កម្ពុជា ចាត់ទុកជប៉ុន ថាជាចំណែកដ៏សំខាន់ ក្នុងការកសាងសេដ្ឋកិច្ចអាស៊ាន

ជាតិ

នយោបាយជាតិ

កម្ពុជា ចាត់ទុកជប៉ុន ថាជាចំណែកដ៏សំខាន់ ក្នុងការកសាងសេដ្ឋកិច្ចអាស៊ាន

15, Nov 2018 , 8:59 pm

រូបភាព

ពីឆ្វេងទៅស្តាំ៖ នាយករដ្ឋមន្រ្តីម៉ាឡេស៊ី, ទីប្រឹក្សារដ្ឋមីយ៉ាន់ម៉ា, ប្រធានាធិបតីហ្វីលីពីន, នាយករដ្ឋមន្រ្តីវៀតណាម, នាយករដ្ឋមន្ត្រីជប៉ុន, នាយករដ្ឋមន្រ្តីសិង្ហបុរី, នាយករដ្ឋមន្រ្តីថៃ, ស្តេចស៊ុលតង់ព្រុយណេ, នាយករដ្ឋមន្រ្តីកម្ពុជា, នាយករដ្ឋមន្រ្តីឡាវ។ រូបពីហ្វេសប៊កសម្តេច ហ៊ុន សែន។

ដោយ:

ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានចាត់ទុកជប៉ុនថា ជាប្រទេសដ៏សំខាន់មួយ ដែលបានចូលរួមចំណែកកសាងសេដ្ឋកិច្ចអាស៊ាន និងធ្វើសមាហរណកម្មអាស៊ាន ដើម្បីកាត់បន្ថយគម្លាតក្នុងតំបន់ និងកសាងធនធានមនុស្សរបស់អាស៊ាន។ ការថ្លែងរបស់នាយករដ្ឋមន្ត្រីកម្ពុជា គឺធ្វើឡើងក្នុងកិច្ចប្រជុំអាស៊ាន-ជប៉ុនលើកទី២១ ដែលប្រព្រឹត្តទៅនៅប្រទេសសិង្ហបុរី នាថ្ងៃទី១៤ ខែវិច្ឆិកា ឆ្នាំ២០១៨។

នៅចំពោះមុខលោក ស៊ិនហ្ស៊ូ អាបេ នាយករដ្ឋមន្ត្រីជប៉ុន និងមេដឹកនាំនៃបណ្តាប្រទេសអាស៊ាន សម្តេច ហ៊ុន សែន បានលើកឡើងថា ជប៉ុននៅតែជាដៃគូសេដ្ឋកិច្ចដ៏សំខាន់របស់អាស៊ាន ក្នុងការបង្កើនទំហំពង្រីកវិសាលភាពនៃពាណិជ្ជកម្មអាស៊ាន។

មេដឹកនាំកម្ពុជា បានថ្លែងយ៉ាងដូច្នេះថា៖«កម្ពុជា សូមវាយតម្លៃខ្ពស់ចំពោះការរួមចំណែកដ៏សំខាន់ របស់ជប៉ុន ក្នុងការកសាងសហគមន៍អាស៊ាន និងការធ្វើសមាហរណកម្មអាស៊ាន តាមរយៈមូលនិធិជប៉ុនសម្រាប់សមាហរណកម្មអាស៊ាន ក៏ដូចជាក្នុងការបន្តគាំទ្រដល់ការអនុវត្តផែនការមេតភ្ជាប់អាស៊ាន២០២៥ និងផែនការការងារទី៣ នៃគំនិតផ្តួចផ្តើមសម្រាប់សមាហរណកម្មអាស៊ាន ២០១៦-២០២០ ដើម្បីកាត់បន្ថយគម្លាតអភិវឌ្ឍន៍ក្នុងតំបន់ ជាពិសេសការគាំទ្រដល់ការកសាងធនធានមនុស្សរបស់អាស៊ាន និងការលើកកម្ពស់ទំនាក់ទំនងរវាងប្រជាជន និងប្រជាជន»។ នេះបើតាមសារលើលើទំព័រហ្វេសប៊ុករបស់សម្តេច ហ៊ុន សែន។

ជាមួយគ្នានេះផងដែរ មេដឹកនាំអាស៊ាន ក៏គាំទ្រចំជរបស់ជប៉ុន ព្រមទាំងបានលើកទឹកចិត្តឲ្យបន្តកិច្ចសន្ទនាដើម្បីបង្កើតការយោគយល់ឲ្យកាន់តែប្រសើរឡើង។

សូមបញ្ជាក់ថា សម្តេច ហ៊ុន សែន បានដឹកនាំគណៈប្រតិភូកម្ពុជា ទៅប្រទេសសិង្ហបុរី ដើម្បីចូលរួមប្រជុំកំពូលអាស៊ានលើកទី៣៣ ចាប់ពីថ្ងៃទី១៣ ដល់ថ្ងៃទី១៥ ខែវិច្ឆិកា ឆ្នាំ២០១៨ ក្រោមប្រធានប «ភាពរឹងមាំ និង នវានុវត្តន៍របស់អាស៊ាន»។ កិច្ចប្រជុំអាស៊ាន-ជប៉ុនលើក២១ ជាកិច្ចប្រជុំមួយដោយឡែក ដែលត្រូវបានបញ្ជូលទៅក្នុងកិច្ចប្រជុំអាស៊ានលើកទី៣៣៕