ពីនេះ ពីនោះ
២៥ខេត្ត/រាជធានី
ចូរប្រយ័ត្នខ្លួននឹងដំណាក់កាលស្នេហា«ពណ៌ស៊ីជម្ពូ»! រូបភាពតំណាង
× អ្វីៗក៏មានចំណុចចាប់ផ្តើម ហើយក៏មានចំណុចបញ្ចប់របស់វាដែរ។ ដូចគ្នានឹងស្នេហារវាងបុរស និងនារី ដែលទើបផ្តើមជីវិតជាគូសង្សារថ្មីថ្មោង ដែលប្រៀបបានដូចពណ៌ស៊ីជម្ពូ អ្វីៗក៏ល្អស្រស់ស្អាតទាំងអស់ ពោលគឺពួកគេមើលឃើញតែចំណុចល្អរបស់គ្នាទៅវិញទៅមកប៉ុណ្ណោះ។ ដំណាក់កាលស្នេហាពណ៌ស៊ីជម្ពូនេះ គូស្នេហ៍ច្រើនតែប្រើពាក្យសន្យាថា នឹងរៀបការជាមួយគ្នា, ស្រឡាញ់គ្នាជារៀងរហូត, រស់នៅជាមួយអស់មួយជីវិត។ល។ គូស្នេហ៍ខ្លះ អាចឆ្លងផុតដំណាល់ស្នេហាពណ៌ស៊ីជម្ពូនេះ រីឯ គូស្នេហ៍ខ្លះ ស្រឡាញ់គ្នាកាន់តែយូរ មើលឃើញចំណុចអវិជ្ជមានរបស់ដៃគូកាន់តែច្រើន។ តាមពិតនេះ ជាដំណាក់កាល ឬការវិវដ្តនៃជីវិតស្នេហ៍ ដែលគូស្នេហ៍គ្រប់រូបត្រូវឆ្លងកាត់។ ៤ដំណាក់នៃជីវិតស្នេហាខាងក្រោមនេះ ជាមេរៀនដែលលោកអ្នកគួរស្វែងយល់៖
ដំណាក់កាលទី១៖ ជាចំណុចផ្តើមសេ្នហ៍រវាងគូសង្សារបុរស និងនារី ហើយពួកគេមើលឃើញនូវអ្វីដែលជាសកម្មភាព ឬពាក្យពេជ្រល្អៗរបស់គ្នាទៅវិញទៅមក ពោលគឺអ្វីៗប្រៀបបានដូចជាពណ៌ស៊ីជម្ពូ។ មានន័យថា បងល្អគ្រប់បែបគ្រប់យ៉ាង រីឯអូនវិញ ក៏ល្អគ្រប់បែបគ្រប់យ៉ាងដូចគ្នាដែរ។ ដំណាក់កាលដែលទើបតែផ្តើមជីវិតជាគូស្នេហ៍ថ្មីថ្មោងនេះ ច្រើនតែប្រើពាក្យសន្យាថា នឹងរៀបការជាមួយគ្នា, ស្រឡាញ់គ្នាជារៀងរហូត, រស់នៅជាមួយអស់មួយជីវិត។ល។
ដំណាក់កាលទី២៖ បន្ទាប់ពីឆ្លងកាត់អ្វីៗក៏ពណ៌ស៊ីជម្ពូរួមមក គឺឈានដល់ចំណុចមួយទៀតដែលដៃគូស្នេហានោះ ចាប់ផ្តើមមើលបំណាំគ្នា, ចេះចាប់កំហុសគ្នា, មានចិត្តច្រណែន, ប្រចណ្ឌគ្នាទៅវិញទៅមក។ ដំណាក់កាលនេះ មើលឃើញចំណុចខ្វះខាត ឬចំណុចអាក្រក់ពីគ្នាច្រើនជាងចំណុចល្អ។ ជាពិសេស គឺអន់ចិត្តដាក់គ្នា និងណាយចិត្តពីគ្នាបន្តិចម្តងៗ ព្រោះតែមើលឃើញកំហុសគ្នាច្រើនពេក។
ដំណាក់កាលទី៣៖ ដំណាក់កាលនេះ ឈានដល់ចំណុចមួយ ដែលនិយាយហេតុផលលែងស្តាប់គ្នាបាន និងនិយាយអ្វី ឬធ្វើអ្វីមួយប្រកែកយកតែឈ្នះរៀងៗខ្លួន រហូតដល់ប្រើប្រាសពាក្យសម្តីមិនល្អដាក់គ្នាទៀតផងក៏មាន។ ម្យ៉ាងទៀត គ្រាន់តែចាប់ផ្តើមនិយាយ ក៏មានអារម្មណ៍ធុញ ហើយចាំតែចាប់កំហុស និងចំណុចខ្សោយរបស់ដៃគូតែប៉ុណ្ណោះ។ ដំណាក់កាលនេះធ្វើឲ្យគូស្នេហ៍ណាយចិត្តពីគ្នាកាន់តែខ្លាំងជាងមុន។
ដំណាក់កាលទី៤៖ ចុងក្រោយឈានដល់ចំណុចមួយ ដែលគូស្នេហ៍នោះ ទ្រាំនឹងជីវិតស្នេហ៍ដ៏ស្មុកស្មាញ ដែលមានបញ្ហាជាមួយគ្នាមិនចេះចប់ មិនចេះហើយនោះលែងទៀតបានឡើយ។ ដំណាក់កាលនេះ គូស្នេហ៍នឹងពិចារណាថ្លឹងថ្លែងហេតុផលថា តើគួរសម្រុះសម្រួលគ្នាជាថ្មី ហើយចាប់ផ្តើមដោះស្រាយបញ្ហា ដែលធ្លាប់កើតមានកន្លងមកជាមួយគ្នា ឬត្រូវតែចែកផ្លូវគ្នា ដើម្បីកុំឲ្យស្មុគស្មាញនឹងបញ្ហាដែលកើតឡើងដដែលនេះ។ ដូច្នេះ ជីវិតស្នេហាចុងក្រោយនេះ គូស្នេហ៍នឹងគិតថា បើបន្តស្រឡាញ់គ្នា នឹងធ្វើឱ្យមានសុភមង្គល ឬចែកផ្លូវគ្នាដើររៀងៗខ្លួន ទើបមានសុភមង្គលជាង?
© រក្សាសិទ្ធិដោយ thmeythmey.com