គោលជំហរលោក គង់ គាំ លោក គង់ បូរ៉ា និងលោក គង់ សភា ចំពោះលោក សម រង្ស៊ី !

ជាតិ

បទសម្ភាសន៍

គោលជំហរលោក គង់ គាំ លោក គង់ បូរ៉ា និងលោក គង់ សភា ចំពោះលោក សម រង្ស៊ី !

19, Nov 2018 , 10:19 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ នយោបាយ ភ្នាល់គ្នារវាងលោក សម រង្ស៊ី និងសម្ដេច ហ៊ុន សែន ជុំវិញការឃុំខ្លួនលោក កឹម សុខា នោះ បានបង្កឲ្យអ្នកនយោបាយ ត្រកូល«គង់» ដែលត្រូវបានតុលាការហាមធ្វើសកម្មភាពនយោបាយ បញ្ចេញទស្សនៈ និងគោលជំហរផ្សេងគ្នា លើយុទ្ធសាស្ត្រនយោបាយលោក សម រង្ស៊ី។

ដ្បិតជាអ្នកនយោបាយប្រឆាំង ជាមួយលោក សម រង្ស៊ី ជាង២០ឆ្នាំ មុននឹងត្រូវតុលាការរំលាយគណបក្សសង្គ្រោះជាតិ និងហាមសកម្មភាពធ្វើនយោបាយមែន ប៉ុន្តែលោក គង់ គាំ និងកូនប្រុសលោក គង់ បូរ៉ា ហាក់បង្ហាញអារម្មណ៍មិនគាំទ្រយុទ្ធសាស្ត្រនយោបាយលោក សម រង្ស៊ី ដែលយកសេរីភាពលោក កឹម សុខា មកភ្នាល់ជាមួយសម្ដេចនាយករដ្ឋមន្ត្រី ហ៊ុន សែន ឡើយ។

មិនគាំទ្រ ដោយសារលោក គង់ គាំ និងលោក គង់ បូរ៉ា យល់ឃើញថា ការយកសេរីភាពលោក កឹម សុខា មកភ្នាល់គ្នានេះ វាមិនមែនជាដំណោះស្រាយនយោបាយទេ ប៉ុន្តែវាជាផ្នែកមួយនៃការដាក់បន្ទុកទៅលើលោក កឹម សុខា ទៅវិញ។

ថ្លែងក្នុងនាមជាពលរដ្ឋម្នាក់ ក្រោយតុលាការហាមធ្វើនយោបាយ៥ឆ្នាំនោះ លោក គង់ គាំ ដែលជាមន្ត្រីជាន់ខ្ពស់អតីតគណបក្សសង្គ្រោះជាតិ បាននិយាយប្រាប់សារព័ត៌មានថ្មីៗថា លោក សម រង្ស៊ី កំពុងធ្វើឲ្យលោក កឹម សុខា ខកចិត្ត។ មូលហេតុដែលលោក គង់ គាំ លើកឡើងបែបនេះ ដោយសារលោកមើលឃើញថា លោក សម រង្ស៊ី ទំនងខ្លាចលោក កឹម សុខា អាចត្រូវបានដោះលែង នៅពេលខាងមុខ ហើយខ្លួនត្រូវបានគេទុកចោលក្រៅកញ្ចប់នយោបាយនោះ ទើបលោក សម រង្ស៊ី បង្កើតរឿភ្នាល់នេះឡើង ដើម្បីឲ្យបញ្ហានយោបាយនៅតែបន្តកើតមាន។

នៅពេលសួរថា តើជំហររបស់លោកនៅពេលនេះ ក្នុងនាមជាអតីតមន្ត្រីជាន់ខ្ពស់គណបក្សប្រឆាំងមួយរូប យល់ឃើញបែបណា ទើបបានជាចេញរិះគន់លោក សម រង្ស៊ី ជាបន្តបន្ទាប់ ក្នុងរយៈពេលប៉ុន្មានថ្ងៃចុងក្រោយនេះ? លោក គង់ គាំ បានឆ្លើយតបវិញថា លោក រិះគន់ និងបកស្រាយពីយុទ្ធសាស្ត្រនយោបាយរបស់លោក សម រង្ស៊ី លើបណ្ដាញសង្គមហ្វេសប៊ុក និងតាមប្រព័ន្ធផ្សព្វផ្សាយជាច្រើននេះ ក្នុងគោលបំណងចង់បំភ្លឺឲ្យអ្នកគាំទ្រ ដែលទុកចិត្តគណបក្សសង្គ្រោះជាតិ បានដឹងពីគោលបំណងនយោបាយមួយចំនួន របស់លោក សម រង្ស៊ី ។

សូមស្ដាប់សំឡេងលោក គង់ គាំ ដែលផ្ដល់បទសម្ភាសដល់សារព័ត៌មានថ្មីៗកន្លងមក៖

អត្ថបទទាក់ទង

លោក គង់ សភា៖ អតីតតំណាងរាស្ត្រ CNRP នៅក្រៅប្រទេស នឹងចូលឲ្យចាប់ខ្លួន ដូចលោក សម រង្ស៊ី បើភ្នាល់ចាញ់សម្ដេច ហ៊ុន សែន

លោក គង់ គាំ៖ ខ្ញុំរិះគន់លោក សម រង្ស៊ី គឺចង់បំភ្លឺអ្នកទុកចិត្តគាត់

លោក គង់ គាំ៖ លោក កឹម សុខា ដឹងចិត្ត សម រង្ស៊ី ថាចង់ធ្វើអ្វីទៅលើគាត់

លោក គង់ មុនីកា ៖ បក្សចូលរួមក្នុងឧត្តមក្រុមប្រឹក្សាពិគ្រោះយោបល់ជាមួយរដ្ឋាភិបាល គឺមានសំណាង

លោក គង់ មុនីកា៖ ទោះគោរពមេដឹកនាំចាស់ៗ តែខ្ញុំចង់ធ្វើជាជម្រើសថ្មី សម្រាប់ពលរដ្ឋ

មិនខុសពីឪពុកខ្លួនឡើយ លោក គង់ បូរ៉ា ដែលជាអតីតតំណាងរាស្ត្រគណបក្សសង្គ្រោះជាតិដែរនោះ បានចាប់ផ្ដើមរិះគន់លោក សម រង្ស៊ី តាំងពីមុនការបោះឆ្នោតជ្រើសតាំងតំណាងរាស្ត្រ អាណត្តិទី៦មកម្លេះ។ នោះក៏ព្រោះតែលោក គង់ បូរ៉ា មើលឃើញថា លោក សម រង្ស៊ី ហាមពលរដ្ឋទៅបោះឆ្នោតនោះ ជារឿងមិនត្រឹមត្រូវឡើយ ហើយលោក ក៏គ្មានជំនឿចិត្តថា គណបក្សសង្គ្រោះជាតិរស់ឡើងវិញដែរ។

ជាក់ស្ដែងកាលពីពេលថ្មីៗនេះ លោក គង់ បូរ៉ា បានសរសេរលើហ្វេសប៊ុករិះគន់លោក សម រង្ស៊ី និងអតីតមន្ត្រីគណបក្សសង្គ្រោះជាតិ នៅជុំវិញអតីតថ្នាក់ដឹកនាំបក្សប្រឆាំងមួយនេះ ដែលនាំឲ្យគណបក្សបរាជ័យជាបន្តបន្ទាប់ផងដែរ។ មិនត្រឹមតែប៉ុណ្ណោះ លោក គង់ បូរ៉ា បានប្រកាសជំហរខ្លួនថា លោក មិនទុកចិត្តលើអតីតមន្ត្រីគណបក្សសង្គ្រោះជាតិឡើយ។

«ខ្ញុំ មិនបដិសេធទេ បើយល់ថាជាការិះគន់ការដឹកនាំរបស់គាត់ សម រង្ស៊ី ព្រោះអ្នកនៅជុំវិញគាត់ (សម រង្ស៊ី) ធ្វើឲ្យគាត់បរាជ័យគ្រប់ជំហាន។ ខ្ញុំតាមមើលសកម្មភាពគាត់ (សម រង្ស៊ី)ដែរ ឥឡូវនេះ មិនដឹងគាត់ចង់ធ្វើអីឲ្យពិតប្រាកដផង។ខ្ញុំមិនទុកចិត្ត អតីតសង្គ្រោះជាតិ ព្រោះ សម រង្ស៊ី និង កឹម សុខា កំពុងអត់ទុកចិត្តគ្នា។រឿង សម រង្ស៊ី ដាក់ កឹម សុខា ភ្នាល់ជាមួយ ហ៊ុន សែន យល់ថាពួកគាត់ (លោក សម រង្ស៊ី និងលោក កឹម សុខា) មិនទុកចិត្តគ្នា»។ នេះជាការលើកឡើងរបស់លោក គង់ បូរ៉ា ប្រាប់សារព័ត៌មានថ្មីៗ តាមរយៈបណ្ដាញសង្គមហ្វេសប៊ុក។

ផ្ទុយឪពុក និងបងប្រុសខ្លួន លោក គង់ សភា នៅតែមើលឃើញពីចំណុចល្អរបស់លោក សម រង្ស៊ី នៅក្នុងផ្លូវនយោបាយនេះ។ សម្រាប់លោក គង់ សភា សកម្មភាពរបស់លោក សម រង្ស៊ី កន្លងមក គឺជាទង្វើស្វែងរកច្រកចេញនយោបាយនៅកម្ពុជា។ តួយ៉ាងដូចជាសកម្មភាពរបស់លោក សម រង្ស៊ី ដែលយកសេរីភាពផ្ទាល់ខ្លួន ទៅភ្នាល់ជាមួយសម្ដេច ហ៊ុន សែន លើការដោះលែង ឬមិនដោះលែងលោក កឹម សុខា ជាដើម។

នៅពេលសួរថា អ្វីដែលលោក លើកឡើងនេះ ហាក់កំពុងបង្ហាញថា លោក ជឿជាក់លើលោក សម រង្ស៊ី ជាងអ្នកណាទាំងអស់ ដែលផ្ទុយពីឪពុក និងបងប្រុសលោក? ឆ្លើយតបសំនួរនេះ អតីតតំណាងរាស្ត្រគណបក្សសង្គ្រោះជាតិ ដែលកំពុងរស់នៅប្រទេសកាណាដា ដើម្បីធ្វើចលនាសង្គ្រោះជាតិពីក្រៅប្រទេសជាមួយលោក សម រង្ស៊ី រូបនេះ បាននិយាយថា លោកនៅតែដើរតាមឆន្ទៈនយោបាយរបស់លោក សម រង្ស៊ី ហើយគ្មានលោក សម រង្ស៊ី ទេ ខ្លួនលោក ក៏នឹងបញ្ចប់អាជីពនយោបាយដែរ។

សូមស្ដាប់សំឡេងលោក គង់ សភា ដែលផ្ដល់បទសម្ភាសដល់សារព័ត៌មានថ្មីៗ ពីប្រទេសកាណាដា៖

បើទោះជាពេលនេះ លោក គង់ សភា មានជំហរខុសពីឪពុក និងបងប្រុសខ្លួនក្តី ប៉ុន្តែវាមិនមែនមានន័យថា គ្រួសារលោក ត្រូវបែកបាក់គ្នា ដោយសារជំហរនយោបាយបញ្ច្រាសទិសគ្នានេះដែរ។ បើតាមលោក គង់ សភា គ្រួសាររបស់លោក នៅតែមានទំនាក់ទំនងល្អដដែល គ្រាន់តែដើរផ្លូវផ្សេងគ្នាប៉ុណ្ណោះ។

ក្រៅពីលោក គង់ គាំ លោក គង់ បូរ៉ា និងលោក គង់ សភា ដែលត្រូវបានតុលាការហាមធ្វើសកម្មភាពនយោបាយ៥ឆ្នាំ ក៏នៅមានលោក គង់ មុនីកា ដែលជាកូនប្រុសពៅលោក គង់ គាំ និងប្អូនប្រុសរបស់អតីតតំណាងរាស្ត្រគណបក្សសង្គ្រោះជាតិទាំងពីរនេះ បានប្រឡូកចូលឆាកនយោបាយ ហើយបង្កើតគណបក្សឆន្ទៈខ្មែរ រយៈពេលជាង៦ខែមកហើយ។ គណបក្សឆន្ទៈខ្មែរ បានចូលរួមការបោះឆ្នោតជ្រើសរើសតំណាងរាស្ត្រនីតិកាលទី៦កន្លងមកនេះ ប៉ុន្តែមិនទទួលបានអាសនៈក្នុងរដ្ឋសភាឡើយ ។ បច្ចុប្បន្នលោក គង់ មុនីកា ដែលបានចូលជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ជាមួយរដ្ឋាភិបាល បានទទួលឋានៈស្មើទេសរដ្ឋមន្ត្រី ក្នុងការស្វែងរកចំណុចអវិជ្ជមាន និងអសកម្មរបស់មន្ត្រី អាជ្ញាធរពាក់ព័ន្ធ ដើម្បីបញ្ហាប្រជាពលរដ្ឋក្នុងសង្គមជាដើម៕