អន្តរជាតិ
លោក លី សៀនឡុង៖ សមាជិកបក្សកាន់អំណាចធ្វើនយោបាយដើម្បីជាតិ មិនមែនដើម្បីខ្លួនឯងឡើយ
× នាយករដ្ឋមន្ត្រីសិង្ហបុរី លី សៀនឡុង នៅពីថ្ងៃទី១១ ខែវិច្ឆិកា បានលើកឡើងថា ប្រជាជនសិង្ហបុរីត្រូវដឹងថា រាល់សមាជិកគណបក្សសកម្មភាពប្រជាជន (PAP) គឺពុំធ្វើនយោបាយដើម្បីប្រយោជន៍របស់ពួកគេនោះទេ ប៉ុន្តែដើម្បីបម្រើជាតិ។
ថ្លែងនៅក្នុងសន្និសីទរបស់គណបក្ស PAP កាលពីថ្ងៃទីអាទិត្យ លោក លី សៀនឡុងដែលមានតួនាទីជាអគ្គលេខាធិការបក្សកាន់អំណាច បានគូសបញ្ជាក់ថា ប្រជាជនសិង្ហបុរីត្រូវមានទំនុកចិត្តថា បក្សកាន់អំណាចមានសមាជិកទាំងអស់ ដែលមានសមត្ថភាពកាច់ចង្កូតសិង្ហបុរីឆ្ពោះទៅមុខបាន។
បើតាមសារព័ត៌មាន Channel NewsAsia លោក លី បានអះអាងបែបនេះ៖ «ប្រជាជនត្រូវដឹងថា សមាជិកនៃបក្សកាន់អំណាច PAP ដែលមានទាំងស្ត្រីនិងបុរស គឺចូលធ្វើនយោបាយដើម្បីបម្រើជាតិ ប៉ុន្តែមិនមែនដើម្បីផលប្រយោជន៍របស់ពួកគេនោះឡើយ»។
ទន្ទឹមនឹងនេះ លោក លី ដែលជាកូនប្រុសរបស់បិតាសិង្ហបុរី លី ក្វាន់យូ បានកត់សម្គាល់ទៀតថា ដើម្បីបម្រើផលប្រយោជន៍ជាតិ បក្សកាន់អំណាចរបស់លោក ត្រូវតែមានប្រមុខដឹកនាំល្អៗ។ ក្នុងនោះក៏រួមបញ្ចូល រាល់សមាជិកបក្សទាំងអស់ ដែលរាប់ចាប់ពី សកម្មជនសាខាបក្ស , សមាជិកគណៈកម្មាធិការប្រតិបត្តិកណ្តាល (CEC) ដែលជាស្ថាប័នកំពូលមួយរបស់បក្សកាន់អំណាច, អគ្គលេខាធិការបក្ស និងប្រធានបក្សជាដើម។
ក្នុងសន្ទរកថាដដែលនេះ នាយករដ្ឋមន្ត្រីសិង្ហបុរី វ័យ ៦៦ឆ្នាំរូបនេះ ក៏បានគូសបញ្ជាក់ទៀតថា បក្សកាន់អំណាច ត្រូវតែស្វែងយល់ពីកង្វល់របស់ប្រជាជនសិង្ហបុរី ព្រមទាំងបង្ហាញពួកគេថា សមាជិកបក្សទាំងអស់កំពុងធ្វើការយ៉ាងសកម្ម ដើម្បីដោះស្រាយបញ្ហាទាំងនោះជូនដល់ប្រជាជន។
ត្រង់នេះ លោក លី បានបកស្រាយយ៉ាងដូច្នេះ៖ «ប្រសិនបើយើងស្វែងយល់ពីកង្វល់របស់ប្រជាជនបានច្បាស់លាស់ នោះយើងអាចឆ្លើយតប និងធ្វើការជាមួយពួកគេ ដើម្បីដោះស្រាយក្តីបារម្ភជាក់លាក់ទាំងនោះ ហើយនិងផ្តល់ទំនុកចិត្តដល់ពួកគេថា ទាំងអស់គ្នា យើងអាចធ្វើរឿងគ្រប់យ៉ាងបានល្អប្រសើរឡើង»៕
Tag:
សិង្ហបុរី
លីសៀនឡុង
គណបក្សកម្លាំងប្រជាជន(PAP)
© រក្សាសិទ្ធិដោយ thmeythmey.com