អន្តរជាតិ
កិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកបញ្ចប់ទៅដោយគ្មានកិច្ចព្រមព្រៀងណាមួយ
រូបភាព៖ AFP
×![]()
ដោយ: VOA
កិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកហៅកាត់ថា APEC នៅក្នុងប្រទេស ប៉ាពូអាស៊ីនូវែលហ្គីណេ (Papua New Guinea) បានបញ្ចប់កាលពីថ្ងៃអាទិត្យដោយគ្មានកិច្ចព្រមព្រៀងផ្លូវការណាមួយ ដែលនេះជាដំបូងបង្អស់កើតឡើងនៅក្នុងប្រវត្តិសាស្ត្រនៃកិច្ចប្រជុំកំពូលដែលមានអាយុកាលជិត៣០ឆ្នាំមកនេះ។
ខណៈមានសង្គ្រាមពាណិជ្ជកម្មរវាងសហរដ្ឋអាមេរិកនិងចិន មេដឹកនាំនានាមកពីប្រទេសទាំងពីរបានបរាជ័យក្នុងការឯកភាពគ្នាទៅលើភាសានៃសេចក្តីថ្លែងការណ៍ចុងក្រោយបង្អស់មួយ។ នេះបើយោងតាមការបញ្ជាក់របស់នាយករដ្ឋមន្ត្រីប៉ាពូអាស៊ីនូវែលហ្គីណេ លោក Peter O'Neill នៅក្នុងសេចក្តីថ្លែងការណ៍មួយ។
ប៉ុន្តែមន្ត្រីជាន់ខ្ពស់អាមេរិកម្នាក់ដែលចូលរួមក្នុងកិច្ចចរចានោះបានថ្លែងប្រាប់អ្នកកាសែតថា ភាពចម្រូងចម្រាសគ្នានេះគឺកើតឡើងរវាងចិននិងសមាជិកនៃកិច្ចប្រជុំកំពូល APEC ដទៃទៀត មិនមែនជាមួយតែសហរដ្ឋអាមេរិកមួយនោះទេ។ មន្ត្រីរូបនេះបានហៅការមិនឯកភាពគ្នានេះថា «មិនធ្លាប់មានពីមុនមកនោះទេ»។
កាលពីមួយថ្ងៃមុននេះ អនុប្រធានាធិបតីអាមេរិក លោក Mike Pence និងប្រធានាធិបតីចិន លោក ស៊ី ជីនពីង បានផ្តល់ទស្សនៈទៅលើការប្រកួតប្រជែងសេដ្ឋកិច្ច ខណៈដែលពួកគេថ្លែងទៅកាន់មេដឹកនាំថ្នាក់តំបន់នានា នៅក្នុងកិច្ចប្រជុំកំពូលនៅរដ្ឋធានី Port Moresby នៃប្រទេសប៉ាពូអាស៊ីនូវែលហ្គីណេនេះ។
លោក Pence បានព្រមានដល់សមាជិកនៃកិច្ចប្រជុំកំពូល APEC អំពីការយល់ព្រមជំពាក់បំណុលបរទេស ដែលអាចធ្វើឲ្យប៉ះពាល់ដល់អធិបតេយ្យភាពរបស់ខ្លួន «និងបានជំរុញឲ្យសមាជិក APEC ទាំងអស់ ការពារផលប្រយោជន៍របស់ខ្លួននិងរក្សាឯករាជ្យភាពរបស់ខ្លួនផងដែរ គឺដូចសហរដ្ឋអាមេរិកដែរ ត្រូវយកផលប្រយោជន៍របស់ប្រទេសខ្លួនជាធំ»៕
© រក្សាសិទ្ធិដោយ thmeythmey.com
