ជាតិ
សម្ដេច ស ខេង កំណត់ឲ្យមានអគ្គស្នងការរង ១៦រូប អគ្គនាយករងអន្តោប្រវេសន៍ ១០រូប អគ្គនាយករងពន្ធនាគារ ១១រូប…
× ភ្នំពេញ៖ រដ្ឋមន្ត្រីក្រសួងមហាផ្ទៃ សម្ដេច ស ខេង បានប្រកាសកំណត់មុខតំណែងអគ្គស្នងការរង អគ្គនាយករង អនុប្រធាននាយកដ្ឋាន និងថ្នាក់ប្រហាក់ប្រហែល នៃក្របខ័ណ្ឌមន្ដ្រីនគរបាលជាតិ និងពន្ធនាគាររបស់ក្រសួងមហាផ្ទៃ។ នេះបើតាមសេចក្តីប្រកាសរបស់ក្រសួងមហាផ្ទៃ។
អង្គភាព ដែលត្រូវកំណត់ចំនួនតួនាទីរងទាំងនោះ រួមមានទី១ អគ្គលេខាធិការដ្ឋាន មានអគ្គលេខាធិការរង ចំនួន០៨រូប ។ ទី២ អគ្គស្នងការដ្ឋាននគរបាលជាតិ មានអគ្គស្នងការរង ចំនួន១៦រូប ។ ទី៣ អគ្គាធិការដ្ឋាន មានអគ្គាធិការរង ចំនួន០៨រូប ។ ទី៤ អគ្គនាយកដ្ឋានពន្ធនាគារ មានអគ្គនាយករង ចំនួន០៨រូប។ ទី៥ អគ្គនាយកដ្ឋានអន្ដោប្រវេសន៍ មានអគ្គនាយករង ចំនួន១០រូប ។ ទី៦ អគ្គនាយកដ្ឋានអត្តសញ្ញាណកម្ម មានអគ្គនាយករង ចំនួន០៩រូប។ ទី៧ អគ្គនាយកដ្ឋានភស្ដុភារ និងហិរញ្ញវត្ថុ មានអគ្គនាយករង ចំនួន១១រូប។ ទី៨ បណ្ឌិត្យសភានគរបាលកម្ពុជា មានអនុប្រធាន ចំនួន១០រូប ។ទី៩ អគ្គនាយកដ្ឋានសវនកម្មផ្ទៃក្នុង មានអគ្គនាយករង ចំនួន០៦រូប និងទី១០ ក្រុមប្រឹក្សានីតិកម្ម មានអនុប្រធាន ចំនួន០៧រូប។
ចំពោះមុខតំណែងអនុប្រធានសេនាធិការដ្ឋាន អនុប្រធាននាយកដ្ឋានកណ្ដាល ចំណុះអគ្គស្នងការដ្ឋាននគរបាលជាតិ នៃក្រសួងមហាផ្ទៃ ត្រូវបានកំណត់ចំនួនអតិបរមា ៥រូប។ ចំណែកមុខតំណែងអនុប្រធាននាយកដ្ឋាន ឬថ្នាក់ប្រហាក់ប្រហែលនានា ក្នុងរចនាសម្ព័ន្ធនគរបាលជាតិកម្ពុជា និងក្នុងរចនាសម្ព័ន្ធអគ្គនាយកដ្ឋានពន្ធនាគារ ក្រសួងមហាផ្ទៃ ត្រូវបានកំណត់ចំនួន ស្មើនឹងចំនួនការិយាល័យចំណុះនាយកដ្ឋាន អង្គភាពនីមួយៗនេះ។
លិខិតក្រសួងមហាផ្ទៃដដែល បន្តកំណត់មុខតំណែងនាយរងការិយាល័យចំណុះនាយកដ្ឋាន អង្គភាព ឬប្រហាក់ប្រហែលនានា ក្នុងរចនាសម្ព័ន្ធនគរបាលជាតិ និងក្នុងរចនាសម្ព័ន្ធនាយកដ្ឋានពន្ធនាគារ ឲ្យមានតែ៤រូបប៉ុណ្ណោះ។
តែយ៉ាងណាមុខតំណែងខាងលើ ដែលធ្លាប់មានចំនួនលើសកន្លងមក ត្រូវរក្សាទុកដដែល ពោលគឺមិនត្រូវដកចេញវិញតាមការកំណត់នេះឡើយ។ ប៉ុន្តែក្នុងករណីមុខតំណែងទាំងនេះ នៅសល់ទំនេរដោយមូលហេតុផ្សេងៗនោះ គឺមិនត្រូវបំពេញ ឬជំនួសឡើយ ដោយរក្សាទុករហូតដល់មានចំនួន តាមការកំណត់របស់សេចក្តីប្រកាសរបស់ក្រសួងមហាផ្ទៃ។
លិខិតក្រសួងមហាផ្ទៃ ដែលចុះហត្ថលេខាដោយ សម្ដេច ស ខេង បានបញ្ជាក់ដូច្នេះថា៖«ក្នុងករណីចាំបាច់ ការតែងតាំងមុខតំណែងបន្ថែមលើសពីការកំណត់ ដូចមានចែងក្នុងប្រការ៣ ប្រការ៤ នៃប្រកាសនេះ រដ្ឋមន្ត្រីក្រសួងមហាផ្ទៃ ត្រូវលើកសំណើសុំការសម្រេចពីនាយករដ្ឋមន្ត្រី។ ក្នុងករណីចាំបាច់តែងតាំងបន្ថែមលើសពីការកំណត់ដូចមានចែងក្នុងប្រការ៥ និងប្រការ៦ នៃប្រការនេះ អគ្គស្នងការដ្ឋាននគរបាលជាតិ អគ្គនាយកដ្ឋានសាមី ឬថ្នាក់ប្រហាក់ប្រហែល ត្រូវលើកសំណើសុំការសម្រេចពីរដ្ឋមន្ត្រីក្រសួងមហាផ្ទៃ ដូចមានចែងក្នុងប្រការ៥ (ប្រកាសលេខ៤៧៧៣ប្រ.ក) ចុះថ្ងៃទី២១ ខែឧសភា ឆ្នាំ២០១៥ ស្តីពីការប្រគល់សិទ្ធិការងារតែងតាំងមុខតំណែង ដំឡើងឋានន្តរសក្តិ ផ្ទេរភារកិច្ចមន្ត្រីនគរបាលជាតិ និងរៀបចំរចនាសម្ព័ន្ធ»។
ចំពោះតែងតាំងមុខតណែងក្នុងករណីចាំបាច់ខាងលើនេះ ត្រូវផ្អែកលើលក្ខណសម្បត្តិ ដែលកំណត់ដោយលក្ខខណ្ឌរបស់ក្រសួងមហាផ្ទៃ។ នេះបើតាមសេចក្តីប្រកាសខាងលើ៕
© រក្សាសិទ្ធិដោយ thmeythmey.com