ក្រសួងវប្បធម៌លើកទឹកចិត្តគ្រប់បែបយ៉ាងដល់ផលិតករជប៉ុនចង់ផលិតកុននៅកម្ពុជា

អន្តរជាតិ

ក្រសួងវប្បធម៌លើកទឹកចិត្តគ្រប់បែបយ៉ាងដល់ផលិតករជប៉ុនចង់ផលិតកុននៅកម្ពុជា

08, Nov 2018 , 10:39 pm

រូបភាព

ដោយ: ប៉ូ សាគុន

ភ្នំពេញ៖ ក្នុងឱកាសបើកមហោស្រពភាពយន្តជប៉ុនលើកទី៤ កាលពីយប់ថ្ងៃទី៧ ខែវិច្ឆិកា ឆ្នាំ២០១៨ នៅសាលមហោស្រពចតុមុខ រដ្ឋមន្ត្រីក្រសួងវប្បធម៌និងវិចិត្រសិល្បៈ អ្នកស្រី ភឿង សកុណា បានជំរុញ និងលើកទឹកចិត្តគ្រប់បែបយ៉ាងដល់ផលិតករជប៉ុន ដែលមានបំណងចង់មកផលិតភាពយន្តនៅកម្ពុជា។

អ្នកស្រី ភឿង សកុណា បានបញ្ជាក់ក្នុងឱកាសបើកមហោស្រពភាពយន្តជប៉ុនថា ការរៀបចំឱ្យមានមហោស្រពភាពយន្តនេះ គឺជាមធ្យោបានទំនាក់ទំនងផ្នែកសិល្បៈដ៏ល្អសម្រាប់ឱ្យផលិតករកម្ពុជា និងជប៉ុន បានចែករំលែកបទពិសោធន៍បច្ចេកទេសថតកុនឱ្យគ្នាទៅវិញទៅមក។ អ្នកស្រីបន្ថែមថា ជប៉ុនគឺជាប្រទេសដែលតែងតែជួយកម្ពុជាក្នុងគ្រាអាសន្ត និងជួយលើគម្រោងផ្សេងជាច្រើន មានទាំងគម្រោងជួសជុលប្រាសាទជាដើម។

អ្នកស្រី ភឿង សកុណា បញ្ជាក់៖ «ជប៉ុនគឺជាមិត្តដ៏ល្អកម្ររកបានរបស់កម្ពុជា ដែលតែងតែជួយកម្ពុជាក្នុងគ្រាអាសន្ត។ មហោស្រពភាពយន្តនេះ គឺជាមធ្យោបាយជួយឱ្យវិស័យសិល្បៈរវាងប្រទេសទាំងពីរកាន់តែមានទំនាក់ទំនងជិតស្និត។ ក្រសួងវប្បធម៌លើកទឹកចិត្ត និងសម្របសម្រួលគ្រប់បែបយ៉ាង ដល់ផលិតករជប៉ុនដែលមានបំណងមកផលិតភាពយន្តនៅកម្ពុជា ដើម្បីជាការរួមចំណែកផ្សព្វផ្សាយពីសក្ដានុពលធនធានធម្មជាតិនៅកម្ពុជា ទៅកាន់ពិភពលោក។

ឯកអគ្គរាជទូតវិសាមញ្ញ និងពេញសមត្ថភាពរបស់ជប៉ុនប្រចាំកម្ពុជាលោក ហូរីណូអ៊ុជិ ហ៊ីដេហ៊ីសា បានថ្លែងអំណរគុណដល់ក្រសួងវប្បធម៌និងវិចិត្រសិល្បៈ មជ្ឈមណ្ឌលសហប្រតិបត្តិការកម្ពុជាជប៉ុន រួមទាំងក្រុមនិស្សិតស្ម័គ្រចិត្តទាំងអស់ សម្រាប់ការចូលរួមចំណែកសហការរៀបចំមហោស្រពនេះឡើង។

មហោស្រពភាពយន្តជប៉ុនចាប់ផ្ដើមពីថ្ងៃទី៨ដល់ថ្ងៃទី១១ ខែវិច្ឆិកា ឆ្នាំ២០១៨ ដែលមានបញ្ចាំងភាពយន្តចម្រុះចំនួន១១រឿងនៅរោងភាពយន្ត Major Cineplex AEON1 និងរោងភាពយន្ត Legend សាខាទួលគោកនៅរាជធានីភ្នំពេញ។ ចាប់ពីថ្ងៃទី១៦ដល់ថ្ងៃទី១៨ ខែវិច្ឆិកា ឆ្នាំ២០១៨ នៅរោងភាពយន្ត Major Cineplex ខេត្តសៀមរាប។ ភាពយន្តទាំងនោះឆ្លុះបញ្ចាំងពីជីវភាពរស់នៅរបស់ប្រជាជន សង្គម និងវប្បធម៌ជប៉ុន៕