អន្តរជាតិ
របាយការណ៍៖ រយៈពេលជាង៥០ឆ្នាំមកនេះ សត្វព្រៃជាង៦០ភាគរយនៅលើផែនដីបានផុតពូជ
× សកម្មភាពរបស់មនុស្សក្នុងពេលបច្ចុប្បន្ននេះកំពុងតែជះឥទ្ធិពលអាក្រក់ទៅលើធម្មជាតិនិងសត្វព្រៃដែលកំពុងតែរស់នៅលើភពផែនដីមួយនេះ។ របាយការណ៍សិក្សាថ្មីមួយបង្ហាញថា សកម្មភាពនេះធ្វើឲ្យសត្វព្រៃលើស ៦០ភាគរយផុតពូជទៅក្នុងរយៈពេលប្រហែលប្រាំទសវត្សរ៍កន្លងមកនេះ។
ការបំពុលខ្យល់អាកាស បំពុលទឹក ការទាញយកធនធានធម្មជាតិច្រើនជ្រុលនិងការបរបាញ់ ឬនេសាទ ហួសកម្រិតជាមូលហេតុដែលធ្វើឲ្យសត្វព្រៃទូទាំងពិភពលោកបាត់បង់ទៅយ៉ាងគំហុកបែបនេះ។ នេះ បើយោងតាមរបាយការណ៍សន្ទស្សន៍ជីវិតរស់នៅលើភពផែនដីរបស់វេទិកាសេដ្ឋកិច្ចពិភពលោក World Economic Forum ចុះផ្សាយកាលពីថ្ងៃទី៣០ខែតុលាកន្លងទៅនេះ។
ការសិក្សាដែលមានការសហការជាមួយអង្គការមូលនិធិសត្វព្រៃពិភពលោក (World Wildlife Fund) បានបង្ហាញថា ថនិកសត្វ សត្វស្លាប សត្វរស់នៅក្នុងទឹក និងសត្វល្មូនជាច្រើនប្រភេទសរុបជាង៦០%បានបាត់បង់ក្នុងរយៈពេលតែជាង៥០ឆ្នាំមុននេះប៉ុណ្ណោះ។
លោក Marco Lembertini ដែលជាអ្នកគ្រប់គ្រងរបស់មូលនិធិសត្វព្រៃពិភពលោកខាងលើក៏បានលើកឡើងដូច្នេះថា៖ «ក្នុងពេលអនាគត ក៏ដូចជាអ្នកជំនាន់ក្រោយពិតជាមិនអាចរស់នៅដោយភាពសប្បាយរីករាយនោះទេ បើបរិស្ថានធម្មជាតិកំពុងតែឈានទៅរកការបំផ្លាញយ៉ាងលឿនដូចនេះ»។
ឧទាហរណ៍ សត្វក្រពើមួយប្រភេទឈ្មោះ Gharial ដែលរស់នៅក្នុងប្រទេសឥណ្ឌាកំពុងតែឈានទៅរកការផុតពូជកាន់តែខ្លាំងនៅពេលបច្ចុប្បន្ន។ បើសិនជាមិនមានការទប់ស្កាត់ទេនោះ សត្វព្រៃនេះនឹងផុតពូជនៅពេលខាងមុខនេះ។
ជុំវិញការបន្តផុតពូជនៃសត្វព្រៃប៉ុន្មានទសត្សរ៍មកនេះ លោក David Attenborough ដែលជាអ្នកជំនាញខាងបរិស្ថានធម្មជាតិជើងចាស់ម្នាក់របស់ទូរទស្សន៍អង់គ្លេស BBC បានហៅមនុស្សថាជា «មេរោគដែលបំផ្លាញភពផែនដី»ដែរ។
យ៉ាងណាក៏ដោយ នាពេលបច្ចុប្បន្ននេះ ទីភ្នាក់ងារពាក់ព័ន្ធជាច្រើនរបស់អង្គការសហប្រជាជាតិដែលមានតួនាទីការពារបរិស្ថានបានប្រារព្ធសន្និបាតរួម និងរៀបចាំកិច្ចប្រជុំជាច្រើនបន្តបន្ទាប់ដើម្បីស្វែងរកដំណោះស្រាយដែលអាចស្តារឡើងវិញនូវស្ថិរភាព និងនិរន្តរភាពនៃបរិស្ថានធម្មជាតិនៅលើពិភពលោកដែរ៕
Tag:
បរិស្ថាន
សត្វព្រៃ
David Attenborough
© រក្សាសិទ្ធិដោយ thmeythmey.com