ភ្នំពេញ៖ អ្នកជំនាញ និងមន្ត្រីរដ្ឋាភិបាល យល់ដូចគ្នាថា កម្ពុជាត្រូវកែលម្អប្រព័ន្ធភស្ដុភារ ដែលទាក់ទងនឹងការសម្រួលចរាចរផលិតផល ដើម្បីជំរុញវិសាលភាពនៃការធ្វើពាណិជ្ជកម្មតាមអនឡាញ (E-Commerce) ។ ជាមួយគ្នានេះ លោក ស៊ុន ចាន់ថុល ក្នុងនាមក្រសួងសាធារណការ និងដឹកជញ្ជូន ប្ដេជ្ញានឹងធ្វើឲ្យប្រព័ន្ធភស្ដុរភា (Logistics) នេះ ដើរទន្ទឹមគ្នានឹងប្រទេសដទៃទៀត។
អ្នកជំនាញពាក់ព័ន្ធនឹងការពាណិជ្ជកម្មតាមអនឡាញ មកពីផ្នែកឯកជន និងរដ្ឋ បានជជែកគ្នាក្នុងវេទិកាស្ដីពីភ្ជាប់ទំនាក់ទំនងកម្ពុជា ដែលរៀបចំដោយទីភ្នាក់ងារអភិវឌ្ឍន៍សហប្រជាជាតិ (UNDP) និងក្រុមប្រឹក្សាជាតិភស្ដុភារកម្ពុជា នៅថ្ងៃទី១៦ខែវិច្ឆិកា។ តំណាងក្រុមហ៊ុន Shenzhen 4PX Express ដែលស្ថិតក្រោមចំណុះក្រុមហ៊ុន Alibaba ក៏ចូលរួមផងដែរ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានក្រុមប្រឹក្សាជាតិភស្ដុភារកម្ពុជា លើកឡើងថា រដ្ឋាភិបាលនឹងបន្តខិតខំរៀបចំប្រព័ន្ធភស្ដុភាឲ្យបានល្អ ដើម្បីឆ្លើយតបកំណើននៃការលក់ផលិតផលតាមអនឡាញ ស្របគ្នានឹងផែនការពង្រឹងសហគ្រាសធុនតូច និងមធ្យម (SME) ។
«ក្រសួងសាធារណការ និងដឹកជញ្ជូន ក៏ត្រូវការប្រឹងប្រែងធ្វើយ៉ាងណាឲ្យប្រព័ន្ធភស្ដុភាររបស់កម្ពុជា អាចប្រកួតប្រជែងនឹងគេបាន គឺយើងធ្វើឲ្យមានប្រសិទ្ធភាព តម្លាភាព ឲ្យបានលឿន តម្លៃសមរម្យ ដែលអាចជួយពាណិជ្ជកម្មតាមអនឡាញ»។ លោក ស៊ុន ចាន់ថុល ថ្លែងបែបនេះក្នុងវេទិកាស្ដីពីភ្ជាប់កម្ពុជា។
អនុប្រធានក្រុមប្រឹក្សាជាតិភស្ដុភារកម្ពុជារូបនេះ បន្ថែមថា ការលើកកម្ពស់ប្រព័ន្ធភស្ដុភារនៅកម្ពុជា មិនត្រឹមតែជាប់ទាក់ទងនឹងកិច្ចការរបស់ក្រសួងសាធារណការ និងដឹកជញ្ជូន តែជាប់ពាក់ព័ន្ធនឹងគយ កំពង់ផែ ការលើកដាក់ទំនិញ ជាដើម។ លោក ស៊ុន ចាន់ថុល បានបន្ថែមថា ក្រសួងសាធារណការ បានរៀបចំប្លង់មេសម្រាប់ប្រព័ន្ធភស្ដុភារនេះ ដែលនឹងជួយគាំទ្រដល់ការធ្វើ E-Trade ។
UNDP បានឲ្យដឹងក្នុងសេចក្ដីប្រកាសព័ត៌មានរបស់ខ្លួនថា ខណៈពេលដែលនៅមានឧបសគ្គជាច្រើនត្រូវជំនះ ដូចជា ការលំបាកដែលធ្វើឲ្យរាំងស្ទះដល់ការធ្វើចរាចរផលិតផលឲ្យកាន់តែលឿន និងបញ្ហាសេវាភស្ដុភារកម្ម ជាដើម វេទិកាស្ដីពីភ្ជាប់កម្ពុជា មានគោលដៅស្វែងរកដំណោះស្រាយ ដើម្បីជំនះចំណុចរាំងស្ទះទាំងនេះ និងធ្វើឲ្យសេវានានាកាន់តែប្រសិទ្ធភាព។
លោកស្រី Pauline Tamesis តំណាងប្រចាំប្រទេសរបស់ UNDP អះអាងថា UNDP គាំទ្ររដ្ឋាភិបាលកម្ពុជាក្នុងកសាងប្រព័ន្ធសេដ្ឋកិច្ចមួយ ដែលអាចជំរុញដល់ការធ្វើពាណិជ្ជកម្មតាមអនឡាញ តាមរយៈការបង្កើតគោលច្បាប់ ការស្វែងរកមូលនិធិ កិច្ចការបច្ចេកទេសផ្សេងៗ និងការរៀនសូត្រពីប្រទេសដទៃ។
លោកស្រីបន្ថែមដូចនេះទៀតថា៖« ការធ្វើពាណិជ្ជកម្មតាមប្រព័ន្ធអេឡិចត្រូនិកអាចជួយគាំទ្រដល់សកម្មភាពផលិតកម្ម ការបង្កើតការងារសមរម្យ ជំរុញសហគ្រិនភាព ការច្នៃប្រឌិដ្ឋ ព្រមទាំងលើកទឹកចិត្តឲ្យ SME អភិវឌ្ឍន៍បន្ថែម»។
គំនិតផ្ដួចផ្ដើមវិថីមួយ ក្រវាត់មួយរបស់ចិន ក៏ស្ថិតក្នុងកិច្ចពិភាក្សានាវេទិកាដែលជំរុញការចាប់យកឱកាសធ្វើពាណិជ្ជកម្មតាមអេឡិចត្រូនិកនេះដែរ។ លោក ស៊ុន ចាន់ថុល ឲ្យដឹងថា One Belt One Road ជាច្រកសម្រាប់សម្រួល និងពង្រីកវិសាលភាព ការធ្វើពាណិជ្ជកម្មអនឡាញ។ លោកថ្លែងថា៖«ឧទាហរណ៍យើងដឹកទំនិញតាមពីចិន មកកម្ពុជា ឬពីកម្ពុជា ទៅមីយ៉ាន់ម៉ា ត្រូវដឹងតាមណា? ដូចនេះគំនិតផ្ដួចផ្ដើមនេះ ជួយការតភ្ជាប់បានច្រើន ហយវាសំខាន់ណាស់ សម្រាប់ការធ្វើពាណិជ្ជកម្ម ហើយកម្ពុជាក៏ចូលរួមក្នុងគម្រោងការនេះដែរ»៕