ជាតិ
កម្ពុជា នឹងរងឥទ្ធិពលព្យុះពីរទៀត ពីថ្ងៃ២៤ដល់២៦វិច្ឆិកា
× រាជធានីភ្នំពេញ តំបន់មាត់សមុទ្រ និងបណ្តាខេត្តមួយចំនួន នឹងមានភ្លៀងពីតិច ទៅច្រើន ចាប់ពីថ្ងៃទី២៤ដល់២៦វិច្ឆិកា ដោយសាររងឥទ្ធិពលរបស់ព្យុះទី២៨ និងទី២៩។ ខេត្តទាំងនោះ មាន មណ្ឌលគិរី ក្រចេះ ត្បូងឃ្មុំ កំពង់ចាម កំពង់ធំ ព្រៃវែង ស្វាយរៀង កណ្តាល កំពង់ស្ពឺ តាកែវ និងពោធិ៍សាត់។ នេះបើសេចក្តីជូនដំណឹងរបស់របស់ក្រសួងធនធានទឹក និងឧតុនិយម នាថ្ងៃទី២០វិច្ឆិកា។
ការរងឥទ្ធិពលនេះ ដោយសារអាកាសធាតុ និងបាតុភូតធម្មជាតិ មានវិសម្ពាធ២ បានកើតឡើងនៅក្នុងមហាសមុទ្រប៉ាស៊ីហ្វិកភាគខាងកើតនៃប្រទេសហ្វីលីពីន។ នៅថ្ងៃទី២១វិច្ឆិកា វិសម្ពាធទាំង២នេះ នឹងវិវត្តខ្លួនទៅជាព្យុះទី២៨-២៩ ដែលមិនទាន់មានឈ្មោះនៅឡើយ។
ឥទ្ធិពលព្យុះនេះ ក្រៅពីធ្វើឲ្យរាជធានី និងខេត្តខាងលើ មានភ្លៀងធ្លាក់ច្រើន ក៏មានខេត្តបាត់ដំបង សៀមរាប និងបន្ទាយមានជ័យ មានភ្លៀងធា្លក់ ពីតិចទៅបង្គួរ នៅថ្ងៃទី២៥-២៦ វិច្ឆិកា។ ជាមួយគ្នានេះ តំបន់មាត់សមុទ្រ និងនៅលើផ្ទៃសមុទ្រនឹងមានភ្លៀងធា្លក់ជាមួយខ្យល់បក់បោកយ៉ាងខ្លាំង ដោយមានរលកសមុទ្រខ្ពស់ៗ ផងដែរ។
ដោយឡែក រាជធានី-ខេត្តនៅតំបន់វាលទំនាបប៉ែកខាងត្បូង និងខេត្តភាគខាងកើតជាប់ប្រទេសវៀតណាម នឹងមានភ្លៀងធា្លក់ច្រើនដែលអាចបង្កជាជំនន់ទឹកភ្លៀងក្នុងរយៈពេលខ្លី។
ក្រសួងធនធានទឹក បានផ្តាំដល់ប្រជានេសាទ និងអ្នកធ្វើដំណើរតាមមាត់សមុទ្រទាំងអស់ បង្កើនការប្រុងបប្រយ័ត្នខ្ពស់ ដើម្បីជៀសវាងពីគ្រោះថា្នក់ផ្សេងៗ ដែលអាចបង្កឡើងជាយថាហេតុ៕
Tag:
ព្យុះ
ភ្លើង
តំបន់មាត់សមុទ្រ
© រក្សាសិទ្ធិដោយ thmeythmey.com