ជាតិ
បុណ្យអុំទូក
អាជ្ញាធរខេត្តសៀមរាបត្រៀមធុងសំរាមជិត១ពាន់ក្នុងថ្ងៃបុណ្យអុំទូក
× សៀមរាប៖ ខេត្តសៀមរាប នឹងរៀបចំពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ដំណាលគ្នានឹងរាជធានីភ្នំពេញដែរ តែធ្វើត្រឹម២ថ្ងៃតែប៉ុណោះ គឺពីថ្ងៃទី ២១ និង២២ វិច្ចិកា។ ដូចរាល់ដង សំរាមបានក្លាយជាបញ្ហាចោទនៅរាល់ពិធីធំៗ។ ដើម្បីដោះស្រាយបញ្ហានេះ អាជ្ញាធរខេត្តបានត្រៀមធុងសំរាមជិត ១ពាន់ធុង ត្រៀមដាក់តាមគោលដៅនានា ដើម្បីបង្កភាពងាយស្រួលដល់ពលរដ្ឋក្នុងការទុកដាក់សំរាមឱ្យបានត្រឹមត្រូវ។
ក្នុងឱកាសចូលរួមយុទ្ធនាការសៀមរាបស្អាតជានិច្ច ជាមួយសហភាពសហព័ន្ធយុវជនកម្ពុជាខេត្តសៀមរាប នៅព្រឹកថ្ងៃទី២០ វិច្ឆិកា លោក នួន ពុទ្ធារ៉ា អភិបាលក្រុងសៀមរាប បានឱ្យដឹងថា នៅឆ្នាំនេះរដ្ឋបាលរបស់លោកបានរៀបចំសកម្មភាពចំនួន ៣ ត្រៀមដោះស្រាយបញ្ហាសំរាមឱ្យបានប្រសើរជាងរាល់ឆ្នាំ ក្នុងឱកាសបុណ្យអុំទូកនេះ។ លោកបន្តថា សកម្មភាពទាំងនោះរួមមាន ទី១ បែងចែកក្រុមហ៊ុនប្រមូលសំរាមចំនួន៣ ដាក់តាមគោលដៅសំខាន់ៗ ដូចជានៅសួនច្បារព្រះរាជដំណាក់ ត្រើយខាងកើត និងខាងលិចស្ទឹងសៀមរាប ទី២ ដាក់ពង្រាយធុងសំរាមជិត ១ពាន់តាមកន្លែងដែលងាយស្រួលក្នុងការទុកដាក់ និងទីបី ចុះផ្សព្វផ្សាយ អប់រំពលរដ្ឋឱ្យយល់ពីបញ្ហាសំរាម និងឱ្យពួកគេទុកដាក់ឱ្យបានត្រឹមត្រូវផងដែរ។
ជាមួយគ្នានេះដែរ អភិបាលរងខេត្តសៀមរាប លោក ទៀ សីហា ដែលបានចូលរួមក្នុងយុទ្ធនាការ សៀមរាបផ្ទះស្អាត ដែរនោះ បានហៅសកម្មភាពនេះថា ជាយុទ្ធនាការយុវជនរើសសំរាម។ លោកពន្យល់ថា គ្មានអ្វីដែលត្រូវខ្មាសចំពោះរឿងរើសសំរាមនេះទេ ហើយខេត្តសៀមរាប គួរក្លាយជាទីក្រុងគំរូដែលគ្មានសំរាមនៅតាមផ្លូវសាធារណ ដ្បិតជាក្រុងទេសចរណ៍ដ៏មានសក្កានុពលនៅប្រទេសកម្ពុជា។
ក្រៅពីនោះ លោកអភិបាលរងខេត្ត បានប្រាប់ដល់យុវជនដែលបានចូលរួមទាំងអស់ ពេលត្រឡប់ទៅផ្ទះវិញ ជួយផ្សព្វផ្សាយសកម្មភាព ការទុកដាក់សំរាមទៅក្រុមគ្រួសារខ្លួន ទាំងគុណសម្បត្តិ និងគុណវិបត្តិនៃការទុកដាក់សំរាមមិនបានត្រឹមត្រូវ។ លោក ទៀ សីហា បន្ថែមថា សំរាមគួរតែនៅក្នុងធុងសំរាម មិនគួរពាសវាលពាសកាលទេ៕
© រក្សាសិទ្ធិដោយ thmeythmey.com