ជាតិ
កូនប្រុស៖ ស្ថានភាពជំងឺរបស់ព្រឹទ្ធភិរម្យចាប៉ីដងវែង ប្រាជ្ញ ឈួន ដល់ដំណាក់កាលចុងក្រោយ
× ភ្នំពេញ៖ ស្ថានភាពជំងឺរបស់ព្រឹទ្ធាចារ្យចាប៉ីដងវែងភិរម្យ ប្រាជ្ញ ឈួន នៅថ្ងៃទី១១ ខែវិច្ឆិកានេះ ដល់ដំណាក់កាលចុងក្រោយ។ នេះបើយោងតាមលោក ប្រាជ្ញ ឆាត ដែលត្រូវជាកូន។
លោក ប្រាជ្ញ ឆាត បានបញ្ជាក់ប្រាប់សារព័ត៌មានថ្មីៗនៅព្រឹកថ្ងៃទី១១ ខែវិច្ឆិកានេះថា ស្ថានភាពជំងឺឪពុករបស់លោក ដល់ដំណាក់កាលចុងក្រោយ។ នេះជាអ្វីដែលលោកបានដឹង ពីគ្រូពេទ្យ។ លោក ប្រាប់ទៀតថា ឪពុករបស់ខ្លួនកំពុងតែដាក់បំពង់ខ្យល់អុកស៊ីសែនចូលទៅដល់សួតតែម្ដង ដើម្បីអាចរក្សាជីវិតបាន។
ទោះជាយ៉ាងណា គ្រូពេទ្យថា បំពង់ខ្យល់អុកស៊ីសែននេះ អាចជួយបន្តដង្ហើម ព្រឹទ្ធាចារ្យ ប្រាជ្ញ ឈួន បានតែរយៈពេលពី៥ទៅ៧ថ្ងៃតែប៉ុណ្ណោះ។
លោក ប្រាជ្ញ ឆាត បញ្ជាក់ថា៖«ឥឡូវគ្រូពេទ្យដាក់បំពង់អុកស៊ីសែន ចូលទៅដល់ក្នុងសួតគាត់តែម្ដង។ ហើយរាល់ពេល២ម៉ោងម្ដងត្រូវយកចេញដើម្បីពិនិត្យមើលចង្វាក់បេះដូង។ ខ្យល់ហ្នឹងកម្លាំងវាខ្លាំងពេកដាក់យូរពេកមិនបានទេ អាចប៉ះពាល់ដល់ជីវិត ហើយបើមិនដាក់ក៏មិនបានដែរ។ ពេទ្យថានេះជាវិធីចុងក្រោយហើយ ដែលពេទ្យព្យាយាមជួយឱ្យគាត់នៅបន្តដង្ហើមបានប៉ុន្មានថ្ងៃទៀត»។
ព្រឹទ្ធភិរម្យ ប្រាជ្ញ ឈួន មានស្ថានភាពជំងឺរ៉ាំរៃ ដូចជាលើសឈាម បញ្ហាតម្រងនោម បេះដូង និងសួត ជាង១០ឆ្នាំហើយ។ កាលពីថ្ងៃទី៥ ខែវិច្ឆិកា ស្ថានភាពជំងឺគាត់ធ្វើទុក្ខខ្លាំង ដែលធ្វើឲ្យគ្រួសាររបស់លោកព្រឹទ្ធាចារ្យ សម្រេចចិត្តបញ្ជូនលោកទៅព្យាបាលនៅមន្ទីរពេទ្យបង្អែកខេត្តតាកែវ មុននឹងបញ្ជូនបន្តមកមន្ទីរពេទ្យកាល់ម៉ែត្រ នាថ្ងៃទី៨ ខែវិច្ឆិកា។
លោកព្រឹទ្ធភិរម្យ ប្រាជ្ញ ឈួន បច្ចុប្បន្នអាយុ៨២ឆ្នាំ ដែលមានលំនៅដ្ឋានអចិន្ត្រៃយ៍នៅភូមិកំណើត ភូមិត្រពាំងកក់ ឃុំខ្វាវ ស្រុកទ្រាំង ខេត្តតាកែវ បានចាប់អាជីពជាអ្នកចាប៉ី ជាង៧០ឆ្នាំមកហើយ។ លោកត្រូវបានទទួលស្គាល់ជាបុគ្គលដ៏មានទេពកោសល្យមួយរូប និងជាទីគោរពរបស់ពលរដ្ឋកម្ពុជា៕
Tag:
ប្រាជ្ញ ឈួន
ចាប៉ីដងវែង
សិល្បៈ
តន្ត្រី
© រក្សាសិទ្ធិដោយ thmeythmey.com