ជាតិ
រដ្ឋបាលលោក ដូណាល់ ត្រាំ សាទរប្រជាជនកម្ពុជានាឱកាសខួបឯករាជ្យលើកទី ៦៥
× រដ្ឋមន្ត្រីការបរទេសលោក ម៉ៃ ប៉ុមប៉េអូ បានអបអរសាទរប្រជាជនកម្ពុជាក្នុងការឱកាសនៃការរៀបចំខួបលើកទី ៦៥ នៃបុណ្យឯករាជ្យជាតិថ្ងៃ ៩ ខែវិច្ឆិកា។
«តំណាងឲ្យរដ្ឋបាលប្រធានាធិបតី ដូណាល់ ត្រាំ ខ្ញុំសូមអបអរសាទរដល់ប្រជាជនកម្ពុជាក្នុងខួបលើកទី ៦៥ នៃបុណ្យឯករាជ្យថ្ងៃ៩ខែ វិច្ឆកា»។ នេះជាសម្តីរបស់ប្រមុខការទូតអាមេរិកក្នុងសេចក្តីប្រកាសព័ត៌មានចុះថ្ងៃ ៧ ខែវិច្ឆិកា។
ក្រៅពីអបអរសាទរថ្ងៃបុណ្យឯករាជ្យកម្ពុជា ប្រមុខការទូតអាមេរិក ប៉ុមប៉េអូ បានកត់សម្គាល់ផងដែរពីមិត្តភាពរឹងមាំរវាងប្រជាជនកម្ពុជា និងអាមេរិកដែលនាំប្រយោជន៍ច្រើនដល់ប្រទេសទាំងពីរនោះ។
ទាក់ទិននឹងចំណុចនេះ លោក ប៉ុមប៉េអូ បានលើកឡើងថា រៀងរាល់ឆ្នាំ ភ្ញៀវទេសចរអាមេរិកយ៉ាងតិច ១៧ ម៉ឺននាក់បន្តមកស្គាល់សម្រស់ និងប្រវត្តិសាស្ត្ររបស់កម្ពុជាតាមរយៈដំណើរកម្សាន្តរបស់ពួកគេ។ លើសពីនេះទៀត លោកក៏បានកោតសរសើរពីការរួមចំណែកយ៉ាងក្រាស់ក្រែលរបស់សហគមន៍ប្រជាជនអាមេរិកដើមកំណើតកម្ពុជាក្នុងសង្គមអាមេរិក។
ប្រមុខការទូតអាមេរិករូបនេះបន្ថែមថា អាមេរិកក៏ចែករម្លែកក្តីសង្ឃឹមរបស់ខ្លួនជាមួយកម្ពុជាចំពោះការអភិវឌ្ឍទៅមុខនៃសង្គមមួយដែលមានសេរីភាព ប្រធិបតេយ្យ យុត្តិធម៌ និងវិបុលភាពផងដែរ។
កម្ពុជាទទួលបានឯករាជ្យទាំងស្រុងពីម្ចាស់អាណានិគមបារាំងថ្ងៃ ៩ ខែវិច្ឆិកាក្នុងឆ្នាំ ១៩៥៣ ក្រោយស្ថិតក្រោមការគ្រប់គ្រងរបស់បារាំងអស់ ៩០ឆ្នាំ។
សូមបញ្ជាក់ថា កម្ពុជា និងសហរដ្ឋអាមេរិកបានបង្កើតទំនាក់ទំនងការទូតរួមគ្នាតាំងពីឆ្នាំ ១៩៥០ មកម្ល៉េះ។ ចាប់ពីការបោះឆ្នោតឆ្នាំ ១៩៩៣ មកទំនាក់ទំនងរវាងប្រជាជាតិទាំងពីរមានការរីកចម្រើនគួរឲ្យកត់សម្គាល់ជាពិសេសចំណងទំនាក់ទំនងរវាងប្រជាជន និងប្រជាជន៕
Tag:
ដូណាល់ ត្រាំ
អាមេរិក
ម៉ៃ ប៉ុមប៉េអូ
© រក្សាសិទ្ធិដោយ thmeythmey.com