ជាតិ
បុណ្យអុំទូក
សហភាពអឺរ៉ុប ឧបត្ថម្ភទូកចែវនារីមួយគ្រឿងដើម្បីចូលរួមក្នុងពិធីបុណ្យអុំទូក
× សហភាពអឺរ៉ុបប្រចាំកម្ពុជា បានឧបត្ថម្ភទូកចែវនារីមួយគ្រឿង ដើម្បីចូលរួមនៅក្នុងព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែឆ្នាំ២០១៨នេះ។ ជាការឧបត្ថម្ភតាមរយៈការផ្តល់ជាសម្ភារ និងអាហារ សម្រាប់ក្រុមកីឡាករទូកចែវនារីឈ្មោះ«ព្រះពៃស្រពណ៌» ដែលមានកីឡាករនារីចំនួន ៤២នាក់ មកពីភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង។ សហភាពអឺរ៉ុប ក៏ឧបត្ថម្ភការស្នាក់នៅ និងការហាត់សម របស់ទូកចែវនារី«ព្រះពៃស្រពណ៌»មុនពេលចូលប្រណាំងផងដែរ។ នេះបើតាមប្រកាសព័ត៌មានរបស់សហភាពអឺរ៉ុបប្រចាំកម្ពុជា។
លោក George Edgar ប្រធានប្រតិភូសហភាពអឺរ៉ុបប្រចាំកម្ពុជា មានប្រសាសន៍ថា សហភាពអឺរ៉ុប មានសេចក្តីរីករាយយ៉ាងខ្លាំង ក្នុងនាមជាដៃគូអភិវឌ្ឍន៍ដ៏សំខាន់មួយរបស់រាជរដ្ឋាភិបាលកម្ពុជា ដែលបានគាំទ្រប្រពៃណីវប្បធម៌ដ៏សំខាន់នេះរបស់ប្រទេសកម្ពុជា ព្រមទាំងកិច្ចខិតខំប្រឹងប្រែងនានា ដើម្បីឲ្យស្ត្រីនៅមូលដ្ឋានបានចូលរួមការអភិវឌ្ឍដើម្បីភាពស្មើគ្នាក្នុងសង្គម។ លោក George Edgar បញ្ជាក់ដូច្នេះ៖«ព្រះរាជពិធីបុណ្យអុំទូក ក៏ជាផ្នែកមួយយ៉ាងសំខាន់ផងដែរ នៅក្នុងវប្បធម៌កម្ពុជា ហេតុនេះ ព្រះរាជពិធីនេះ មានសារៈសំខាន់ ជាពិសេសសម្រាប់យើងនៅឆ្នាំនេះ ពីព្រោះថា ឆ្នាំនេះ ត្រូវបានជ្រើសរើសជាឆ្នាំនៃកេរដំណែលវប្បធម៌អឺរ៉ុប»។
សហភាពអឺរ៉ុប ក៏ឆ្លៀតយកឱកាសនៃការឧបត្ថម្ភដ៏ពិសេសនេះ ផ្សព្វផ្សាយសារអំពីអំពើហិង្សាលើស្ត្រី និងកុមារីផងដែរ ដោយអាវយឺតដែលពាក់ដោយកីឡាករនារី មានសារសរសេរថា «និយាយថា ទេ ចំពោះអំពើហិង្សាលើស្ត្រី»។
បើតាមប្រកាសព័ត៌មានដដែល សហភាពអឺរ៉ុបប្រចាំកម្ពុជា មានមោទនភាពគាំទ្រគម្រោងនានា ដើម្បីកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាជនកម្ពុជា។ គម្រោងនានា ដែលឧបត្ថម្ភដោយសហភាពអឺរ៉ុប ចាប់ពីវិស័យនេសាទ អប់រំ កសិកម្ម ការប្រែប្រួលអាកាសធាតុ ជំនួយពាក់ព័ន្ធនឹងពាណិជ្ជកម្ម រហូតដល់ការលើកកម្ពស់អភិបាលកិច្ចល្អ និងសិទ្ធិមនុស្ស កំពុងតែផ្តល់ប្រយោជន៍ដល់ប្រជាជនកម្ពុជារាប់លាននាក់៕
© រក្សាសិទ្ធិដោយ thmeythmey.com