កីឡាជាតិ
ជាតិ
ជើងឯកថ្នាក់ជាតិ ២០១៨៖ ក្រសួងមហាផ្ទៃឈរលេខ១ វិញ្ញាសារហែលទឹក ក្រោយឈ្នះមេដាយមាស៨
×![]()
ក្រុមអត្តពលិកក្រសួងមហាផ្ទៃឈរលេខ១ក្នុងតារាងមេដាយ នាការប្រកួតកីឡាហែលទឹកជ្រើសរើសជើងឯកថ្នាក់ជាតិឆ្នាំ២០១៨ ក្រោយពួកគេដណ្តើមបានមេដាយសរុបចំនួន១៧។ ចំណែកក្លិបក្រសួងសាធារណការនិងដឹកជញ្ជូន និងនាគរាជកំពង់ចាមឈរលេខរៀងជាបន្តបន្ទាប់។ សម្រាប់ការប្រកួតឆ្នាំនេះមានក្លិប-សមាគមចំនួន៧ចូលរួម ដោយមានកីឡាករសរុប១២០នាក់។
ក្រោយប្រកួតយ៉ាងស្វិតស្វាញពីថ្ងៃទី១-៣ ខែវិច្ឆិកា នៅអាងហែលក្នុងទឹកពហុកីឡដ្ឋានជាតិមរតកតេជោ អត្តពលិកក្រសួងមហាផ្ទៃដណ្តើមបានមេដាយមាស៨ ប្រាក់៦ និងសំរឹទ្ធ៣។ មេដាយទាំងនេះ បានជួយឲ្យក្លិបក្រសួងមហាផ្ទៃគ្រងជើងឯកសម្រាប់ការប្រកួតកីឡាហែលទឹកជ្រើសរើសជើងឯកថ្នាក់ជាតិប្រចាំឆ្នាំ២០១៨។
ក្រោយអត្តពលិកដណ្តើមបានមេដាយមាស៧ ប្រាក់៦ និងសំរឹទ្ធ៨ ជួយក្លិបក្រសួងសាធារណការនិងដឹកជញ្ជូនឈរលេខរៀងទី២ ដែលមានក្លិបនាគរាជកំពង់ចាមឈរលេខរៀងបន្ទាប់ ក្រោយឈ្នះមេដាយមាស៣ ប្រាក់៣ និងសំរឹទ្ធ៤។ ចំណែកក្លិបលេខ៥ក្រសួងសេដ្ឋកិច្ចនិងហិរញ្ញវត្ថុដណ្តើមបានមេដាយមាស១ ប្រាក់៣និងសំរឹទ្ធ៤ ខណៈក្លិបក្រសួងព័ត៌មានបានមេដាយសំរឹទ្ធ១។
ដោយឡែក ក្លិបមច្ឆានុប និងសាលាខេនរីដអន្តរជាតិសិង្ហបុរីមិនទទួលបានមេដាយនោះទេ។ សម្រាប់ការប្រកួតជើងឯកថ្នាក់ជាតិឆ្នាំនេះមានកីឡាករកីឡាការិនីចំនួន១២០នាក់មកពី៧ក្លិប-សមាគមចូលរួម។ នាពិធីបិទការប្រកួតកាលពីថ្ងៃទី៣ ខែវិច្ឆិកា មានការចូលរួមពីសំណាក់លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន និងជាប្រធានសហព័ន្ធខ្មែរកីឡាហែលទឹក៕
Tag:
ហែលទឹក
ក្រសួងមហាផ្ទៃ
ស៊ុន ចាន់ថុល
© រក្សាសិទ្ធិដោយ thmeythmey.com
