អន្តរជាតិ
ស្បែកជើង ដប និងថង់ប្លាស្ទិក៦គីឡូក្រាម បំផ្លាញជីវិតបាឡែនមួយក្បាលនៅឥណ្ឌូណេស៊ី
× ក្រុមអ្នកជំនាញនៃអង្គការមូលនិធិសកលសម្រាប់អភិរក្សធនធានធម្មជាតិ (WWF) បានវះឃើញគំនរប្លាស្ទិកប្រមាណ៦គីឡូក្រាមក្នុងពោះត្រីបាឡែន ដែលត្រូវបានប្រទះឃើញបាត់បង់ជីវិតនៅក្បែរកោះ Kapota តំបន់ឧទ្យានជាតិ Wakatobi ប្រទេសឥណ្ឌូណេស៊ី។
កាលពីថ្ងៃទី២០ ខែវិច្ឆិកា ឆ្នាំ២០១៨ កន្លងទៅ គេបានរកឃើញសារធាតុប្លាស្ទិករឹង ដបប្លាស្ទិក ថង់ប្លាស្ទិក ស្បែកជើង និងកាបូបនីឡុង នៅក្នុងពោះត្រីបាឡែននោះ ដែលធ្វើឲ្យអ្នកជំនាញខកចិត្តយ៉ាងខ្លាំងចំពោះទង្វើរបស់មនុស្ស។
ឥណ្ឌូណេស៊ី ត្រូវបានចាត់ទុកជាប្រទេសដែលបំផុតដោយប្លាស្ទិកលំដាប់ទីពីរលើពិភពលោក បន្ទាប់ពីចិន។ នេះបើតាមការផ្សាយរបស់ទស្សនាវដ្តីវិទ្យាសាស្ត្រ Science កាលពីខែមករា កន្លងមក។ ជាមួយគ្នានេះ អង្គការ Ocean Conservancy បានព្រមានថា ធនធានក្នុងទឹកនឹងប្រឈមគ្រោះថ្នាក់កាន់តែខ្លាំង ប្រសិនបើមនុស្សនៅតែបន្តបោះចោលថង់ប្លាស្ទិក និងគំនរសំរាមចូលក្នុងសមុទ្រ ឬទន្លេ។
ក្រៅពីចិន និងឥណ្ឌូណេស៊ី តំបន់សមុទ្រនៅហ្វីលីពីន ថៃ និងវៀតណាម ក៏កំពុងគ្របដណ្តប់ដោយសំរាមប្លាស្ទិក៦០ភាគរយនៅក្នុងសមុទ្រផងដែរ៕
Tag:
ប្លាស្ទិក
បាឡែន
© រក្សាសិទ្ធិដោយ thmeythmey.com