អន្តរជាតិ
លោកមហាធៀ ចង់ឲ្យប្រជាជនម៉ាឡេស៊ីរៀន «ចេះខ្មាស» ដូចជប៉ុន លោកមហាធៀ នាយករដ្ឋមន្រ្តីម៉ាឡេស៊ី (រូបភាព AFP)
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅថ្ងៃទី៥ ខែវិច្ឆិកា បានស្នើឲ្យសាកលវិទ្យាល័យជប៉ុន បើកសាខានៅម៉ាឡេស៊ី ដើម្បីឲ្យម៉ាឡេស៊ីរៀនសូត្រតាម។ លោក មហាធៀ ដែលតែងតែស្ងើចសរសើរវប្បធម៌ធ្វើការ និងសីលធម៌របស់ជប៉ុននោះ ចង់ឃើញវប្បធម៌បែបនេះមាននៅក្នុងសង្គមម៉ាឡេស៊ីដែរ។ យ៉ាងណាមិញ លោកទទួលស្គាល់ពីកត្តាជាច្រើនដែលហាមឃាត់គ្រឹះស្ថានអប់រំជប៉ុនបើកសាខានៅឯបរទេស។
នាយករដ្ឋមន្ត្រីវ័យចំណាស់របស់ម៉ាឡេស៊ី មហាធៀ មហាម៉ាត់ បានចាប់ផ្ដើមទស្សនកិច្ចការងារ៣ថ្ងៃនៅជប៉ុនចាប់ពីថ្ងៃទី៥ ខែវិច្ឆិកា ដែលជាទស្សនកិច្ចលើកទី២របស់លោកនៅប្រទេសសេដ្ឋកិច្ចជឿនលឿនមួយនេះ។ នៅថ្ងៃដំបូងនៃដំណើរទស្សនកិច្ចនេះ លោក មហាធៀ បានទទួលសញ្ញាបត្របណ្ឌិតកិត្តិយសពីសាកលវិទ្យាល័យ Tsukuba ជាទីដែលលោកបានអំពាវនាវឲ្យសាកលវិទ្យាល័យជប៉ុនបើកសាខានៅម៉ាឡេស៊ី។
ពីទឹកដីជប៉ុន លោក មហាធៀ បានរំឭកពីគោលនយោបាយសម្លឹងទៅទិសខាងកើត ដែលលោកដាក់ចេញពេលធ្វើនាយករដ្ឋមន្ត្រីម៉ាឡេស៊ីកាលពីឆ្នាំ១៩៨១ ហើយមានគោលដៅរៀនសូត្រពីចំណេះដឹង អាកប្បកិរិយា ការរស់នៅរបស់ប្រទេសនៅអាស៊ីខាងកើតមួយនេះ។ ដើម្បីសម្រេចគោលដៅនេះ នាយករដ្ឋមន្ត្រីម៉ាឡេស៊ីរូបនេះនិយាយថា វិធីដែលល្អជាងគេ គឺបញ្ជូនសិស្សទៅរៀននៅជប៉ុន ហើយយកចំណេះដឹងមកអនុវត្តក្នុងប្រទេសវិញ។
សម្រាប់ការអង្គុយកៅអីនាយករដ្ឋមន្ត្រីលើកទីពីរនេះវិញ លោក មហាធៀ អះអាងថា វប្បធម៌ជប៉ុនដែលលោកសរសើរមិនដាច់ពីមាត់នោះ បានកើនឡើងតម្លៃថែមទៀត។ ដើម្បីឲ្យប្រជាជនម៉ាឡេស៊ីរៀនតាមបាននោះ ប្រមុខរដ្ឋាភិបាលវ័យចំណាស់ជាងគេលើពិភពលោករូបនេះក៏សង្ឃឹមថា គ្រឹះស្ថានអប់រំជប៉ុនអាចជម្នះឧបសគ្គផ្នែកច្បាប់ និងបញ្ញត្តិផ្សេងៗដើម្បីបើកសាខានៅម៉ាឡេស៊ី ព្រោះជួយកាត់បន្ថយការចំណាយ ហើយម៉ាឡេស៊ីអាចក្លាយជាមជ្ឈមណ្ឌលសិក្សាជប៉ុននៅអាស៊ានដែរ។
បើតាមសារព័ត៌មានម៉ាឡេស៊ី The Star រដ្ឋបុរសម៉ាឡេស៊ីរូបនេះចង់ឃើញអារម្មណ៍ចេះខ្មាសរបស់ប្រជាជនកើតមាននៅម៉ាឡេស៊ី។ ដោយប្រៀបធៀបរវាងម៉ាឡេស៊ី និងជប៉ុន លោកបញ្ជាក់ថា៖ «កាលពីដើម ពេលមិនអាចសម្រេចការងារបាន ប្រជាជនជប៉ុននឹងធ្វើអត្តឃាត។ នៅម៉ាឡេស៊ីវិញ ពេលខ្លះ យើងគ្មានអារម្មណ៍ខ្មាសឡើយ ទោះជាបរាជ័យក្ដី។ ជាការពិត យើងឃើញមនុស្សដើរចូលគុកដោយមិនគ្មានអៀនខ្មាសអ្វីទេ និងមានទឹកមុខញញឹមញញែមផង។»
នាយករដ្ឋមន្ត្រីម៉ាឡេស៊ីវ័យ៩៣ឆ្នាំរូបនេះ ចង់ឲ្យមានការផ្លាស់ប្ដូរឥរិយាបថមិនសមរម្យ ជាពិសេសសីលធម៌តែម្ដង។ សម្រាប់លោក ពេលប្រជាជន ឬមន្ត្រីនៅម៉ាឡេស៊ីមានអារម្មណ៍អៀនខ្មាស ពួកគេគួរខិតខំធ្វើការងារដែលត្រូវបានដាក់ឲ្យ៕
Tag:
ម៉ាឡេស៊ី
ជប៉ុន
មហាធៀ មហាម៉ាត់
© រក្សាសិទ្ធិដោយ thmeythmey.com