ប្រទេសតំបន់មេគង្គចេញសេចក្តីប្រកាសរួមក្រុងភ្នំពេញលើការប្រឆាំងឱសថក្លែងក្លាយ

ជាតិ

សុខភាព

ប្រទេសតំបន់មេគង្គចេញសេចក្តីប្រកាសរួមក្រុងភ្នំពេញលើការប្រឆាំងឱសថក្លែងក្លាយ

06, Nov 2018 , 5:46 pm

រូបភាព

ដោយ:

ភ្នំពេញ៖ ប្រទេសតំបន់ទន្លេមេគង្គទាំង៦ បានទទួលស្គាល់ថា ការចរាចរឱសថ ក្លែងក្លាយ អន់គុណភាព និងគ្មានច្បាប់អនុញ្ញាត បានរីករាលដាលពេញពិភពលោក និងប្រកាសនឹងរួមគ្នាប្រយុទ្ធប្រឆាំងឱសថខុសច្បាប់ទាំងនេះ។ នេះបើតាមសេចក្ដីប្រកាសរួមក្រុងភ្នំពេញ ក្រោយបញ្ចប់កិច្ចប្រជុំដែលប្រព្រឹត្តទៅនៅថ្ងៃទី៥ និងទី៦ខែវិច្ឆិកា។

អត្ថបទទាក់ទង

សម្ដេច ហ៊ុន សែន៖ ឱសថក្លែងក្លាយ កំពុងបង្កគ្រោះថ្នាក់ដល់សុខភាព និងការអភិវឌ្ឍសេដ្ឋកិច្ចជាតិ

បើតាមសេចក្ដីប្រកាសរួមក្រុងភ្នំពេញនេះ ប្រទេសទាំង៦នេះ បានចាត់ទុកការរីករាលដាលនៃឱសថក្លែងក្លាយ គុណភាពអន់ និងគ្មានច្បាប់អនុញ្ញាត គឺជាហានិភ័យដល់សុខភាពដែលមិនអាចមើលរំលងបាន។ ប្រទេសទាំងនេះ រួមមាន កម្ពុជា ថៃ ឡាវ វៀតណាម មីយ៉ានម៉ា និងចិន។

«យើងបានសង្កត់ធ្ងន់អំពីតថភាពមួយដែលមិនអាចប្រកែតបាន គឺការផលិត និងលក់ដូរផលិតផលសុខាភិបាលក្លែងក្លាយ គុណភាពអន់ និងគ្មានច្បាប់អនុញ្ញាតពិតជាបានបង្កគ្រោះថ្នាក់ដល់សុខភាពសាធារណៈ ប៉ះពាល់សេដ្ឋកិច្ច និងការកសាងនីតិរដ្ឋ»។ សេចក្ដីប្រកាសរួមបានបញ្ជាក់ដូច្នេះ។

សេចក្ដីប្រកាសរួមនេះ គូសបញ្ជាក់ថា បញ្ហានេះឱសថក្លែងក្លាយនេះ ទាមទារវិធានការជាបន្ទាន់ដើម្បីប្រយុទ្ធប្រឆាំងការជួញដូរផលិតផលនេះ តាមរយៈការផ្លាស់ប្ដូរព័ត៌មាន ការសម្របសម្រួលពីរដ្ឋមួយទៅរដ្ឋមួយ ក៏ដូចជាតំបន់ទាំងមូលស្របតាមស្មារតីនៃកិច្ចព្រមព្រៀងស្ដីពីបទល្មើសសុខាភិបាល។

ប្រទេសទាំង៦នេះ ប្រកាសរួមគ្នាថានឹងបង្កើនការផ្សព្វផ្សាយពីគ្រោះថ្នាក់នៃឱសថក្លែងក្លាយ កសាង និងពង្រឹងការអនុវត្តច្បាប់ពាក់ព័ន្ធ បង្កើនប្រសិទ្ធភាពត្រួតពិនិត្យតាមច្រកព្រំដែន និងពង្រឹងកិច្ចសហការក្នុងតំបន់ ជាដើម។

កិច្ចប្រជុំដ៏ធំមួយនេះ នឹងត្រូវប្រជុំសាជាថ្មីម្ដងទៀតនៅឆ្នាំក្រោយ ដើម្បីតាមដានការវិវឌ្ឍលទ្ធផលសម្រេចបាន ពាន់ព័ន្ធនឹងការប្រយុទ្ធប្រឆាំងផលិតផលឱសថក្លែងក្លាយ៕