អន្តរជាតិ
លោក ស៊ី ជិនភីង ប្រាប់អាមេរិកឲ្យគោរពផ្លូវអភិវឌ្ឍន៍របស់ចិន ប្រធានាធិបតីចិន ស៊ី ជិនភីង និងអតីតរដ្ឋមន្ត្រីការបរទេសអាមេរិក ហេនរី គីស៊ីងគ័រ (រូបភាព Xinhua)
× ប្រធានាធិបតីចិន ស៊ី ជិនភីង នៅថ្ងៃទី៨ ខែវិច្ឆិកា បានប្រាប់ឲ្យអាមេរិកគោរពការសម្រេចចិត្តរបស់ចិនក្នុងការជ្រើសរើសផ្លូវដើរដើម្បីការអភិវឌ្ឍរបស់ខ្លួន។ លោក ស៊ី និយាយបែបនេះនាជំនួបជាមួយអតីតរដ្ឋមន្ត្រីការបរទេសអាមេរិក ហេនរី គីស៊ីងគ័រ(Henry Kissinger) ក្នុងទីក្រុងប៉េកាំង។ ចំពោះមុខលោក គីស៊ីងគ័រ ប្រមុខដឹកនាំចិនរូបនេះក៏បង្ហាញជំហរចង់ឃើញទំនាក់ទំនងចិន និងអាមេរិកដែលគ្មានការប្រឈមមុខ និងបញ្ហា តែមានការគោរពគ្នាទៅមក។
ទោះជាឡើងចុះនិងបត់បែនយ៉ាងណា ប្រធានាធិបតីចិន ស៊ី ជិនភីង ចាត់ទុកទំនាក់ទំនងរវាងចិន និងអាមេរិក នៅតែស្ថិតក្នុងដំណើរការល្អប្រសើរដដែលក្នុងរយៈពេលបួនទសវត្សរ៍មកនេះ។ នាជំនួបជាមួយលោក ហេនរី គីស៊ីងគ័រ នៅថ្ងៃទី៨ ខែវិច្ឆិកា លោក ស៊ី និយាយថា ចិននៅតែចង់ដោះស្រាយបញ្ហាតាមរយៈការចរចា ប៉ុន្តែអាមេរិកក៏ត្រូវគោរពចិនដែរ។
មេដឹកនាំចិននិយាយបែបនេះ ខណៈលោកត្រៀមជួបប្រធានាធិបតីអាមេរិក ដូណាល់ ត្រាំ នៅអាហ្សង់ទីនដើម្បីដោះស្រាយជម្លោះពាណិជ្ជកម្ម។ មកទល់ពេលនេះ សំណុំរឿងនេះបានធ្វើឲ្យទំនាក់ទំនងរវាងមហាអំណាចពិភពលោកទាំងពីរល្អក់កករខ្លាំង និងមិនទាន់មានច្រកចេញនៅឡើយ ទោះជាមានការចរចាមួយចំនួនក្ដី។ នៅក្រុងវ៉ាស៊ីនតោន មន្ត្រីអាមេរិកខ្លះក៏មិនពេញចិត្តនយោបាយរបស់ចិន ដែលកេងចំណេញប្រយោជន៍ពីក្រុមហ៊ុនបរទេស។
បើតាមទីភ្នាក់ងារព័ត៌មានរដ្ឋចិន Xinhua លោក ស៊ី ទទួលស្គាល់ការមិនពេញចិត្តរបស់អាមេរិក តែចាត់ទុកជារឿងអវិជ្ជមានទៅវិញ។ ត្រង់ចំណុចនេះ ប្រធានាធិបតីចិនអះអាងថា ប្រទេសទាំងពីរគួរមានការស្វែងយល់ឲ្យត្រឹមត្រូវពីប្រយោជន៍យុទ្ធសាស្ត្ររបស់ប្រទេសនីមួយៗ ឯចិនវិញនឹងបន្តដើរលើផ្លូវអភិវឌ្ឍដោយសន្តិភាព ក៏ដូចជាបន្តការប្ដេជ្ញាចិត្តស្ថាបនាទំនាក់ទំនងទ្វេភាគីដែលគ្មានជម្លោះ ការប្រឈមមុខ ការគោរពគ្នាទៅមក និងកិច្ចសហប្រតិបត្តិការឈ្នះ-ឈ្នះ។
ឆ្លើយតបពាក្យរិះគន់ពីអាមេរិក លោក ស៊ី ដែលជាអគ្គលេខាធិការគណៈកម្មាធិការមជ្ឈិមបក្សកុម្មុយនីស្តចិនដែរនោះ ក៏អំពាវនាវឲ្យអាមេរិកគោរពសិទ្ធិរបស់ចិនក្នុងការអភិវឌ្ឍតាមផ្លូវដែលខ្លួនបានជ្រើសរើស និងគោរពសិទ្ធិ និងផលប្រយោជន៍ចិន។ លោកបន្តថា ភាគីទាំងពីរគួរសម្រុះសម្រួលគ្នា និងរួមគ្នារក្សាទំនាក់ទំនងល្អប្រសើរនេះ។ ចំណែកឯជំហរចិន ត្រូវលោក ស៊ី អះអាងថា ចិនមានឆន្ទៈដោះស្រាយបញ្ហាតាមរយៈការជជែកដោយមិត្តភាព។
ទំនាក់ទំនងរវាងចិន និងអាមេរិក ហាក់ល្អបន្តិចក្រោយការជជែកតាមទូរសព្ទរវាងលោក ស៊ី និងលោក ត្រាំ ដែលបានបើកផ្លូវដល់ជំនួបនៅប៊ុយណូស៊ែ។ ជាសញ្ញាកាន់តែល្អនោះ មន្ត្រីជាន់ខ្ពស់ផ្នែកសន្តិសុខរបស់ចិន និងអាមេរិក នឹងជួបគ្នានៅវ៉ាស៊ីនតោននៅក្នុងសប្ដាហ៍នេះ។ យ៉ាងណាក្ដី ជម្លោះពាណិជ្ជកម្ម ទំនងជាស្ថិតនៅតែក្ដៅដដែល មិនថមថយឡើយ ទោះជាមានការជួបគ្នាតាំងពីថ្នាក់មេដឹកនាំជាន់ខ្ពស់រហូតដល់ថ្នាក់រដ្ឋមន្ត្រីក្ដី៕
Tag:
ចិន
អាមេរិក
ស៊ី ជិនភីង
ស៊ី ជិនភីង
© រក្សាសិទ្ធិដោយ thmeythmey.com