ជាតិ
កំពង់ឆ្នាំង៖ ពលរដ្ឋ រស់នៅលើទឹក៧៥០ផ្ទះទៀត ដែលមិនទាន់បម្លាស់ទីទៅលើគោក ផ្ទះលើទឹក មួយកន្លែងនៅខេត្តកំពង់ឆ្នាំង (Credit)
× ភ្នំពេញ៖ ប្រជាពលរដ្ឋ ដែលរស់នៅក្នុងផ្ទះបណ្តែតទឹកទូទាំងខេត្តកំពង់ឆ្នាំងមានសរុប ៤,៣៨៥គ្រួសារ។ ក្នុងនោះ នៅមាន៧៥០ផ្ទះទៀតទេ ដែលមិនទាន់មករស់នៅលើគោក។ លោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង បានអះអាងប្រាប់អ្នកសារព័ត៌មានថ្មីៗនាថ្ងៃទី៨ខែវិច្ជិកា ថា ដោយសារតែផ្ទះទាំងនេះ ជាប់មានបែលចិញ្ចឹមត្រី ទើបមិនអាចបម្លាស់ទៅលើគោគបាន។
លោកបានបន្ត តាមការយល់ព្រម និងសហការពីពលរដ្ឋរស់នៅលើទឹកទាំងនោះ ជំហានបន្ទាប់អាជ្ញាធរ នឹងរៀបចំ៧៥០ផ្ទះដែលនៅលើទឹកនេះ ដោយឲ្យអ្នកជំនាញខាងកសិកម្មជាអ្នករៀបចំ។ លោកបាននិយាយដូច្នេះ៖«មុនថ្ងៃប្រារព្ធពិធីបុណ្យទន្លេក្នុងខែមីនា ឆ្នាំ២០១៩ ៧៥០ផ្ទះទាំងនោះ នឹងលែងមានវត្តមានមនុស្សរស់នៅលើទឹកទៀតហើយ គឺមានតែបែលចិញ្ចឹមត្រីប៉ុណ្ណោះ»។
ដោយឡែក ពលរដ្ឋដែលបានឡើងគោកទាំងប៉ុន្មាន ត្រូវបានអាជ្ញាធររៀបចំផ្ទះឲ្យស្នាក់នៅជាបណ្តោះអាសន្ន ដែលមានចំណាយពី៥០ ឬ១០០ម៉ែត្រ ពីទន្លេ ក្នុងតំបន់គោលដៅទាំង៦ ក្នុងខេត្ត។
លោកបានឲ្យដឹងទៀតថា ក្រោយពីមានការរៀបចំនូវប្រព័ន្ធទឹក-ភ្លើង និងប្រព័ន្ធធារាសាស្ត្រផ្សេងៗ នៅកន្លែងស្នាក់នៅអចិន្ត្រយ៍ រួចហើយ ប្រជាពលរដ្ឋទាំងនោះ នឹងត្រូវបម្លាស់ទីម្តងទៀត ពោល ទៅរស់នៅតែម្តង។
អភិបាលរងរូបនេះ បានបញ្ជាក់ថា « ពលរដ្ឋដែលរស់នៅលើទឹកអស់ ដែលត្រូវបានបំលាស់ទីមករស់នៅលើគោកវិញនេះ គឺមិនបានបង្ខិតបង្ខំអ្វីឡើយពីអាជ្ញាធរ ដោយពួកគាត់ស្មោះចិត្ត និងឯកភាពគ្នា ក្នុងការបំលាស់ទីពីកន្លែងចាស់ ទៅកន្លែងថ្មី។ ហើយពួកគាត់ក៏បានដឹងខ្លួនឯងច្បាស់ថា នឹងត្រូវផ្លាស់ទីលំនៅ តាមរយៈការផ្សព្វផ្សាយផែនការ៥ឆ្នាំ២០១៥-២០១៩ របស់អាជ្ញាធរ នៃការផ្លាស់ទីអ្នករស់នៅលើផ្ទះបណ្ដែតទឹក ទូទាំងខេត្តកំពង់ឆ្នាំង ឲ្យទៅរស់នៅលើដីគោក ដើម្បីបរិស្ថានឡើងវិញ»។
គោលបំណងដែលឲ្យពលរដ្ឋរស់នៅលើផ្ទះបណ្តែតទឹក បំលាស់ទីមករស់នៅលើគោកវិញ មាន៣ចំណុចសំខាន់ៗ រួមមាន ១. ការស្តារបរិស្ថានឡើង ជាចំណុចស្នូរនៃការផ្លាស់ទីរបស់ពលរដ្ឋទាំងនោះ។ ២. ដើម្បីមានភាពងាយស្រួលក្នុងការគ្រប់គ្រងពលរដ្ឋរស់នៅក្នុងផ្ទះទឹក និងទី៣ ដើម្បីឲ្យខេត្តកំពង់ឆ្នាំង ក្លាយជាតំបន់ទេសចរណ៍ធម្មជាតិ ព្រោះវាជាតំបន់ដែលភ្ញៀវទេសចរផ្លូវទឹក ឆ្លងកាត់ពីភ្នំពេញ ទៅសៀមរាប និងពីសៀមរាប មកភ្នំពេញ។ នេះបើតាមអភិបាលរងខេត្តកំពង់ឆ្នាំងនេះ ដដែល។
តាមការប្រាប់ឲ្យដឹងរបស់លោក ស៊ុន សុវណ្ណរិទ្ធ ពលរដ្ឋរស់នៅក្នុងផ្ទះបណ្តែតទឹកទូទាំងខេត្តកំពង់ឆ្នាំងមានសរុប ៤,៣៨៥គ្រួសារ។ ក្នុងនោះ ពលរដ្ឋវៀតណាម មាន២១៩៧គ្រួសារ និង២១៨៨គ្រួសារទៀត ជាពលរដ្ឋខ្មែរ-ឥស្លាម៕
Tag:
ផ្ទះបណ្តែតទឹក
កំពង់ឆ្នាំង
© រក្សាសិទ្ធិដោយ thmeythmey.com