Kasper Schmeichel ៖ សោកនាដកម្មធ្លាក់ឧទ្ធម្ភាគចក្រ នឹងតាមលងខ្ញុំជារៀងរហូត

កីឡាអន្តរជាតិ

អន្តរជាតិ

Kasper Schmeichel ៖ សោកនាដកម្មធ្លាក់ឧទ្ធម្ភាគចក្រ នឹងតាមលងខ្ញុំជារៀងរហូត

06, Nov 2018 , 8:39 pm

រូបភាព

ដោយ: ទេព ពិទូរ្យ

Kasper Schmeichel អ្នកចាំទីក្រុម Leicester City ថាហេតុការណ៍ការធ្លាក់ឧទ្ធម្ភាគចក្រនៅក្បែរកីឡដ្ឋាន King Power ដែលបានសម្លាប់ម្ចាស់ក្លិបរបស់ខ្លួនលោក Vichai Srivaddhanaprabha រួមទាំងមនុស្សបួននាក់ផ្សេងទៀតនោះ នឹងតាមលងខ្លួនរហូត ព្រោះរូបគេបានឃើញសោកនាដកម្មនោះផ្ទាល់ភ្នែកតែម្តង។

អត្ថបទទាក់ទង

កីឡាករ Leicester ទៅចូលរួមពិធីបុណ្យសព លោក Vichai នៅបាងកក

កូនប្រុសលោក Vichai សន្យាបន្តកេរដំណែលរបស់ឪពុកលើការដឹកនាំ Leicester

បើតាមការផ្សាយរបស់ទីភ្នាក់ងារព៍រ៌មាន AFP អ្នកចាំទីសញ្ជាតិដាណឺម៉ាកវ័យ ៣២ ឆ្នាំរូបនេះបានលើកឡើងដូច្នេះនៅក្រោយពី Leicester យកឈ្នះ Cardiff City ក្នុងក្របខណ្ឌ Premier League នៅចុងសប្តាហ៍កន្លងទៅដែលជាការប្រកួតដំបូងបន្ទាប់ពីហេតុករណ៍ធ្លាក់ឧទ្ធម្ភាគចក្រកាលពីថ្ងៃទី២៧ ខែតុលា។

Schmeichel រៀបរាប់ថា ភ្លាមៗក្រោយឧទ្ធម្ភាគចក្រធ្លាក់រូបគេបានរត់សំដៅទៅទីនោះ តែត្រូវប៉ូលិសរារាំងព្រោះយន្តហោះកំពុងត្រូវភ្លើងឆាបឆេះខ្លាំង។

«ខ្ញុំស្ថិតនៅលើទីលានហើយខ្ញុំបានលើកដៃលាគាត់ (លោក Vichai)»។ អ្នកចាំទីដៃស្អិតរបស់ Leicester និយាយបែបនេះមុនពេលឡើងយន្តហោះទៅចូលរួមក្នុងកម្មវិធីបុណ្យសព លោក Vichai Srivaddhanaprabha នៅទីក្រុងបាងកក ប្រទេសថៃ ជាមួយគ្រូបង្វឹក និងកីឡាករមួយចំនួនទៀត។

«ខ្ញុំបានឃើញហេតុការណ៍កើតឡើងផ្ទាល់ភ្នែក។ អ្វីដែលកើតឡើងនោះវាកំពុងស្ថិតនៅជាមួយខ្ញុំ ហើយវាមិនមែនជាការចងចាំល្អនោះទេ»។ Schmeichel រៀបរាប់ទាំងទឹកភ្នែក ប៉ុន្តែរូបគេបានសរសើរក្លិបនេះថាជាក្លិបដ៏អស្ចារ្យ ហើយកូនក្រុមសុទ្ធតែទទួលបានការគាំទ្រដែលពួកគេត្រូវការ។

Kasper Schmeichel ដែលជាកូនប្រុសរបស់វីរបុរស Manchester United លោក Peter Schmeichel បានចូលរួមជាមួយក្លិបរហស្សនាមគញ្ជ្រោងនៅឆ្នាំ ២០១១ ក្រោយមួយឆ្នាំបន្ទាប់ពីលោក Vichai ដែលជាសេដ្ឋីលំដាប់ទី៥ នៅប្រទេសថៃ បានទិញក្លិបនេះនៅឆ្នាំ២០១០។ Schmeichel បានដើរតួនាទីដ៏សំខាន់ដើម្បីនាំក្រុមឈ្នះជើងឯក Premier League ជាលើកដំបូងក្នុងប្រវត្តិសាស្ត្រក្លិប ក្នុងឆ្នាំ ២០១៦។

ក្នុងជំនួបដែល Leicester យកឈ្នះ Cardiff ១-០ កាលពីចុងសប្រាហ៍ រូបគេបានសារភាពថាមានអារម្មណ៍មិននឹងនរនោះទេអំឡុងពេលកំដៅសាច់ដុំមុនការប្រកួតនោះ៕