នាយករដ្ឋមន្ត្រីកាណាដា អញ្ជើញមកចូលរួមកិច្ចប្រជុំកំពូលអាស៊ានសិង្ហបុរីថ្ងៃអង្គារទី ១៣ ខែវិច្ឆិកានេះ។ មេដឹកនាំរដ្ឋអាមេរិកខាងជើងរូបនេះនឹងលើកយកពីបំណងបង្កើតកិច្ចព្រមព្រៀងពាណិជ្ជកម្មជាមួយអាស៊ាន និងចូលរួមជាសមាជិកកិច្ចប្រជុំកំពូលអាស៊ីបូព៌ាផងដែរ។
នាយករដ្ឋមន្ត្រីកាណាដាលោក ចាស្ទីន ទ្រូដូ មានមុខជាថ្មីទៀតនៅក្នុងកិច្ចប្រជុំកំពូលអាស៊ានលើកទី ៣៣ និងកិច្ចប្រជុំពាក់ព័ន្ធនៅបុរីរដ្ឋសិង្ហបុរី។ គោលដៅសំខាន់របស់កាណាដាពេលនេះ គឺពង្រឹងទំនាក់ទំនងជាមួយអាស៊ានជាពិសេសពាណិជ្ជកម្ម និងរកការគាំទ្រខ្លួនជាសមាជិកកិច្ចប្រជុំកំពូលអាស៊ីបូព៌ា (EAS) ដែរ។
កាលពីឆ្នាំ ២០១៧ មេដឹកនាំកាណាដាត្រូវបានអញ្ជើញឲ្យចូលរួមជាភ្ញៀវរបស់ប្រធានអាស៊ានជាលើកដំបូងដែរ ដែលពេលនោះហ្វីលីពីនធ្វើជាប្រធានប្តូរវេន។
សម្រាប់កាណាដា អាស៊ានជាតំបន់យុទ្ធសាស្ត្រ និងមានសារសំខាន់សម្រាប់សន្តិសុខ និងសេដ្ឋកិច្ច។ បច្ចុប្បន្នកាណាដា នៅត្រឹមជាដៃគូសន្ទនារបស់អាស៊ានប៉ុណ្ណោះ។ ដូច្នេះហើយបានជា រដ្ឋាភិបាលក្រុងអូតាវ៉ា ចង់បានទំនាក់ទំនងជិតស្និទ្ធ និងកម្រិតខ្ពស់ជាងនេះ។
ស្ថិតក្នុងកិច្ចប្រជុំអាស៊ានពេលនេះ លោក ទ្រូដូ នឹងស្វះស្វែងបញ្ចុះបញ្ចូលភាគីពាក់ព័ន្ធជាពិសេសមាជិកអាស៊ាន និងដៃគូសន្ទនាឲ្យគាំទ្រសមាជិកភាពក្នុងកិច្ចប្រជុំអាស៊ីបូព៌ា។ វេទិកាកិច្ចប្រជុំអាស៊ីបូព៌ាក្លាយជាវេទិកាសំខាន់សម្រាប់កិច្ចពិភាក្សាសេដ្ឋកិច្ច និងសន្តិសុខតំបន់។ កាណាដាចង់បានកៅអីមួយនឹងគេដែរក្នុងវេទិកាកិច្ចប្រជុំប្រចាំឆ្នាំនេះដើម្បីមានឱកាសចូលរួមកាន់តែសកម្មជាងមុន។
កិច្ចប្រជុំអាស៊ីបូព៌ាមានសមាជិកសរុប ១៨ មានសមាជិកអាស៊ានទាំងដប់ បូកជាមួយដៃគូសន្ទនាប្រាំបីផ្សេងទៀតដូចជា អូស្ត្រាលី, ចិន, ឥណ្ឌា, ជប៉ុន, រុស្ស៊ី, នូវែលសេឡង់, កូរ៉េខាងត្បូង និងអាមេរិកផងដែរ។
កន្លងមកនេះ កាណាដាបានបង្ហាញជំហរស្ទាក់ស្ទើរក្នុងការស្រវាចាប់អាស៊ាន ហើយទំនាក់ទំនងរវាងកាណាដា និងអាស៊ានប្រឈមបញ្ហាខ្លាំងដោយសារបញ្ហាមួយចំនួនជាពិសេសរឿងរ៉ាវនៅមីយ៉ាន់ម៉ា។ កាណាដាជាមហាអំណាចអាមេរិកខាងជើងដែលតែងតែទិតៀនរបបសឹកមីយ៉ាន់ម៉ាតាំងពីដើមមក ហើយការចូលរួមរបស់មីយ៉ាន់ម៉ាជាមួយអាស៊ានឆ្នាំ ១៩៩៧ ធ្វើឲ្យទំនាក់ទំនងទ្វេភាគីអាស៊ាននិងកាណាដាកាន់តែធ្លាក់ចុះខ្លាំង។
យ៉ាងណាមិញទំនាក់ទំនងនេះចាប់ផ្តើមប្រសើរឡើងបន្តិចម្តងៗនៅអំឡុងឆ្នាំ ២០១០ ដោយកាណាដាចាប់ផ្តើមចុះកិច្ចព្រមព្រៀងពាណិជ្ជកម្ម ជាមួយអាស៊ាន និងពង្រឹងទំនាក់ទំនងការទូតរួមគ្នាជាដើម។ ឆ្នាំ ២០១២ ក្រុមប្រឹក្សាធុរៈកិច្ចកាណាដា និងអាស៊ានត្រូវបានបង្កើតឡើងដើម្បីជួយសម្រួលដល់អ្នកវិនិយោគកាណាដាក្នុងការមកដាក់ទុនរកស៊ីនៅតំបន់អាស៊ានផងនិងជំរុញទំនាក់ទំនងពាណិជ្ជកម្មជាដើម។ កាលឆ្នាំ ២០០៩ កាណាដាបានដាក់ទូតប្រចាំអាស៊ានជាផ្លូវការ ប៉ុន្តែឯកអគ្គរាជទូតកាណាដាប្រចាំឥណ្ឌូណេស៊ីជាអ្នកកាន់តួនាទីពីរ ជាទូតប្រចាំអាស៊ានផង និងជាទូតប្រចាំឥណ្ឌូណេស៊ីផង។ កាណាដាបន្តបង្កើតស្ថានទូតនៅតាមបណ្តាប្រទេសអាស៊ានដើម្បីពង្រឹងទំនាក់ទំនងការទូត ហើយដូចស្រាប់នៅឆ្នាំ ២០១៥ កាណាដាសម្រេចបង្កើតស្ថានទូតនៅកម្ពុជានិងឡាវជាផ្លូវការ។
ដោយឡែក ក្រៅតែពីចង់បានសមាជិកភាពក្នុងកិច្ចប្រជុំកំពូលអាស៊ីបូព៌ា លោក ទ្រូដូ ក៏នឹងយកឱកាសកិច្ចប្រជុំអាស៊ាននេះដើម្បីពិភាក្សាលើការឈាននៅបង្កើតកិច្ចព្រមព្រៀងសេដ្ឋកិច្ចជាមួយអាស៊ានដែរ។ គោលនយោបាយរបស់កាណាដា គឺធ្វើពិពិធកម្មពាណិជ្ជកម្ម និងគាំទ្រគោលនយោបាយសេរីភាវូបនីយកម្មសេដ្ឋកិច្ចប្រឆាំងនឹងជំហរក្រុងវ៉ាស៊ីនតោន។
បច្ចុប្បន្ននេះ កាដាណាជាសមាជិកនៃកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) រួចទៅហើយ ហើយរដ្ឋអាមេរិកខាងជើងនេះបន្តស្វែងរកឱកាសបង្កើតកិច្ចព្រមព្រៀងពាណិជ្ជកម្មបន្ថែមទៀតជាមួយបណ្តារដ្ឋអាស៊ានដែរ។
កាលពីថ្ងៃចន្ទទី ១២ ខែវិច្ឆិកា មុនបញ្ចប់ទស្សនកិច្ចនៅប៉ារីស លោក ទ្រូដូ បានប្រាប់អ្នកសារព័ត៌មានថា កាណាដាពិតជាមានបំណងលើកឡើងពីលទ្ធភាពក្នុងការចរចាគ្នាលើកិច្ចព្រមព្រៀងពាណិជ្ជកម្មទ្វេភាគីដែរ ដ្បិតអាស៊ានស្ថិតក្នុងចំណោមតំបន់ដែលមានសេដ្ឋកិច្ចរីកលូតលាស់រហ័សបំផុតមួយ។
កាលពីខែសីហាកន្លងទៅ ស្ថិតក្នុងដំណើរទស្សនកិច្ចមកកាន់រដ្ឋអាស៊ីអាគ្នេយ៍ថៃ និងសិង្ហបុរីនា រដ្ឋមន្ត្រីពាណិជ្ជកម្មកាណាដាលោក Jim Carr បានបង្ហើបម្តងដែរថា កាណាដាកំពុងស្វែងរកលទ្ធភាពបង្កើតកិច្ចព្រមព្រៀងពាណិជ្ជកម្មសេរីជាមួយអាស៊ានជាក្រុមដែរ។ ប៉ុន្តែវាមិនមានការបកស្រាយច្បាស់លាស់ពីគម្រោងនេះទេ។
យ៉ាងណាក៏ដោយ អ្នកជំនាញមើលឃើញថា ទីតាំងភូមិសាស្ត្រធ្វើឲ្យកាណាដាពិបាកសម្រេចបានកិច្ចព្រមព្រៀងពាណិជ្ជកម្មជាក់លាស់ជាមួយអាស៊ាន។ មិនមែនដូចអូស្ត្រាលី ជប៉ុន ឬកូរ៉េខាងត្បូងដែលជាមហាអំណាចគីឡូមធ្យមដែលមានទីតាំងភូមិសាស្ត្រនៅកៀកអាស៊ីអាគ្នេយ៍ កាណាដា ស្ថិតនៅឆ្ងាយ ហើយឥទ្ធិពលរបស់មហាអំណាចមួយនេះក៏នៅទាបទៀតនៅពេលបច្ចុប្បន្ន។