បារាំងផ្តល់ប្រាក់ជិត១០០លានដុល្លារ លើគម្រោងអភិវឌ្ឍចំនួន៣នៅកម្ពុជា

ជាតិ

សេដ្ឋកិច្ច

បារាំងផ្តល់ប្រាក់ជិត១០០លានដុល្លារ លើគម្រោងអភិវឌ្ឍចំនួន៣នៅកម្ពុជា

17, Nov 2018 , 9:39 pm

រូបភាព

លោក អូន ព័ន្ឋមុនីរ័ត្ន រដ្ឋមន្រ្តីក្រសួងសេដ្ឋកិច្ច និងលោក Rémi GENEVEY ប្រធាននាយកដ្ឋានអឺរ៉ុបខាងកើត មជ្ឈឹមបូព៌ា និងអាស៊ី នៃទីស្នាក់ការកណ្តាល របស់ AFD បានចុះហត្ថលេខាលើកិច្ចព្រមព្រៀងផ្តល់ហិរញ្ញប្បទាន ដល់កម្ពុជា

ដោយ: អ៊ូ សុខមាន (OU Sokmean)

ភ្នំពេញ៖ ទីភ្នាក់ងារបារាំងសម្រាប់ការអភិវឌ្ឍ (AFD) បានព្រមព្រៀងផ្តល់ហិរញ្ញប្បទានសហប្រតិបត្តិការសម្រាប់គម្រោង និងកម្មវិធី៣ នៅកម្ពុជា ក្នុងទំហំទឹកប្រាក់៨៤.៦៧លានអឺរ៉ូ (ប្រមាណ៩៦.៤លានដុល្លារអាមេរិក)។ ការព្រមព្រៀងនេះ បានធ្វើឡើងបន្ទាប់ពី លោក អូន ព័ន្ឋមុនីរ័ត្ន រដ្ឋមន្ត្រីក្រសួងសេដ្ឋកិច្ច និងលោក Rémi GENEVEY ប្រធាននាយកដ្ឋានអឺរ៉ុបខាងកើត មជ្ឈឹមបូព៌ា និងអាស៊ី នៃទីស្នាក់ការកណ្តាល របស់ AFD បានចុះហត្ថលេខារួមគ្នា កាលពីថ្ងៃទី១៦វិច្ឆិកា ឆ្នាំ២០១៨ នៅទីស្តីការក្រសួង។

ចំនួនប្រមាណ៩៦.៤លានដុល្លារនេះ ត្រូវបានរៀបចំ និងបែងចែក ទៅតាមគម្រោង និងកម្មវិធីនីមួយៗ នៃកិច្ចព្រមពៀងខាងលើ៖

១. កម្មវិធីគ្រប់គ្រងធនធានទឹក និងការផ្លាស់ប្តូរវិស័យកសិកម្មសម្រាប់កម្ពុជា ដំណាក់កាលទី១ ជាឥណទានសម្បទានប្រមាណ៦៣លានដុលា្លរ។ កម្មវិធីនេះមានទិសដៅអនុវត្តបន្ត ពីគម្រោងដែលផ្តល់ឥណទានលើកដំបូងរបស់AFD ក្នុងការបន្តពង្រីកការងារស្តារព្រែក និងសាងសង់ហេដ្ឋារចនាសម្ព័ន្ធធារាសាស្ត្រ ប្រព័ន្ធស្រោចស្រព និងប្រព័ន្ធ រំដោះទឹក។ គម្រោងនេះនឹងអនុវត្តន៍ ក្នុងខេត្តគោលដៅចំនួន៥ គឺខេត្តកណ្តាល បាត់ដំបង ព្រះវិហារ សៀមរាប និងកំពង់ធំ ដែលមានលទ្ធភាពអាចស្រោចស្រព លើផ្ទៃដីកសិកម្មបានប្រមាណជាង ២០,០០០ ហិកតា ។

ជាមួយគ្នានេះ សហគមន៍អឺរ៉ុបតាមរយៈមូលនិធិវិនិយោគអាស៊ី-អឺរ៉ុប (EU/Asian Investment Facility “AIF”) ក៏នឹងផ្តល់ហិរញ្ញប្បទានឥតសំណង ប្រមាណ១៣លានដុល្លារ សម្រាប់ធ្វើសហហិរញ្ញប្បទានដល់កម្មវិធីនេះផងដែរ ។ កម្មវិធីនេះនឹងជួយគាំទ្រដល់ផែនការយុទ្ធសាស្ត្រ អភិវឌ្ឍន៍វិស័យធនធានទឹក និងឧតុនិយមឆ្នាំ ២០១៨-២០២៣។

២. ហិរញ្ញប្បទានឥតសំណងប្រមាណ២៨លានដុល្លារ ប្រើសម្រាប់កម្មវិធីជំរុញកំណើនវិស័យជលផល ប្រកបដោយចីរភាព និងបរិយាប័ន្ន (ផ្នែកវារីវប្បកម្ម)។ ថវិកានេះ ជាហិរញ្ញប្បទានឥតសំណង របស់EU ក្នុងគោលដៅគាំទ្រកំណើនប្រកបដោយនិរន្តរភាព ភាពធន់ទ្រាំនឹងបម្រែបម្រួលអាកាសធាតុ និងបរិយាប័ន្ននៃវិស័យជលផលនៅកម្ពុជា។ គម្រោងនេះ រួមចំណែកយ៉ាងសំខាន់ដល់ការធានាសន្តិសុខស្បៀង និងការអភិវឌ្ឍសេដ្ឋកិច្ចសង្គម និងអនុវត្តយុទ្ធសាស្ត្រអភិវឌ្ឍវារីវប្បកម្មជាតិ និងក្របខណ្ឌផែនការយុទ្ធសាស្ត្រសម្រាប់វិស័យជលផលឆ្នាំ២០១០-២០១៩។

៣. ថវិកាប្រមាណ៥.៣១លានដុល្លារ ជាហិរញ្ញប្បទានឥតសំណងប្រើសម្រាប់គម្រោងគ្រប់គ្រងទឹកស្អាត និងអនាម័យតាមខេត្ត។ គម្រោងនេះ គ្រោងនឹងចំណាយថវិកាសរុបចំនួនប្រមាណ១១០.៨លានដុល្លារអាមេរិក។ ក្នុងនោះហិរញ្ញប្បទានសម្បទានសហប្រតិបត្តិការពីADB ប្រមាណ៥០លានដុល្លារ និងឥណទានសម្បទានពីAFD ប្រមាណ៤៥.៥ លានដុល្លារ។

ដោយឡែកថវិកាប្រមាណ ៥.៣១លានដុល្លារនេះ ហិរញ្ញប្បទានឥតសំណងរបស់មូលនិធិជប៉ុន សម្រាប់យន្តការផ្តល់ឥណទានរួមគ្នា (JFJCM) ចំនួន១០លានដុល្លារអាមេរិក។ គម្រោងនេះនឹងចូលរួមចំណែក ក្នុងការអនុវត្តយុទ្ធសាស្ត្រជាតិ ស្តីពីវិស័យផ្គត់ផ្គង់ទឹកស្អាត និងអនាម័យជនបទ ឆ្នាំ២០១១-២០២៥ សំដៅបង្កើនការផ្តល់សេវាកម្មទឹកស្អាត និងអនាម័យ ជូនប្រជាពលរដ្ឋដែលរស់នៅតាមទីប្រជុំជន និងក្រុង បាត់ដំបង កំពង់ចាម ព្រះសីហនុ និងសៀមរាប ។

ចាប់ពីឆ្នាំ ១៩៩៣ រហូតមកដល់បច្ចុប្បន្ន រដ្ឋាភិបាលនៃសាធារណរដ្ឋបារាំងតាមរយៈ AFD បានផ្ដល់ហិរញ្ញប្បទានសរុបដល់កម្ពុជាប្រមាណជាង៥៥៤លានអឺរ៉ូ (ប្រមាណ៦៣២ លានដុល្លារអាមេរិក)៕