ជាតិ
បទយកការណ៍ / បទសម្ភាសន៍
លោក ភារម្យ រកចំណូលបានសមរម្យលើសេវាដាក់សេះឲ្យភ្ញៀវជិះថតនៅអង្គរវត្ត
× សៀមរាប៖ ភ្ញៀវទេសចរដែលទៅកម្សាន្តនៅប្រាសាទអង្គរវត្ត ច្បាស់ជាឃើញសេះដែលគេដាក់សម្រាប់ឱ្យទេសចរជិះថតរូបជាក់ជាមិនខាន។ ខ្លះប្រហែលបានថតរូប ពេលជិះសេះនោះក៏មិនដឹង។ នៅជ្រុងខាងត្បូង ជិតបណ្ណាល័យ លោក ភារម្យ កំពុងមមាញឹកក្នុងការហៅ និងរៀបចំឱ្យភ្ញៀវចូលជិះ ថតរូបលេងជាមួយសេះរបស់លោក។ របរនេះធ្វើឱ្យលោក ភារម្យ រីករាយជាខ្លាំង ដ្បិតមិនសូវនឿយហត់ រីឯចំណូលក៏បានសមរម្យផងដែរ។
អស់រយៈពេល៥ឆ្នាំមកហើយ ដែលលោក ភារម្យ ប្រកបរបរដាក់សេះឱ្យទេសចរជិះថតលេងនៅប្រាសាទអង្គរវត្ត តពីបងថ្លៃលោក ដែលចាប់អាជីពនេះតាំងពីឆ្នាំ ១៩៩៣មក។ ក្នុងមួយថ្ងៃលោកអាចរកចំណូលពីរបរនេះ ចាប់ពី៥ម៉ឺន រហូតដល់ ៣០ម៉ឺន ទៅតាមថ្ងៃធម្មតា និងពេលបុណ្យទានម្ដងៗ។ ចំពោះសេវាជិះថត សម្រាប់ភ្ញៀវខ្មែរតម្លៃ ១ដុល្លារ ឯបរទេស ២ដុល្លារ ពួកគេអាចជិះថតគ្រប់កាយវិការដោយមានជាងថតនៅក្បែរនោះស្រាប់។
ដ្បិតថា របរនេះមានភាពងាយស្រួលក៏ពិតមែន តែលោក ភារម្យ ត្រូវចំណាយថវិកាក្នុងការទិញសេះល្អ និងចាយពេលសម្រាប់បង្វិកវាទម្រាំអាចថ្នឹក អាចឱ្យភ្ញៀវជិះបាន។ សេះរបស់លោក ភារម្យ បច្ចុប្បន្នគឺលោកទើបនឹងទិញក្នុងតម្លៃជិត ៣០០០ដុល្លារ ពីខេត្តបន្ទាយមានជ័យ ហើយប្រើពេលប្រមាន ៣ខែដើម្បីបង្វិកវា។ លោក ភារម្យ បានប្រាប់ពីវិធីសាស្ដ្រខ្លះៗក្នុងការបង្វឹកសេះ ដូចជាពេលទិញមកភ្លាមត្រូវឧស្សាហ៍ជិះវាកុំឱ្យវាស្រៀវខ្នង ត្រូវម៉ាស្សាខ្នងមួយថ្ងៃពី២ទៅ៣ដង ឱ្យស៊ីឆ្អែតៗ ពិសេសឱ្យវាស្គាល់មុខម្ចាស់ដើម្បីងាយស្រួលបញ្ជាវា។ល។
ដោយសារជារបរងាយស្រួល មិនសូវហត់ គ្រាន់តែចំណាយលើការថែទាំសេះ លោក ភារម្យ ប្រាប់ថា លោកនឹងបន្តអាជីពនេះជារហូត និងអាចតកូនតចៅផង៕
© រក្សាសិទ្ធិដោយ thmeythmey.com