អន្តរជាតិ
បង់ក្លាដែស ចង់ឲ្យចិនជួយបញ្ចុះបញ្ចូលមីយ៉ាន់ម៉ាលើការធានាសុខុមាលភាពជនភៀសខ្លួនរ៉ូហ៊ីងយ៉ា
×![]()
រដ្ឋាភិបាលក្រុងដាហ្កា បានស្នើឲ្យរដ្ឋាភិបាលក្រុងប៉េកាំងបង្ហាញតួនាទីក្នុងការបញ្ចុះបញ្ចូលរដ្ឋាភិបាលក្រុងណៃពិដោរឲ្យធានាពីការស្តារឡើងវិញនូវស្ថានភាពនៅក្នុងតំបន់ ដែលរងផលប៉ះពាល់ខ្លាំងរបស់ជនជាតិភាគតិចរ៉ូហ៊ីងយ៉ា និងជាជនភៀសខ្លួនកំពុងតែស្នាក់នៅក្នុងទឹកដីបង់ក្លាដែសឲ្យបានឆាប់រហ័ស។
នាជំនួបទ្វេភាគីក្នុងក្រុងប្រកាំងនៅថ្ងៃ១០ វិច្ឆិកា រដ្ឋមន្ត្រីការបរទេសបង់ក្លាដែស Md Shahidul Haque បានស្នើត្រង់ៗចំពោះមុខអនុរដ្ឋមន្ត្រីការបរទេសចិន លោក Kong Xuanyou ឲ្យជួយបញ្ចុះបញ្ចូលរដ្ឋាភិបាលមីយ៉ាន់ម៉ាពន្លឿនដំណោះស្រាយសម្រាប់ជនជាតិភាគតិចរ៉ូហ៊ីងយ៉ារាប់សិបម៉ឺននាក់ ដែលកំពុងតែទទួលបានការគាំទ្រដោយបង់ក្លាដែស។ នេះបើយោងតាមសារព័ត៌មាន The Nation។
តាមប្រភពព័ត៌មានដដែល ភាគីបង់ក្លាដែស បានលើកឡើងថា វិបត្តិជនភៀសខ្លួនរ៉ូហ៊ីងយ៉ា កើតចេញពីជម្លោះរវាងរដ្ឋាភិបាលមីយ៉ាន់ម៉ា និងប្រជាជនខ្លួនឯងផ្ទាល់នោះទេ ហើយបង់ក្លាដែស ក៏បានស្នើឲ្យរដ្ឋាភិបាលមីយ៉ាន់ម៉ា គួរតែចាប់ផ្តើមនាំពលរដ្ឋរបស់ខ្លួលត្រលប់ទៅប្រទេសវិញតាមកិច្ចព្រមព្រៀង ដោយពុំមានការពន្យារពេលទៀតនោះទេ។
ជុំវិញសំណើរបស់បង់ក្លាដែស ចិន មិនជំទាស់ឡើយ។ « ចិន ប្តេជ្ញាដើរតួនាទីវិជ្ជមាន និងស្ថាបនាក្នុងការដោះស្រាយវិបត្តិរ៉ូហ៊ីងយ៉ា និងសូមសរសើរចំពោះជំហរ និងឆន្ទៈនយោបាយរបស់បង់ក្លាដែសលើវិបត្តិនេះផងដែរ»។ នេះ គឺជាការលើកឡើងរបស់អនុរដ្ឋមន្ត្រីការបរទេសចិនតបនឹងការចង់បានរបស់ភាគីបង់ក្លាដែស។
គួរជម្រាបផងដែរថា ក្រោយពីវិបត្តិជនភៀសខ្លួនរ៉ូងយ៉ា បានកើតឡើងអស់រយៈពេលជាងមួយឆ្នាំមកនេះ មីយ៉ាន់ម៉ា និងបង់ក្លាដែសបានឯកភាពគ្នាតាមកិច្ចព្រមព្រៀងក្នុងការបញ្ជូនជនភៀសខ្លួនជាច្រើនដងមកហើយ ក៏ប៉ុន្តែ បង់ក្លាដែស ចោទមីយ៉ាន់ម៉ាថា មិនសូវមានឆន្ទៈក្នុងការអនុវត្តតាមកិច្ចព្រមព្រៀងសោះ។
ត្រលប់មកកាន់ចិនវិញ។ កន្លងមក ក្នុងនាមជាអ្នកជិតខាង ក៏ដូចជាដៃគូសហប្រតិបត្តិការជិតស្និទ្ធផង ចិន បានធ្វើជាខ្នងបង្អែកយ៉ាងម៉ាំសម្រាប់មីយ៉ាន់ម៉ាពីការរិះគន់ និងថ្កោលទោសពីសហគមន៍អន្តរជាតិ។ មិនត្រឹមតែប៉ុណ្ណោះ ចិន ថែមទាំងផ្តល់អនុសាសន៍ ក៏ដូចជាជ្រោមជ្រែងរដ្ឋាភិបាលមីយ៉ាន់ម៉ាក្នុងការស្តាឡើងវិញនៅតំបន់ដែលរងផលប៉ះពាល់ដោយសារការប៉ះទង្គិចប្រដាប់អាវុធរវាងកម្លាំងរដ្ឋាភិបាល និងក្រុមឧទ្ទាម៕
Tag:
ចិន
បង់ក្លាដែស
មីយ៉ាន់ម៉ា
© រក្សាសិទ្ធិដោយ thmeythmey.com
