អន្តរជាតិ
ចិនបង្ហាញពីការចូលរួមចំណែកខ្លួនលើការអភិវឌ្ឍន៍សេដ្ឋកិច្ចពិភពលោក តាមរយៈគំនិតផ្តួចផ្តើម BRI
×![]()
ដោយ: ថ្មីៗ
ប៉េកាំង៖ គំនិតផ្តួចផ្តើមខ្សែក្រវ៉ាត់ និងវិថី (Belt and Road Initiative) ត្រូវបានប្រកាសដោយប្រធានាធិបតីស៊ី ជិនភីង កាលពីឆ្នាំ២០១៣។ ដើម្បីឲ្យគំនិតផ្តួចផ្តើមនេះកាន់តែសំខាន់ក្នុងការអភិវឌ្ឍសេដ្ឋកិច្ចពិភពលោក គឺត្រូវការការចូលរួមពីបណ្តាប្រទេសជាច្រើននៅតំបន់អាស៊ី, អាហ្វ្រិក,អាមេរិកឡាទីន និងនៅអឺរ៉ុប ដែលជាមិត្តរបស់ចិន។
នេះការលើកឡើងរបស់លោកស្រី YUE Yanghua អនុប្រធាននាយកដ្ឋានអន្តរជាតិ នៃគណៈកម្មការកណ្តាលបក្សកុម្មុយនីស្តចិន ដែលបានបញ្ជាក់ក្នុងជំនួបជាមួយអ្នកកាសែតជាង២០នាក់ពីបណ្តាប្រទេសអាស៊ាន និងបណ្តាប្រទេសដែលពាក់ព័ន្ធនឹងគំនិតផ្តួចផ្តើមខ្សែក្រវ៉ាត់ និងវិថីនៅថ្ងៃទី៥ ខែវិច្ឆិកា នៅទីក្រុងប៉េកាំង។
លោកស្រី YUE Yanghua គូសបញ្ជាក់ដូច្នេះថា៖« BRI នឹងអាចក្លាយជាផ្នែកមួយនៃការអភិវឌ្ឍន៍សង្គមជាតិ អាស្រ័យដោយមានការចូលរួមពីបណ្តាប្រទេសជាមិត្ត នៅអាស៊ី,អាហ្វ្រិក, អាមេរិកឡាទីន, និងអឺរ៉ុប ដើម្បីធានាបាននូវទំនាក់ទំនងដ៏ទូលំទូលាយ»។
ក្នុងជំនួបពិភាក្សានោះ អនុប្រធាននាយកដ្ឋានអន្តរជាតិនៃគណៈបក្សកុម្មុនីស្តចិន បានគូសបញ្ជាក់ផងដែរពី មានតួនាទី និងទំនួលខុសត្រូវកាន់តែសំខាន់របស់ចិន ក្នុងការកសាង និងអភិវឌ្ឍន៍ប្រជាជាតិទាំងមូល ដែលគេមិនអាចមើលរំលងបាន ចាប់ពីតាំងពីបើកចំហរសេដ្ឋកិច្ចមក។
ក្នុងរយៈពេល៥ឆ្នាំកន្លងមកនេះ គំនិតផ្តួចផ្តើមខ្សែក្រវ៉ាត់ និងវិថី សម្រេចបានជោគជ័យគួរឲ្យកត់សម្គាល់ ពោលគឺប្រែក្លាយពីទ្រឹស្តី មកជាសកម្មភាពជាក់ស្តែង។ បច្ចុប្បន្នមានប្រទេស និងស្ថាប័នអន្តរជាតិជាង១០០ហើយ ដែលបានចុះហត្ថលេខាលើកិច្ចព្រមព្រៀង នៃគំនិតផ្តួចផ្តើមនេះ។ នេះជាការបន្ថែមរបស់លោកស្រី YUE Yanghua រួចបន្តដោយរំពឹងថាប្រតិភូអ្នកសារព័ត៌មាននឹងទទួលបានចំណេះដឹងកាន់តែស៊ីជម្រៅបន្ថែមទៀត ពីគំនិតផ្តួចផ្តើមខ្សែក្រវ៉ាត់ និងវិថី ក៏ដូចជាផ្សព្វផ្សាយឲ្យកាន់តែទូលាយពីរសំខាន់នៃគំនិតផ្តួចផ្តើមខ្សែក្រវ៉ាត់ និងវិថី ក្នុងការអភិវឌ្ឍន៍សេដ្ឋកិច្ច ទៅកាន់ប្រជាជននៅក្នុងប្រទេសរបស់ខ្លួន។
សូមបញ្ជាក់ថា នៅឆ្នាំ២០១៨នេះ អ្នកកាសែតខ្មែរ៦រូបមកពីអង្គភាពសារព័ត៌មានថ្មីៗ ដើមអម្ពិល និងទីភ្នាក់ងារព័ត៌មានកម្ពុជា បានចូលរួមក្នុងវេទិកាអន្តរជាតិ កិច្ចសហប្រតិបត្តិការសារព័ត៌មានប្រចាំឆ្នាំ។ វេទិកា ត្រូវបានរៀបចំដោយសារព័ត៌មានរបស់បក្សកម្មុយនីស្តចិនដ៏មានឥទ្ធិពលឈ្មោះ People’s Daily ក្រោមប្រធានបទផ្សេងៗគ្នា។
រៀងរាល់ឆ្នាំ អ្នកកាសែតជាង១០០នាក់មកពីបណ្តាប្រទេសដែលពាក់ព័ន្ធនឹងគំនិតផ្តួចផ្តើមនេះ ត្រូវបានអញ្ជើញឲ្យមកចូលរួមជជែកពិភាក្សាលើប្រធានបទនានាស្តីពីសារព័ត៌មាន និងគំនិតផ្តួចផ្តើមនេះ។ ទន្ទឹមគ្នានោះវេទិកាសារព័ត៌មាន១០ បូក៣ ក៏ត្រូវបានរៀបចំជាមួយគ្នាផងដែរ៕
© រក្សាសិទ្ធិដោយ thmeythmey.com
