លោក ហ៊ុន ឡាក់៖ ការនាំចេញអង្ករក្នុងខែតុលាធ្លាក់ចុះច្រើន ដោយសារខ្វះស្រូវក្នុងស្តុក

ជាតិ

សេដ្ឋកិច្ច

លោក ហ៊ុន ឡាក់៖ ការនាំចេញអង្ករក្នុងខែតុលាធ្លាក់ចុះច្រើន ដោយសារខ្វះស្រូវក្នុងស្តុក

13, Nov 2018 , 8:39 pm

រូបភាព

ដោយ:

ភ្នំពេញ៖ ការនាំចេញអង្ករកម្ពុជាទៅទីផ្សារអន្តរជាតិក្នុងរយៈពេល១០ខែដើមឆ្នាំនេះបានចំនួន ៤៣,៥ ម៉ឺនតោន ធ្លាក់ចុះ ១៣ភាគរយ បើធៀបនឹងរយៈពេលដូចគ្នានៅឆ្នាំមុន។ នេះបើតាមតួលេខរបស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ។

ដោយឡែកការនាំចេញអង្ករក្នុងខែតុលានេះ ធ្លាក់ចុះដល់ទៅ ៥៤ភាគរយ។ ការធ្លាក់ចុះនេះ ត្រូវបានលោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា (CRF) លើកឡើថាមកពីកង្វះស្រូវក្នុងឃ្លាំង ដើម្បីផ្គត់ផ្គង់ការនាំចេញ។

លោក ហ៊ុន ឡាក់ អះអាងដូច្នេះថា៖«ការធ្លាក់ចុះនេះមកពីស្តុកស្រូវអត់មានក្នុងឃ្លាំង ដោយសារបាក់មកទិញច្រើននៅត្រីមាសទី១ ព្រោះត្រីមាសទី១មានទីផ្សារល្អ ដែលធ្វើឲ្យឈ្មួញពីប្រទេសជិតខាងប្រមូលទិញពីកសិករ ដូចនេះធ្វើឲ្យស្រូវស្តុកក្នុងប្រទេសថយចុះ»។ ប៉ុន្តែការនាំចេញអង្ករសម្រាប់ខែវិច្ឆិកា និងធ្នូ ត្រូវបាន អនុប្រធាន CRF រូបនេះរំពឹងថានឹងកើនឡើង។

ចំពោះការនាំចេញអង្ករទៅប្រទេសចិន គឺសម្រេចបាន ១១ម៉ឺនតោនក្នុងរយៈពេល១០ខែដើមឆ្នាំ២០១៨នេះ។

ក្នុងឆ្នាំ២០១៧ កន្លងទៅ កម្ពុជាបាននាំចេញអង្ករទៅក្រៅប្រទេសចំនួន ៦៣,៥ម៉ឺនតោន ធៀបនឹង ៥៤ម៉ឺនតោននៅឆ្នាំ២០១៦៕