អន្តរជាតិ
លោក ម៉ាក្រុង៖ អឺរ៉ុបត្រូវការកងទ័ពដើម្បីការពារខ្លួនប្រឆាំងរុស្ស៊ី ចិន និងអាមេរិក
× ប្រធានាធិបតីបារាំង អេម៉ានុយអែល ម៉ាក្រុង នៅថ្ងៃទី៦ ខែវិច្ឆិកា បានអំពាវនាវជាថ្មីទៀតឲ្យបង្កើត «កម្លាំងទ័ពអឺរ៉ុបពិតប្រាកដមួយ» ដើម្បីការពារខ្លួន។ លោក ម៉ាក្រុង លើកឡើងបែបនេះក្នុងកិច្ចសម្ភាសមួយ ស្របពេលទ្វីបអឺរ៉ុបប្រារព្ធពិធីខួបទី១០០ឆ្នាំ នៃការបញ្ចប់សង្គ្រាមលោកលើកទី១ រយៈពេលមួយសប្ដាហ៍។ បើតាមលោក ម៉ាក្រុង រុស្ស៊ី ចិន និងសូម្បីតែអាមេរិកផងនោះ សុទ្ធតែអាចគំរាមកំហែងសន្តិសុខរបស់អឺរ៉ុប។
ការបង្កើតទ័ពអឺរ៉ុប នៅតែស្ថិតក្នុងក្ដីស្រមៃរបស់ប្រធានាធិបតីបារាំង អេម៉ានុយអែល ម៉ាក្រុង ដដែល។ តាំងតែឡើងកាន់តំណែងនៅឆ្នាំ២០១៧ មកនោះ លោក ម៉ាក្រុង ចិញ្ចឹមចិត្តចង់ឃើញអឺរ៉ុបមានសមត្ថភាពការពារខ្លួន និងកាត់បន្ថយការពឹងផ្អែកលើអានុភាពយោធារបស់អាមេរិក។ អ្វីគួរកត់សម្គាល់នោះ លោក ម៉ាក្រុង ចាត់ទុកអាមេរិកជាការគំរាមដូចរុស្ស៊ីដែរ ខណៈលោកប្រធានាធិបតី ដូណាល់ ត្រាំ ទើបប្រកាសថា អាមេរិកនឹងដកខ្លួនចេញពីសន្ធិសញ្ញាហាមឃាត់នុយក្លេអ៊ែរចម្ងាយធម្យមជាមួយរុស្ស៊ី។
ក្នុងកិច្ចសម្ភាសជាមួយវិទ្យុ Europe 1 លោក ម៉ាក្រុង និយាយថា អឺរ៉ុបត្រូវការការពារខ្លួនពីចិន រុស្ស៊ី និងអាមេរិក។ ជុំវិញការដើរចេញរបស់អាមេរិក INF ជាមួយរុស្ស៊ីក្នុងទសវត្សរ៍ឆ្នាំ១៩៨០ ដែលជួយដោះស្រាយវិបត្តិមីស៊ីលនៅអឺរ៉ុបនោះ ប្រធានាធិបតីបារាំងរូបនេះអះអាងថា អឺរ៉ុប និងសន្តិសុខរបស់ខ្លួន គឺជាជនរងគ្រោះ ហើយដែលតម្រូវឲ្យអឺរ៉ុបមានកងទ័ពផ្ទាល់ខ្លួនដ៏ពិតប្រាកដ បើចង់ការពារខ្លួនពីការគំរាមទាំងឡាយ។
ដោយហៅរុស្ស៊ីជាការគំរាមកំហែងក្បែរផ្ទះរបស់ខ្លួននោះ មេដឹកនាំបារាំងវ័យក្មេងរូបនេះរឹតតែចង់ឲ្យអឺរ៉ុបមានយោធាផ្ទាល់ខ្លួនជាមួយអធិបតេយ្យកាន់តែធំទៅទៀត ជាជាងរង់ចាំទ័ពអាមេរិកមកជួយនោះ។ បើតាមទីភ្នាក់ងារព័ត៌មាន AFP លោក ម៉ាក្រុង ហៅសន្តិភាពនៅអឺរ៉ុបជារឿងមិនទៀងទាត់ ព្រោះមានការលូកលាន់សឹងគ្រប់ទិសទី ព្រមគ្នានឹងការកកូរកកាយជាច្រើនលើកច្រើនសារលើតម្លៃប្រជាធិបតេយ្យផង។
តាមពិតទៅ កាលពីឆ្នាំមុន អឺរ៉ុបបានបញ្ចេញកញ្ចប់ថវិការាប់ពាន់លានដុល្លាររួចហើយដើម្បីអភិវឌ្ឍសមត្ថភាពយោធាក្នុងចំណោមរដ្ឋសមាជិករបស់ខ្លួន។ មូលនិធិរួមនេះ ក៏ដាក់គោលដៅលើកតម្កើងឯករាជ្យជាយុទ្ធសាស្ត្ររបស់ទ្វីបមួយនេះដែរ។ ក្រុងប៉ារីសក៏បានដឹកនាំយុទ្ធនាការបង្កើតកម្លាំង៩ប្រទេស ដែលមានសមត្ថភាពចូលរួមក្នុងប្រតិបត្តិការយោធារួមគ្នា ការជម្លៀសខ្លួនពីតំបន់សង្គ្រាម និងការផ្ដល់ជំនួយមនុស្សធម៌ផង។
ការលើកឡើងរបស់លោក ម៉ាក្រុង ធ្វើឡើង ខណៈប្រធានាធិបតីបារាំងរូបនេះត្រៀមស្វាគមន៍មេដឹកនាំពិភពលោកជាច្រើនប្រទេសដើម្បីរំឭកខួបទី១០០ ថ្ងៃចុះហត្ថលេខាបញ្ចប់សង្គ្រាមលោកលើកទី១ ដែលគ្រោងធ្វើនៅចុងសប្ដាហ៍នេះ។ លោក ត្រាំ និងប្រធានាធិបតីរុស្ស៊ី វ៉ា្លឌីមៀ ពូទីន ក៏មានវត្តមានក្នុងពិធីដ៏ធំមួយនេះដែរ៕
Tag:
បារាំង
អាមេរិក
រុស្ស៊ី
អេម៉ានុយអែល ម៉ាក្រុង
© រក្សាសិទ្ធិដោយ thmeythmey.com