមួយនឹងរដ្ឋមន្ត្រីការបរទេសចិន លោក Wang Yi ដែលបានបំពេញទស្សនកិច្ចនៅហ្វីលីពីនកាលពីពេលថ្មីៗនេះ។

អត្ថបទទាក់ទង

អាស៊ាន មិនទាន់អាចកំណត់ពេលចុងក្រោយដើម្បីសម្រេច«ក្រមប្រតិបត្តិសមុទ្រចិនខាងត្បូង»ឡើយ

តាមភ្ងាក់ងារព័ត៌មាន Reuters សេចក្តីថ្លែងការណ៍របស់ប្រមុខការទូតហ្វីលីពីនរូបនេះ ហាក់បង្កប់ជាមួយនឹងសេណារីយ៉ូអាថកំបាំងមួយចំនួន ដ្បិតលោក មិនពន្យល់ពីបញ្ហា ឬហេតុផលណាមួយសោះ ដែលធ្វើឲ្យលោក អាចហ៊ានព្យាករមុនបែបនេះ ខណៈដែលអាស៊ាន-ចិន បានប្តេជ្ញាថា នឹងធ្វើឲ្យបាននូវក្រមប្រតិបត្តិ ដែលមានលក្ខណៈចាប់បង្ខំផ្នែកច្បាប់សម្រាប់គ្រប់គ្រងបញ្ហាសមុទ្រចិនខាងត្បូងនោះ។

សម្រាប់លោកប្រមុខការទូតដដែលរូបនេះ ជឿជាក់ថា នឹងមានស្តង់ដារមួយរបស់ប្រជាជនអាស៊ាន រដ្ឋាភិបាលអាស៊ាន ត្រូវបានប្រតិបត្តិទៅកាន់ភាគីពាក់ព័ន្ធ ជាមួយនឹងស្មារតីយោគយល់គ្នា ហើយអាស៊ាន នឹងមិនប្រើប្រាស់ឥរិយាបថឃោរឃៅទៅកាន់ភាគីណាមួយដើម្បីមធ្យោបាយតទល់របស់ខ្លួនឡើយ។

សូមជម្រាបថា រយៈពេលច្រើនទសវត្សរ៍មកហើយ ដែលរដ្ឋអាស៊ានរួមមាន ព្រុយណេ ម៉ាឡេស៊ី ហ្វីលីពីន និងវៀតណាម បានមានវិវាទអធិបតេយ្យជាមួយនឹងចិនលើដែនសមុទ្រចិនខាងត្បូង ដែលជាសមុទ្រដ៏មានសក្តានុពល។ ភាគីពាក់ព័ន្ធ កន្លងមក ក្នុងក្របខណ្ឌអាស៊ាន-ចិនមានត្រឹមតែលិខិតបទដ្ឋានគតិយុត្តិ ដែលមានចរិកលក្ខណៈទូលាយក្នុងការគ្រប់គ្រងសកម្មភាពនៅតំបន់មានវិវាទប៉ុណ្ណោះ។

ក្នុងចំណោមភាគីពាក់ព័ន្ធនៃជម្លោះ ហ្វីលីពីន និងវៀតណាម កន្លងមក ធ្លាប់មានការប្រឈមមុខគ្នាខ្លាំងទាំងផ្នែកទ័ព និងការទូតជាមួយនឹងចិន។ ហ្វីលីពីន ក្រោមអតីតរដ្ឋបាលមុន ថែមទាំងបានប្តឹងចិនដល់មជ្ឈត្តការតុលាការអចិន្ត្រៃយ៍អន្តរជាតិលើការរំលោភលើតំបន់សមុទ្រចិនខាងត្បូងដែលហ្វីលីពីនអះអាងថា ស្ថិតក្រោមកម្មសិទ្ធិរបស់ខ្លួនផង។

ក៏ប៉ុន្តែក្រោយពីមានភាពតានតឹង ក៏ដូចជាការពិភាក្សាជាច្រើនមក នៅចុងឆ្នាំ២០១៧កន្លងទៅ ដែលជាពេលហ្វីលីពីនជាប្រធានអាស៊ាន ភាគីទាំងពីរចិន និងអាស៊ាន បានចុះហត្ថលេខាលើក្របខណ្ឌនៃក្រមប្រតិបត្តិសមុទ្រចិនខាងត្បូងដែលជាគ្រោងឆ្អឹងនៃកិច្ចព្រមព្រៀង។

ភាគីក៏ចាប់ផ្តើមការចរចាជាផ្លូវការលើក្រមប្រតិបត្តិសមុទ្រចិនសមុទ្រ ដើម្បីកំណត់ថាក្រមនេះ គួរដាក់បញ្ចូលបទបញ្ញត្តិបែបណាដើម្បីគ្រប់គ្រងសកម្មភាពនៅក្នុងតំបន់នោះប្រកបដោយប្រសិទ្ធភាព និងអាចអនុវត្តបានទាំងអស់គ្នានោះ។ មកទល់ពេលនេះ មិនទាន់មានការលេចលឺថាតើ ភាគីពាក់ព័ន្ធ បានចរចាដល់កម្រិតណានៅឡើយនោះទេ៕