អន្តរជាតិ
រូបភាព Mehr News Agency
×![]()
ដោយ: តន ចាន់រិទ្ធារ៉ា
ក្រសួងការបរទេសអាមេរិក នៅថ្ងៃទី៨ ខែវិច្ឆិកា បានព្រមានបណ្ដាប្រទេសនៅជុំវិញពិភពលោកកុំឲ្យទទួលកប៉ាល់របស់អ៊ីរ៉ង់នៅកំពង់ផែ ឬអនុញ្ញាតឲ្យចូលក្នុងដែនទឹករបស់ខ្លួនឲ្យសោះ។ ប្រេសិតពិសេសសម្រាប់កិច្ចការអ៊ីរ៉ង់ Brian Hook បញ្ជាក់ថា ទង្វើបំពានណាមួយ អាចបង្កបញ្ហាដាក់ខ្លួនមិនខាន ជាពិសេសបញ្ហាធានារ៉ាប់រ៉ង ខណៈអាមេរិកកំពុងដាក់ទណ្ឌកម្មលើអ៊ីរ៉ង់ទាំងផ្នែកធនាគារ និងការនាំចេញប្រេងឆៅ។
ទណ្ឌកម្មអាមេរិកប្រឆាំងអ៊ីរ៉ង់ឈានចូលជិតមួយសប្ដាហ៍ហើយ។ ដាក់ទណ្ឌកម្មលើអ៊ីរ៉ង់លើកនេះ រដ្ឋបាលប្រធានាធិបតី ដូណាល់ ត្រាំ ចង់ផ្ដាច់ដង្ហើមសេដ្ឋកិច្ចរបស់រដ្ឋមជ្ឈិមបូព៌ាមួយនេះតាមរយៈការបិទការនាំចេញប្រេងឲ្យដល់កម្រិតសូន្យតែម្ដង។ ទោះជាមានប្រទេសចំនួន៨ អាចបន្តទិញប្រេងពីក្រុងតេហេរ៉ង់ក្ដី ក្រុងវ៉ាស៊ីនតោនបានប្រាប់ឲ្យប្រទេសទាំងអស់លើពិភពលោកឈប់ទទួលកប៉ាល់អ៊ីរ៉ង់ បើមិនចង់រងគ្រោះដូចគ្នា។
លោក Brian Hook ប្រេសិតក្រសួងការបរទេសអាមេរិកទទួលបន្ទុកគោលនយោបាយអ៊ីរ៉ង់បានព្រមានថា ការស្វាគមន៍កប៉ាល់ដឹកប្រេងអ៊ីរ៉ង់ ឬឲ្យឆ្លងកាត់ដែនទឹកខ្លួន នឹងនាំគ្រោះថ្នាក់ដាក់ខ្លួន។ នេះក៏ព្រោះតែ ក្រុមហ៊ុនធានារ៉ាប់រងសឹងមួយពិភពលោកឈប់រកស៊ីជាមួយអ៊ីរ៉ង់ព្រោះខ្លាចទណ្ឌកម្មអាមេរិក ដែលការណ៍នេះតម្រូវឲ្យក្រុមហ៊ុនដឹកជញ្ជូនអ៊ីរ៉ង់ទៅប្រើសេវាកម្មក្នុងស្រុកវិញ ហើយក្នុងករណីមានគ្រោះថ្នាក់នោះ ក្រុមហ៊ុនទាំងនោះមិនអាចចេញថ្លៃខូចខាតដែលមានទំហំរាប់ពាន់លានដុល្លារឡើយ។
«គ្រោះថ្នាក់ធ្លាយប្រេងពីកប៉ាល់មានទំហំខូចខាតធ្ងន់ណាស់។ ពីព្រែកជីកស៊ុយអេដល់ច្រកសមុទ្រម៉ាឡាកា និងតំបន់ដទៃ កប៉ាល់ដឹកប្រេងអ៊ីរ៉ង់ប្រៀបដូចជាបំណុលអណ្ដែតមួយអ៊ីចឹង។» នេះជាការលើកឡើងរបស់លោក Hook មុននឹងបន្តព្រមានប្រទេសនានា កំពង់ផែ និងប្រតិបត្តិករព្រែកជីកទាំងអស់ ថា ពួកគេនឹងត្រូវទទួលខុសត្រូវសំណងលើហេតុការណ៍អាក្រក់ណាមួយពេលរកស៊ីជាមួយកប៉ាល់អ៊ីរង់ដែលគ្មានការធានាពីអន្តរជាតិ។
មន្ត្រីក្រសួងការបរទេសអាមេរិករូបបានលើកឡើងពីករណីដ៏មហន្តរាយមួយរបស់នាវាអ៊ីរ៉ង់ Sanchi ដែលជួបគ្រោះថ្នាក់ក្នុងសមុទ្រចិនខាងកើតកាលពីខែមករាកន្លងទៅ។ មនុស្ស៣២បានស្លាប់ ប្រេងរាប់លានម៉ែត្រគូបបានធ្លាយចូលសមុទ្រ ឯកប៉ាល់វិញក៏ត្រូវឆេះបាត់បង់ទៅទៀត។ យ៉ាងណាមិញ លោក Hook សង្ឃឹមថា ហេតុការណ៍នេះនឹងមិនកើតឡើងម្ដងទៀតឡើយ។
តំណាងពិសេសរូបនេះក៏ចោទក្រុងតេហេរ៉ង់ថា ព្យាយាមគេចពីទណ្ឌកម្មអាមេរិកដោយបានបិទប្រព័ន្ធផ្កាយរណបភ្ជាប់នឹងកប៉ាល់ដើម្បីបញ្ចៀសការប៉ះទង្គិច។ លោក Hook ចាត់ទុកសកម្មភាពបែបនេះ ជាគ្រោះថ្នាក់សម្រាប់សន្តិសុខលើលម្ហសមុទ្រ ព្រោះប្រព័ន្ធផ្កាយរណបនោះ ជួយបង្កើនភាពមើលឃើញលើផ្ទៃសមុទ្រ ហើយការបិទប្រព័ន្ធនេះនឹងបង្កជាហានិភ័យមិនខាន៕
Tag:
អាមេរិក
អ៊ីរ៉ង់
Brian Hook
© រក្សាសិទ្ធិដោយ thmeythmey.com
