កីឡាអន្តរជាតិ
អន្តរជាតិ
Floyd មិនដឹងថាខ្លួនត្រូវប្រកួតជាមួយកីឡាករជប៉ុន Nasukawa នៅចុងឆ្នាំនេះឡើយ
× អ្នកប្រដាល់ជើងឯកពិភពលោក Floyd Mayweather នៅថ្ងៃទី ៧ ខែវិច្ឆិកា បានប្រកាសច្រានចោលការប្រកួតទល់នឹងអ្នកប្រដាល់សេរីជប៉ុន (Kickboxer) កីឡាករ Tenshin Nasukawa ដោយអះអាងថាខ្លួនត្រូវគេបោកបញ្ឆោតថាបានយល់ព្រមសម្រាប់ការប្រកួតនេះ។ នេះបើតាមការផ្សាយរបស់ទីភ្នាក់ងារព័ត៌មាន AFP។
មានការចុះផ្សាយលើបណ្តាញសង្គមថា អ្នកប្រដាល់មិនស្គាល់ចាញ់របស់អាមេរិកនេះ នឹងត្រូវតទល់ជាមួយ Nasukawa ថ្ងៃទី ៣១ ខែធ្នូ ឆ្នាំ ២០១៨ នៅក្នុងទីក្រុង Saitama ប្រទេសជប៉ុន ដើម្បីអបអរឱកាសឆ្លងចូលឆ្នាំថ្មី។
ប៉ុន្តែជុំវិញព័ត៌មានខាងលើ Mayweather បានសរសេរនៅលើប្រព័ន្ធផ្សព្វផ្សាយ Instagram ថា៖«ខ្ញុំចង់ឲ្យមានការច្បាស់លាស់ថាខ្ញុំ Floyd Mayweather មិនដែលបានព្រមព្រៀងជាមួយនឹងការប្រកួតផ្លូវការណាមួយជាមួយ Tenshin Nasukawa នោះទេ»។
ម្ចាស់ខ្សែក្រវាត់ពិភពលោក ៥ប្រភេទទម្ងន់ វ័យ៤១ឆ្នាំរូបនេះ បាននិយាយថាលោកបានធ្វើដំណើរទៅប្រទេសជប៉ុនកាលពីសប្តាហ៍មុនដើម្បីចូលរួមការប្រកួតលក្ខណៈឯកជនទល់នឹង Nasukawa ដោយមិនផ្សាយតាមទូរទ្សន៍ សម្រាប់តែក្រុមអ្នកគាំទ្រដែលមានទ្រព្យសម្បត្តិស្តុកស្តម្ភប៉ុណ្ណោះ។
Mayweather បានបកស្រាយដូច្នេះថា៖«នៅពេលខ្ញុំទៅដល់សន្និសីទសារព័ត៌មានក្នុងក្រុងតូក្យូកាលពីថ្ងៃចន្ទ ក្រុមរបស់ខ្ញុំនិងខ្ញុំមានការភ្ញាក់ផ្អើលយ៉ាងខ្លាំង។ យើងគួរតែបញ្ឈប់វាភ្លាម។ ខ្ញុំចង់សុំទោសដោយស្មោះទៅអ្នកគាំទ្ររបស់ខ្ញុំចំពោះព័ត៌មានខុសឆ្គងដែលត្រូវបានប្រកាសនៅក្នុងសន្និសីទសារព័ត៌មាននេះ។ ខ្ញុំពិតជាមិនដឹងអ្វីទាំងស្រុងពីការរៀបចំដែលត្រូវបានធ្វើឡើងដោយគ្មានការយល់ព្រមពីខ្ញុំនោះទេ ហើយខ្ញុំពិតជាសោកស្តាយណាស់»។
Floyd Mayweather មានប្រវត្តិប្រកួត៥០ដងមិនស្គាល់ចាញ់ និងមិនធ្លាប់ឡើងសង្វៀនប្រដាល់នៅក្រៅប្រទេសឡើយ។ ដោយឡែកអ្នកប្រដាល់ជប៉ុនដែលទើបមានវ័យ២០ឆ្នាំ ជាកីឡាករលេងគុនចម្រុះ MMA និងមានប្រវត្តិឡើយវាយសេរី២៧លើកមិនដែលចាញ់ដូចគ្នា៕
Tag:
ប្រដាល់
Floyd Mayweather
Tenshin Nasukawa
© រក្សាសិទ្ធិដោយ thmeythmey.com