មន្ត្រី៖ សម្តេច ហ៊ុន សែន ឲ្យក្រសួងពីរ ជួយរៀបចំបុណ្យលោកតា ប្រាជ្ញ ឈួន

ជាតិ

សិល្បះ

មន្ត្រី៖ សម្តេច ហ៊ុន សែន ឲ្យក្រសួងពីរ ជួយរៀបចំបុណ្យលោកតា ប្រាជ្ញ ឈួន

17, Nov 2018 , 12:59 pm

រូបភាព

សម្តេច ហ៊ុន សែន ឧបត្ថម្ភថវិកាដល់លោក ប្រាជ្ញ ឈួន និង លោក គង់ ណៃ (ពាក់វែនតាខ្មៅ) កាលអំឡុងខែកញ្ញា ឆ្នាំ២០១៧

ដោយ: អ៊ូ សុខមាន (OU Sokmean)

សម្តេចនាយករដ្ឋមន្ត្រី ហ៊ុន សែន បានប្រាប់ក្រសួងព័ត៌មាន និង ក្រសួងវប្បធម៌ ឲ្យជួយគិតគូររួមគ្នាលើការរៀបចំពិធីបុណ្យសពអ្នកប្រាជ្ញចាប៉ីដែងវែង ប្រាជ្ញ ឈួន។ នេះបើតាមន្ត្រីជាន់ខ្ពស់ម្នាក់របស់ក្រសួងវប្បធម៌ ដែលប្រាប់អ្នកសារព័ត៌មាននៅក្នុងពិធីបុណ្យរបស់ព្រឹទ្ធភិរម្យវោហារ ប្រាជ្ញ ឈួន។

លោក ថៃ នរៈសត្យា អ្នកនាំពាក្យក្រសួងវប្បធម៌ សម្តែងការសោកស្តាយយ៉ាងខ្លាំង ចំពោះការបាត់បង់លោក ប្រាជ្ញ ឈួន ដែលលោក ចាត់ទុកជាមរតកមនុស្សរស់ដ៏សំខាន់ផ្នែកសិល្បៈ។ លោក ប្រាប់សារព័ត៌មានថ្មីៗតាមទូរសព្ទថាបែបនេះ៖«យើង បានបំពេញកាតព្វកិច្ចរួចហើយ ក្នុងការជួយឧបត្ថម្ភគាត់កន្លងមក។ មិនមែនយើងមិនយកចិត្តទុកដាក់ពីសិល្បករចាស់ៗរបស់យើងនោះទេ»។

សពលោក ប្រាជ្ញ ឈួន តម្កល់នៅក្នុងវត្តបទុមវត្តី រាជធានីភ្នំពេញ រហូតដល់ថ្ងៃបូជា គឺនៅថ្ងៃទី១៩ ខែវិច្ឆិកា ឆ្នាំ២០១៨។ តែវិធីបុណ្យគម្រង់៧ថ្ងៃ នឹងរៀបចំនៅស្រុកកំណើតរបស់លោក ក្នុងភូមិសម៉រក្រោម ឃុំខ្វាង ស្រុកទ្រាំង ខេត្តតាកែវ។

សិល្បករចាប៉ីដងវែងកំពូលរូបនេះ បានទទួលមរណភាពក្នុងវ័យ៨២ឆ្នាំ ដោយរោគាពាធ កាលពីវេលាម៉ោង១:៣០នាទី ឈានចូលថ្ងៃទី១៧ ខែវិច្ឆិកានេះ។ លោក មានស្ថានភាពជំងឺរ៉ាំរ៉ៃ ដូចជាលើសឈាម តម្រង់នោម បេះដូង និងសួត ជាង១០ឆ្នាំហើយ។

កាលពីថ្ងៃទី៥ ខែវិច្ឆិកា ស្ថានភាពជំងឺរបស់លោក ធ្វើទុក្ខខ្លាំង ដែលជំរុញឲ្យគ្រួសារ សម្រេចចិត្តបញ្ជូនលោក ទៅព្យាបាលនៅមន្ទីរពេទ្យបង្អែកខេត្តតាកែវ ហើយបន្ទាប់មក បញ្ជូនបន្តទៅមន្ទីរពេទ្យកាល់ម៉ែត្រ កាលពីថ្ងៃទី៨ ខែវិច្ឆិកា។

លោក ប្រាជ្ញ ឈួន បានចាប់អាជីពជាអ្នកចាប៉ី ជាង៧០ឆ្នាំមកហើយ។ កាលពីអំឡុងឆ្នាំ២០១២ លោក បានទទួលគោរមងារជា «ភិរម្យវោហារ» ពីព្រះមហាក្សត្រ៕