អគ្គនាយករងពន្ធនាគារ៖ ភាពតូចចង្អៀតក្នុងពន្ធនាគារ ធ្វើឲ្យកើនឡើងអ្នកជំងឺឆ្លង និងជំងឺផ្លូវចិត្ត

ជាតិ

អគ្គនាយករងពន្ធនាគារ៖ ភាពតូចចង្អៀតក្នុងពន្ធនាគារ ធ្វើឲ្យកើនឡើងអ្នកជំងឺឆ្លង និងជំងឺផ្លូវចិត្ត

15, Nov 2018 , 8:19 pm

រូបភាព

លោក លីម សុខា អគ្គនាយករងពន្ធនានៃក្រសួងមហាផ្ទៃ ផ្នែកសុខាភិបាល

ដោយ: អ៊ូ សុខមាន (OU Sokmean)

បញ្ហាចង្អៀតណែនក្នុងពន្ធនាគារនៅកម្ពុជាបានធ្វើឲ្យអ្នកជាប់ឃុំខ្លួន ប្រឈមមុខនឹងការឆ្លងជំងឺ និងជំងឺផ្លូវចិត្ត។ នេះជាការលើកឡើងរបស់លោក លីម សុខា អគ្គនាយករងពន្ធនាគារនៃក្រសួងមហាផ្ទៃ ផ្នែកសុខាភិបាល។

លោក លឹម សុខា បាននិយាយថា ជំងឺឆ្លងដែលកើនឡើងក្នុងពន្ធនាគារ ដោយសារបញ្ហាចង្អៀតណែននោះ រួមមាន ជំងឺអេដស៍ ជំងឺរបេង និងជំងឺផ្សេងៗជាដើម។ ចំណែកជំងឺផ្លូវចិត្តរបស់ជនជាប់ឃុំភាគច្រើន កើតឡើងដោយសារ ការបាក់ទឹកចិត្ត គិតច្រើន តូចចិត្ត និងអ្នកខ្លះទៀតមានការសោកស្តាយនូវរឿងដែលខ្លួនបានប្រព្រឹត្ត ។

ថ្លែងក្នុងសន្និសីទលើកទី២ អាស៊ី និងប៉ាស៊ីហ្វិក ស្តីពីសុខុមាលភាពក្នុងពន្ធនាគារ(APCPH) នៅសណ្ឋាគារកាំបូឌីយ៉ាណា នាថ្ងៃទី១៤វិច្ជិកា លោក លឹម សុខា បានបញ្ជាក់ដូច្នេះថា ៖«ចំពោះជនជាប់ឃុំក្នុងពន្ធនាគារ ដែលយើងបានកំណត់ច្បាស់ថា គាត់មានបញ្ហារោគចិត្ត យើងឲ្យពួកគាត់ទៅបើកថ្នាំ នៅមន្ទីរពេទ្យមិត្តភាពខ្មែរ-សូវៀត។ ក្រៅពីនេះ យើងមានកម្មវិធីពង្រឹងស្មារតីតាមរយៈអង្គការផ្សេងៗ ដែលបានមកបង្រៀន ដើម្បីឲ្យពួកមានស្មារតីរឹងប៉ឹងឡើងវិញ»។

បើតាមលោក លឹម សុខា ភាពចង្អៀតណែននៅក្នុងពន្ធនាគារ បាននាំឲ្យមានកើនឡើងជំងឺឆ្លងនិងបញ្ហាផ្លូវចិត្ត ដែលមានអត្រារហូតដល់៧៥ភាគរយ នៃអ្នកជាប់ឃុំខ្លួនក្នុងពន្ធនាគារនៅកម្ពុជា។

ទន្និន័យរបស់អគ្គនាយករងពន្ធនានៃក្រសួងមហាផ្ទៃផ្នែកសុខាភិបាល បានបង្ហាញថាករណីជំងឺរបេងក្នុងពន្ធនាគារ នៅ ឆ្នាំ២០១៦ មានចំនួន១៣៩នាក់ ក្នុងចំណោមអ្នកជាប់ឃុំក្នុងពន្ធនាគារសរុបជាង៣ម៉ឺននាក់។ រីឯឆ្នាំ២០១៧ មានអ្នកជំងឺរបេង២១៤នាក់ ខណៈត្រឹមឆមាសទី១ ឆ្នាំ២០១៨នេះ មានជនជាប់ឃុំខ្លួនដែលផ្ទុកជំងឺរបេង ចំនួន១៩១នាក់។

សន្និសីទលើកទី២ អាស៊ី ប៉ាស៊ីហ្វិក លើសុខុមាលភាពកក្នុងពន្ធនាគារ(APCPH)ចាប់ពីថ្ងៃទី១៤-១៦វិច្ជិកា នៅរាជធានីភ្នំពេញ

ដោយឡែក ជនជាប់ឃុំមានជំងឺអេដស៍វិញ ក្នុងឆ្នាំ២០១៦ មាន៣៣០នាក់ ហើយកើនឡើង៣៩២នាក់ នៅឆ្នាំ២០១៧ ។ រីឯរយៈពេល៦ខែ ឆ្នាំ២០១៨ មានចំនួន១០៥នាក់។ គិតចាប់ពីឆ្នាំ២០១៤ ដល់ឆមាសទី១ឆ្នាំ២០១៨ មានអ្នកជំងឺអេសដ៍ ស្លាប់២៦នាក់ ក្នុងចំណោមអ្នកកើតជំងឺអេសដ៍សរុប ក្នុងពន្ធនាគារ ។ នេះបើតាមទន្និន័យរបស់អគ្គនាយករងពន្ធនា។

យោងតាមទន្និន័យរបស់គណៈកម្មាធិការអន្តរជាតិនៃកាកបាទក្រហមICRC ក្នុងតំបន់អាស៊ីប៉ាស៊ីហ្វិក មានជនជាប់ឃុំក្នុងពន្ធនាគារ ប្រហែល៤លាននាក់ ក្នុងមួយឆ្នាំៗ។ ជនឃុំខ្លួនទាំងនោះភាគច្រើន គឺមកពីសហគមន៍ដែលងាយរងគ្រោះ បានជាប់ពន្ធនាគារ។

សូមបញ្ជាក់ថា គណៈកម្មាធិការអន្តរជាតិនៃកាកបាទក្រហមICRC បានរៀបចំសន្និសីទលើកទី២ អាស៊ី ប៉ាស៊ីហ្វិក លើសុខុមាលភាពកក្នុងពន្ធនាគារ(APCPH) ក្នុងរយៈពេល៣ថ្ងៃ ចាប់ពីថ្ងៃទី១៤-១៦វិច្ជិកា ឆ្នាំ២០១៨ នៅសណ្ឋាគារកាំបូឌីយ៉ាណា រាជធានីភ្នំពេញ។ សន្និសីទលើកទី២ មានការចូលរួមពីសំណាក់ មន្ត្រីរដ្ឋាភិបាល និងអ្នកជំនាញផ្នែកសុខភាពពន្ធនាគារ ចំនួន១៧ប្រទេស ដើម្បីជួបជុំគ្នាពិភាក្សាពីបញ្ហាខាងលើ និងចែករំលែក ក៍ដូចជាការបង្កើនការសហការដៃគូជាអន្តរជាតិ លើការផ្តល់សុខុមាលភាពក្នុងពន្ធនាគារនៅតំបន់ និងលើសពីនេះផងដែរនេះ៕