អន្តរជាតិ
ខុសពីអាមេរិកដែលបន្ទោស ចិនប្រកាសគាំទ្រចំណាត់ការមីយ៉ាន់ម៉ាក្នុងការដោះស្រាយវិបត្តិរ៉ូហ៊ីងយ៉ា
×![]()
បន្ទាប់ពីក្រុងវ៉ាស៊ីតោនដាក់សម្ពាធមេដឹកនាំមីយ៉ាន់ម៉ាឲ្យដោះស្រាយបញ្ហាវិបត្តិជនភៀសខ្លួន រ៉ូហ៊ីងយ៉ា នៅរដ្ឋរ៉ាក់ខាន (Rakhine) និងផ្តន្ទាទោសអ្នកទទួលខុសត្រូវរឿងធ្វើទុក្ខបុកម្នេញជនជាតិភាគតិចនេះ ក្រុងប៉េកាំងស្រាប់ចេញមុខគាំទ្រមីយ៉ាន់ម៉ា។ មេដឹកនាំចិនអះអាងថាខ្លួនគាំទ្ររាល់ចំណាត់ការរបស់មីយ៉ាន់ម៉ាក្នុងការធានាស្ថិរភាពក្នុងស្រុក និងដោះស្រាយវិបត្តិជនភៀសខ្លួនឲ្យមានប្រសិទ្ធភាព។
នាយករដ្ឋមន្ត្រីចិនលោក លី ខឹឈាំង បានប្រាប់ទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី ក្នុងជំនួបទ្វេភាគីនៅសិង្ហបុរីថ្ងៃ ១៥ ខែវិច្ឆិកាថា រដ្ឋាភិបាលលោកគាំទ្ររាល់ការប្រឹងប្រែងរបស់មីយ៉ាន់ម៉ាក្នុងការធានាស្ថិរភាព និងធានាឲ្យបាននូវការធ្វើមាតុភូមិនិវត្តន៍របស់ប្រជាជនរ៉ូហ៊ីងយ៉ាពីបង់ក្លាដែសដែរ។
បើតាមការបញ្ជាក់របស់ក្រសួងការបរទេសចិនដកស្រង់ដោយទូរទស្សន៍សិង្ហបុរី Channel News Asia លោក លី បាននិយាយដូច្នេះ៖« ភាគីចិនគាំទ្រការខិតខំរបស់មីយ៉ាន់ម៉ាក្នុងការធានាស្ថិរភាពក្នុងស្រុក ហើយយើងក៏គាំទ្រមីយ៉ាន់ម៉ា និងបង់ក្លាដែសក្នុងការដោះស្រាយវិបត្តិនៅរដ្ឋរ៉ាក់ខានតាមការសន្ទនា និងប្រឹក្សាយោបល់គ្នាដែរ»។
ប្រមុខរដ្ឋាភិបាលចិនរូបនេះបន្តថា ចិនមានឆន្ទៈពេញលេញក្នុងការផ្តល់គាំទ្រជាចាំបាច់ដល់ភាគីពាក់ព័ន្ធក្នុងការដោះស្រាយបញ្ហានេះ។ ប៉ុន្តែលោកមិនបានបកស្រាយឲ្យបានច្បាស់លាស់ថា តើការគាំទ្រនោះបែបណាឡើយ។
ឆ្លើយតបនឹងការគាំទ្រនេះ លោកស្រី ស៊ូជី ដែលម្ចាស់ពានរង្វាន់ណូបែលសន្តិភាព ប៉ុន្តែរងការថ្កោលទោសជាបន្តបន្ទាប់ដោយសារលោកស្រីមិនចេញមុខឈឺឆ្អាលជុំវិញការធ្វើទុក្ខបុកម្នេញជនជាតិភាគតិចម៉ូស្លីមនេះ បានថ្លែងអំណរគុណចំពោះភាគីចិនដែលបន្តគាំទ្រមីយ៉ាន់ម៉ា។ លោកស្រី ស៊ូជី សង្កត់ធ្ងន់ថា លោកស្រីសប្បាយចិត្តដែលចិនយល់ច្បាស់ពីស្ថានភាពមីយ៉ាន់ម៉ានិងតែងតែជួយដល់ការកសាងសន្តិភាព និងដោះស្រាយបញ្ហានៅរដ្ឋរ៉ាក់ខាន់។
តាមពិតទៅ ប្រកាសជំហរគាំទ្រមីយ៉ាន់ម៉ាពីសំណាក់តំណាងក្រុងប៉េកាំងនេះកើតឡើងបន្ទាប់ពីតំណាងក្រុងវ៉ាស៊ីនតោនអនុប្រធានាធិបតី ម៉ៃ ផេន ជួបលោកស្រី ស៊ូជី និងប្រាប់លោកស្រីត្រង់ៗថា ហិង្សា និងការធ្វើទុក្ខបុកម្នេញប្រជាជនរ៉ូហ៊ីងយ៉ាពីសំណាក់ក្រុមយោធារហូតបណ្តាលឲ្យមានជនភៀសខ្លួនជាង ៧០ម៉ឺននាក់ទៅបង់ក្លាដែសនោះជារឿងដែលគ្មានអ្វីត្រូវដោះសារឡើយ។
លោក ផេន និយាយខ្លាំងៗបែបនេះ៖ «ខ្ញុំបារម្ភខ្លាំងណាស់ដោយបានលឺពីការវិវត្តដែលកើតឡើងជុំវិញជនភៀសខ្លួនរ៉ូហ៊ីងយ៉ា។ នេះជាសោកនាដកម្មដែលធ្វើឲ្យប្រជាជនអាមេរិករាប់លាននាក់សោកសង្រេង។ ហិង្សានិងការធ្វើទុកបុកម្នេញលើប្រជាជនរ៉ូហ៊ីងយ៉ាពីសំណាក់យោធានិងក្រុមឧក្រិដ្ឋជននោះគ្មានអ្វីត្រូវដោះសារឡើយ»។
ក្រៅពីនេះ លោក ផេន ក៏ព្រួយបារម្ភខ្លាំងពីការគ្រប់គ្រងបញ្ហា និងការដាក់ទោសទណ្ឌអ្នកដែលប្រព្រឹត្តហិង្សាដែលធ្វើឲ្យមនុស្សរាប់សែននាក់រងការឈឺចាប់ និងត្រូវបាត់បង់ជីវិតនេះ។ ផែនការបញ្ជូនជនភៀសខ្លួនរ៉ូហ៊ីងយ៉ាពីបង់ក្លាដែសត្រឡប់មកស្រុកកំណើតក៏ជារឿងដែលលោក ព្រួយបារម្ភដូចគ្នា៕
Tag:
មីយ៉ាន់ម៉ា
ចិន
រ៉ូហ៊ីងយ៉ា
© រក្សាសិទ្ធិដោយ thmeythmey.com
