ONE Championship
កីឡាអន្តរជាតិ
អន្តរជាតិ
អ្នកកាសែតប្រមាណ២០០នាក់ចូលរួមផ្តិតយកព្រឹត្តិការណ៍ ONE: Heart of The Lion ដោយផ្ទាល់
× សិង្ហបុរី៖ អ្នកសារព័ត៌មានជាតិនិងអន្តរជាតិយ៉ាងច្រើនកុះករបានមកជួបជុំគ្នានៅមជ្ឈមណ្ឌល Marina Bay Sands ក្នុងប្រទេសសិង្ហបុរី ដើម្បីថតរូបនិងយកព័ត៌មានក្នុងសន្និសីទសារព័ត៌មានការប្រកួតគុនចម្រុះ ONE: Heart of The Lion។ ព្រឹត្តិការណ៍ប្រកួតដាក់ទ្រុងដណ្តើមខ្សែក្រវាត់ដ៏ធំមួយនេះ នឹងប្រព្រឹត្តទៅនៅថ្ងៃទី៩ វិច្ឆិកា នាកីឡដ្ឋាន Singapore Indoor Stadium។
អ្នកសារព័ត៌មានមកពីតាមបណ្តាទូរទស្សន៍ កាសែត វេបសាយ និងប្លុកទូទាំងពិភពលោកប្រមាណ២០០នាក់បានចូលរួមថតរូបនិងយកព័ត៌មានក្នុងសន្និសីទសារព័ត៌មានស្តីពីការប្រកួតគុនចម្រុះ NOE: Heart of the Lion នៅរសៀលថ្ងៃទី៧ ខែវិច្ឆិកា នាមជ្ឈមណ្ឌល Marina Bay Sands។ នេះបើតាមការអះអាងរបស់ក្រុមការងាររៀបចំកម្មវិធីសន្និសីទសារព័ត៌មាននេះ។
កម្មវិធីសន្និសីទសារព័ត៌មាននេះបានប្រព្រឹត្តទៅអស់រយៈពេលជិត២ម៉ោង ក្រោយមានការចោទសួរយ៉ាងច្រើនពីអ្នកសារព័ត៌មាន។ ក្នុងឱកាសនោះ ស្ថានប្រដាល់ ONE Championship ក៏បានប្រកាសពីគម្រោងរៀបចំព្រឹត្តិការណ៍កីឡា E-Sport កម្រិតពិភពលោកនៅឆ្នាំ២០១៩ ខាងមុខផងដែរ។
ព្រឹត្តិការណ៍ប្រកួតដាក់ទ្រុងដែលរៀបចំនៅថ្ងៃទី៩ ខែវិច្ឆិកា នាកីឡដ្ឋាន Singapore Indoor Stadium ខាងលើ ជាការប្រកួតដណ្តើមខ្សែក្រវាត់ ដែលជាការជួបគ្នារវាងម្ចាស់ខ្សែក្រវាត់ប្រេស៊ីល Bibiano Fernandes ជាមួយម្ចាស់ខ្សែក្រវាត់មកពីហ្វីលីពីន Kevin Belingon។ សម្រាប់ការប្រកួតនេះ ក៏មានកីឡាករកម្ពុជាចូលរួមផងដែរ គឺកីឡាករ មាស ម៉ើ ដែលត្រូវប្រកួតតទល់ជាមួយកីឡាករកូនកាត់ឥណ្ឌូណេស៊ី-ហូឡង់ Anthony "The Archangel" Engelen លើប្រភេទទម្ងន់ស្រាល។
ក្រៅពីពីរគូខាងលើ ក៏មានការប្រកួតចំនួន១២គូផ្សេងទៀតផងដែរ ក្នុងនោះកីឡាករជើងខ្លាំងម្ចាស់ផ្ទះសិង្ហបុរី Christian Lee ត្រូវតតាំងជាមួយជើងខ្លាំងជប៉ុន Kazuki Tokudome ដែលគូនេះត្រូវបានគេចាត់ទុកជាគូពិសេសបន្ទាប់ពីគូដណ្តើមខ្សែក្រវាត់ប្រចាំព្រឹត្តិការណ៍នេះ។ ការប៉ះគ្នារវាងកីឡាកររុស្ស៊ី Giorgio Petrosyan ជាមួយកីឡាករថៃ Sorgraw Petchyindee Academy នឹងក្លាយជាគូជក់ចិត្តផងដែរ។ បន្ថែមលើនេះ មានការប្រកួតចំនួន១០គូផ្សេងទៀត៕
© រក្សាសិទ្ធិដោយ thmeythmey.com