ជាតិ
អភិបាលខេត្ត ជឿថា លោក សូរ ប្លាតុង នឹងដឹកនាំស្រុកប្រាសាទបាគងល្អដូចក្រុងសៀមរាប លោក សូរ ប្លាតុង (ស្តាំ) និង លោក នួន ពុទ្ធារ៉ា នាពិធីឡើងកាន់តំណែង
× សៀមរាប៖ ត្រឹមរយៈពេល១០ថ្ងៃ ក្រោយអនុក្រឹត្យរបស់រាជរដ្ឋាភិបាលកម្ពុជា ស្ដីពីការផ្លាស់ប្ដូរ និងតែងតាំងអភិបាលក្រុងសៀមរាបរួចមក នៅថ្ងៃទី ១២ វិច្ឆិកានេះ កម្មវិធីប្រកាសចូលកាន់មុខតំណែងថ្មី ត្រូវបានរៀបចំធ្វើជាផ្លូវការហើយ។ លោក នួន ពុទ្ធារ៉ា ឡើងពីនាយករដ្ឋបាលខេត្តសៀមរាប មកកាន់តំណែងអភិបាលក្រុងសៀមរាបថ្មី ជំនួសលោក សូរ ប្លាតុង ដែលត្រូវប្តូរទៅជាគណៈអភិបាលស្រុកប្រាសាទបាគង ជំនួសអភិបាលស្រុកចាស់ដែលដល់អាយុចូលនិវត្តន៍។
កម្មវិធីពីរត្រូវបានធ្វើក្នុងថ្ងៃតែមួយ គឺការប្រកាសតែងតាំងអភិបាលស្រុកប្រាសាទបាគងថ្មី និងទីពីរ គឺការផ្លាស់ប្ដូរ និងតែងតាំងអភិបាលក្រុងសៀមរាបថ្មី។ កម្មវិធីនេះធ្វើឡើងក្រោមវត្តមាន លោក ឃឹម ប៊ុនសុង អភិបាលខេត្តសៀមរាប។
ក្នុងពិធីប្រកាសតែងតាំងអភិបាលក្រុងសៀមរាបថ្មី ដោយលោក នួន ពុទ្ធារ៉ា ចូលមកកាន់ការងារជំនួសលោក សូរ ប្លាតុង ដែលត្រូវដូរទៅស្រុកប្រាសាទបាគង អភិបាលខេត្តសៀមរាបបានពន្យល់ថា ការផ្លាស់ប្ដូរនេះមិនមែនមានន័យថា អភិបាលក្រុងចាស់មានកំហុសឆ្គងក្នុងអាណត្តិធ្វើការរបស់លោកឡើយ។ ផ្ទុយទៅវិញ តាមការលើកឡើងរបស់លោក ឃឹម ប៊ុនសុង ក្នុងអាណត្តិការងាររបស់លោក សូរ ប្លាតុង ជាអភិបាលក្រុងសៀមរាប លោកបានបំពេញការងារយ៉ាងល្អ និងគួរយកគំរូតាម។ លោកអភិបាលបន្ថែមថា ស្រុកប្រាសាទបាគងជាក្រុងរណបរបស់ខេត្តសៀមរាប ហើយត្រូវការបុគ្គលដែលមានសមត្ថភាព និងបទពិសោធន៍ទៅគ្រប់គ្រង ដើម្បីចូលរួមអភិវឌ្ឍន៍តំបន់នេះឱ្យកាន់តែខ្លាំងឡើង។
គួរបញ្ជាក់ថា លោក សូរ ប្លាតុង ឡើងជាអភិបាលក្រុងសៀមរាបបានមួយអាណត្តិដែលមានរយៈពេល ៤ឆ្នាំ ដែលត្រូវបានបញ្ចប់នៅថ្ងៃទី២១ តុលា ឆ្នាំ២០១៨។ ជាទូទៅ អាណត្តិមន្ត្រីរាជការអាចកាន់កិច្ចការមុនដល់អាយុចូលនិវត្តន៍ ត្រឹមពីរអាណត្តិ ហើយអាណត្តិទាំងនោះអាចរក្សាទុក ផ្លាស់ប្តូរ និងការបញ្ឈប់។ នេះជាការលើកឡើងរបស់លោក អភិបាលខេត្តសៀមរាប៕
© រក្សាសិទ្ធិដោយ thmeythmey.com