ជាតិ
បទយកការណ៍ / បទសម្ភាសន៍
បុណ្យអុំទូក
ជាង៖ ទូកងមួយ មានតម្លៃដល់ទៅជាង១ម៉ឺនដុល្លារ តែមិនសូវចំណេញទេ កូនជាងម្នាក់របស់លោក ទ្រី ប៊ុនហួរ កំពុងឆ្លាក់ក្បាច់លើទូកង
× ទូកងមួយ អាចធ្វើរួចរាល់ក្នុងរយៈពេលជិតមួយខែ ដោយអាចមានតម្លៃប្រមាណ១២០០០ដុល្លារ ឬក៏អាចថ្លៃ-ថោកជាងនេះបន្តិច ទៅតាមទំហំទូកជាក់ស្ដែង។ នេះបើតាមលោក ទ្រី ប៊ុនហួរ ដែលប្រកបមុខរបរជាជាងធ្វើទូកង អស់រយៈពេលជាង៣០ឆ្នាំមកហើយ។
លោក ទ្រី ប៊ុនហួរ ដែលរស់នៅក្នុង ភូមិអញ្ជែង ឃុំពុកឫស្សី ស្រុកខ្សាច់កណ្ដាល ខេត្តកណ្ដាលលើកឡើងថា ថ្វីដ្បិតតែទទួលបានតម្លៃថ្លៃជាងមុនក្តី ប៉ុន្តែបញ្ហាលំបាកនៅតែជួបប្រទះ ដូចជាជួបគ្រោះថ្នាក់ពេលស្វែងរកឈើ និងចំណាយពេលច្រើនព្រោះមិនសូវសម្បូរឈើគគីរដូចពីមុន។ គិតតាំងពីចាប់អាជីបជាជាងទូកមកដល់បច្ចុប្បន្នលោកធ្វើទូកងប្រភេទវែងបានជាង៣០០ហើយ ដោយមិនគិតទូកធម្មតា។
ជាងធ្វើទូកងរូបនេះ ប្រាប់សារព័ត៌មានថ្មីៗ យ៉ាងដូច្នេះថា៖«ធ្វើទូកមួយ មិនស្រួលទេ។ អ្នកខ្លះថាបានមួយថ្លៃ តែបើឃើញពេលទៅយកបានវេទនា ទាញទម្រាំបានមួយដើៗ មិនមែនងាយទេ។ បើខែភ្លៀងមនុស្សលិចក្នុងភក់ ក្នុងព្រៃជ្រៅណាស់ អារឈើ មិនស្រួលពេលរលំមកកិនមនុស្សស្លាប់ក៏មាន ធ្លាប់មានអ្នកស្លាប់ពីរ ទៅបីនាក់ហើយ តែក្រុមខ្ញុំមិនដែលជួបទេ»។
លោក ទ្រី ប៊ុនហួរ ដែលកំពុងឈរមើលកូនជាងធ្វើទូកងថ្មី បានបន្តបែបនេះថា៖«ការធ្វើទូកឥឡូវស្រួលជាងពេលមុនឆ្ងាយណាស់។ ពីមុនធ្វើដោយដៃទាំងអស់ ប្រើតែ កាំបិត រណារ ពូថៅ ពន្លាក តែឥឡូវ ប្រើសុទ្ធតែគ្រឿងយន្ត រណារយន្ត ចំណាយពេល១ខែ ឬ២៨ថ្ងៃ គឺរួចហើយ។ ពេលមុនជាង៣ខែបានហើយ តម្លៃក៏ខុសគ្នាដែរ ពីមុន ២ ទៅ ៣ តម្លឹងមាស។ ចំពោះសព្វថ្ងៃជាង១ម៉ឺនដុល្លារ ប៉ុន្តែក៏ពុំសូវចំណេញដែរ»។
ជាងធ្វើទូកងជាង៣០ឆ្នាំរូបនេះ បានឲ្យដឹងទៀតថា ដើម្បីធ្វើទូកមួយបានត្រូវគោរពតាមច្បាប់ មិនមែនចេះតែធ្វើនោះទេ។ លោក បន្ថែមថា អាចធ្វើបានទាល់តែបានសុំច្បាប់ត្រឹមត្រូវ។
លោក និយាយទៀតថា៖«ពេលបានលិខិតអនុញ្ញាតទើបខ្ញុំអាចទៅរកឈើ មិនមែនចេះតែកាប់ផ្ដេសផ្ដាសទេ។ ទាល់តែមានច្បាប់ មេព្រៃទៅមើលត្រឹមត្រូវ តាំងពីថ្នាក់ក្រសួង អភិបាលខេត្ត សុំមន្ត្រីបរិស្ថាន គេអនុញ្ញាតបានមានសិទ្ធិកាប់ »។
លោកឲ្យដឹងបន្ថែមថា សព្វថ្ងៃដើមគគីរមានតែនៅខេត្តព្រះវិហារ។ ឈើគគីរមួយដើម ត្រូវទិញក្នុងតម្លៃ១ពាន់ដុល្លារ ពីអ្នករស់នៅទីនោះ ព្រោះអ្នកដែលរស់នៅទីនោះ គេដឹងកន្លែងដែលមានដើមគគីរ។ លោក ត្រូវចំណាយលុយប្រហែល៣ពាន់ដុល្លារក្នុងការទិញឈើ និងចំណាយពេលទៅកាប់។
លោក និយាយបែបនេះថា៖«អាជ្ញាធរមិនយកលុយទេ តែម្ចាស់ស្រុកគេជាអ្នករកឃើញ បើមិនអ៊ីចឹងយើងរកមិនឃើញទេ។ ខ្ញុំទៅរង្វេងពីរ-បីដងហើយ ដូច្នេះត្រូវឲ្យម្ខាស់ស្រុកជូនទៅរក និងជួយនាំផ្លូវចូលទៅដើម្បីដឹកឈើចេញមកវិញ»។
លោក លើកឡើងថា ជីវិតអ្នកធ្វើទូកគឺផ្សងព្រេងណាស់ ត្រូវទៅកាប់ឈើនៅក្នុងព្រៃជ្រៅ ពេលខ្លះជួបគ្រោះថ្នាក់ដល់ជីវិត។ វត្តជាកន្លែងថែរក្សាទូក ក្រោយចូលរួមប្រឡងប្រណាំងក្នុងពិធីបុណ្យអុំទូក អកអំបុក សំពះព្រះខែ៕
© រក្សាសិទ្ធិដោយ thmeythmey.com