អន្តរជាតិ
សិង្ហបុរី រកដំណោះស្រាយទប់ទល់ការប្រែប្រួលអាកាសធាតុ ខណៈទឹកសមុទ្រឡើងខ្ពស់គួរឲ្យបារម្ភ
× នាយករដ្ឋមន្ត្រីសិង្ហបុរី លោក លី សៀនឡុង បានឲ្យដឹងថា សិង្ហបុរី កំពុងតែរកមធ្យោបាយ និងចាត់វិធានការដើម្បីទប់ទល់នឹងបញ្ហាប្រែប្រួលអាកាសធាតុដែលជាក្តីបារម្ភធំសម្រាប់គ្រប់គ្នាមិនត្រឹមតែសម្រាប់សិង្ហបុរីឡើយ។ ប៉ុន្តែវាជាបញ្ហាធំសម្រាប់រដ្ឋដែលមានអធិបតេយ្យជាដែនទឹកច្រើនជាងដែនគោក។
នាឱកាសនៃការបើកកម្មវិធី«ធ្វើឲ្យសិង្ហបុរីមានអនាម័យ និងបៃតង»នៅថ្ងៃ៣ វិច្ឆិកា លោកនាយករដ្ឋមន្ត្រី លី សៀនឡុង បានលើកឡើងថា ប្រទេសអាស៊ីអាគ្នេយ៍ភាគច្រើន ដែលរួមទាំងសិង្ហបុរីផងនោះ គឺជាប្រទេសងាយរងគ្រោះដោយសាតែការកើនឡើងនៃកម្ពស់ទឹកសមុទ្រ ដ្បិតប្រទេសទាំងនេះ មានជាប់នឹងឆ្នេរសមុទ្រវែង និងស្ថិតក្នុងតំបន់ទំនាបទៀតផង។
លោក លើកយករបាយការណ៍វេទិកាអន្តររដ្ឋាភិបាលស្តីពីការប្រែប្រួលអាកាសរបស់អង្គការសហប្រជាជាតិ ដែលបានព្រមានពីការកើនឡើងនៃសីតុណ្ហភាព។ លោកបន្តថា ការកើនឡើងនៃសីតុណ្ហភាពនៅក្នុងតំបន់ អាចនឹងបង្កឲ្យមានជាជំងឺត្រូពិក, ផលប៉ះពាល់ដល់ដំណាំកសិកម្ម និងធ្វើឲ្យសេដ្ឋកិច្ចសិង្ហបុរីអន់ថយទៀត។
លោកនាយករដ្ឋមន្ត្រី សង្កត់ធ្ងន់ថា ដើម្បីប្រយុទ្ធប្រឆាំងនឹងការគំរាមកំហែងនៃការប្រែប្រួលអាកាសអាធាតុរយៈវែង សិង្ហបុរីត្រូវតែគិតគូរពីផលប៉ះពាល់ឲ្យបានវែងឆ្ងាយសម្រាប់ប្រទេស សេដ្ឋកិច្ច និងប្រជាជន ហើយពេលនេះ ដែលសិង្ហបុរី បានចាប់ផ្តើមជំហានជាបន្តបន្ទាប់រួចហើយដើម្បីការពារប្រទេសរបស់ខ្លួនពីបញ្ហាទាំងនេះ។
លោកអះអាងថា សិង្ហបុរី បានវិនិយោគច្រើនលើសលប់ទៅលើវិស័យហេដ្ឋារចនាសម្ព័ន្ធដើម្បីជាមធ្យោបាយមួយសម្រាប់ធានាពីការផ្គត់ផ្គង់ទឹក ដែលជាធាតុកម្រ និងចាំបាច់សម្រាប់ការរស់នៅរបស់ប្រជាជន។ មួយវិញទៀតនោះ សិង្ហបុរី ក៏បានសាងសង់ផ្លូវដែលស្ថិតនៅតំបន់ទំនាប ដើម្បីទប់ស្កាត់ទឹកទំនន់ ដែលអាចបង្កឡើងដោយការហក់ឡើងខ្ពស់នៃកម្រិតទឹកសមុទ្រ៕
Tag:
សិង្ហបុរី
បម្រែបម្រួលអាកាសធាតុ
អាស៊ាន
© រក្សាសិទ្ធិដោយ thmeythmey.com