ជាតិ
បុណ្យអុំទូក
២៥ខេត្ត/រាជធានី
អុំទូក៖ ភ្ញៀវទេសចរជិត ២ម៉ឺននាក់សម្រុកទៅលេងខេត្តរតនគិរី, ដោយភ្ញៀវទេសចរខ្លះសម្រាកនៅតាមវត្ត
×![]()
ភ្នំពេញ៖ ក្នុងរយៈពេល៣ថ្ងៃនៃព្រះរាជពិធីបុណ្យអុំទូកនេះ តំបន់ភូមិភាគឦសានខេត្តរតនគិរី បានទាក់ទាញភ្ញៀវទេសចរជាតិ និងអន្តរជាតិទៅកម្សាន្តចំនួន ១៨,៥៦២នាក់។ ចំនួនភ្ញៀវទេសចរក្នុងឆ្នាំនេះ មានការកើនឡើងជាងឆ្នាំមុន ហើយមានភ្ញៀវទេសចរខ្លះសម្រាកនៅតាមវត្ត ដោយសារគ្មានបន្ទប់ស្នាក់នៅ។ នេះបើតាមការបញ្ជាក់របស់លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី។
តំបន់ភូមិភាគឦសានខេត្តរតនគិរី ក្នុងថ្ងៃព្រះរាជពិធីបុណ្យអុំទូកទាំង៣ថ្ងៃនេះ មានភ្ញៀវទេសចរជាតិ និងអន្តរជាតិ ទៅកម្សាន្តចំនួន ១៨,៥៦២នាក់ ក្នុងនោះភ្ញៀវជាតិ មានចំនួន ១៨,២១៩នាក់ និងអន្តរជាតិ មានចំនួន ៣៤១នាក់។ ចំនួនភ្ញៀវទេសចរនេះ កើនឡើង ១១៨,២% បើប្រៀបធៀបនឹងឆ្នាំ២០១៧។
លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានប្រាប់សារព័ត៌មានថ្មីៗតាមទូរសព្ទថា៖ «ក្នុងរយៈពេល៣ថ្ងៃនេះ ចំនួនភ្ញៀវទេសចរជាតិ និងអន្តរជាតិ បានមកលេងខេត្តរតនគិរីច្រើន។ ហើយភ្ញៀវទេសចរខ្លះសម្រាកនៅតាមវត្តផងដែរ ដោយសារតែមិនមានបន្ទប់ស្នាក់នៅ»។
កត្តាធម្មជាតិ និងអាកាសធាតុល្អ បានទាក់ទាញដល់ភ្ញៀវទេសចរពីតាមបណ្ដាខេត្តនានា ទៅកម្សាន្តនៅខេត្តរតនគិរីយ៉ាងច្រើនកុះករ។ ក្នុងថ្ងៃអុំទូកទាំងបីថ្ងៃនេះ តំបន់ទេសចរណ៍ដែលភ្ញៀវទេសចរទៅកម្សាន្តច្រើនជាងគេ គឺតំបន់រមណីយដ្ឋានបឹងយក្សឡោម ខណៈតំបន់ទេសចរណ៍១៣ទីតាំងផ្សេងទៀត មានភ្ញៀវទេសចរមធ្យម។
ប្រធានមន្ទីរទេសចរណ៍ខេត្តរតនគិរី បញ្ជាក់ថា ការមកកម្សាន្តនៅខេត្តរតនគិរីច្រើនបែបនេះ មានកត្តា៥ចំណុច គឺកត្តាផ្លូវថ្នល់, សេដ្ឋកិច្ច, សុវត្ថិភាព ចរាចរណ៍, ពេលវេលា និងអេកូទេសចរណ៍ខេត្តរតនគិរី។ ដ្បិតចំនួនភ្ញៀវទេសចរទៅកម្សាន្តច្រើន ក៏ប៉ុន្តែបញ្ហាសំរាមនៅតែជាបញ្ហាប្រឈម។ លោក ង៉ែត ពិទូ អះអាងថា ខាងមន្ទីរបានដាក់ធុងសំរាមជាច្រើននៅតាមទីតាំងនីមួយៗ ប៉ុន្តែភ្ញៀវទេសចរមួយចំនួនធំ នៅតែទុកដាក់សំរាមមិនបានត្រឹមត្រូវ។ ប្រធានមន្ទីរទេសចរណ៍ខេត្តរតនគិរី ក៏បានអំពាវនាវដល់ភ្ញៀវទេសចរដែលទៅកម្សាន្តនៅរមណីយដ្ឋាននានាមេត្តាទុកដាក់សំរាមឲ្យបានត្រឹមត្រូវ និងចូលរួមថែរក្សាបរិស្ថានទាំងអស់គ្នា៕
Tag:
រតនគិរី
អុំទូក
© រក្សាសិទ្ធិដោយ thmeythmey.com
