ជាតិ
បុណ្យអុំទូក
បុណ្យអុំទូកនៅភ្នំពេញ មានពលរដ្ឋចូលរួម ៤,៥លាននាក់
× ភ្នំពេញ៖ រយៈពេល៣ថ្ងៃនៃព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ឆ្នាំ២០១៨នេះ មានប្រជាពលរដ្ឋចូលរួមប្រមាណ ៤,៥លាននាក់។ នេះបើតាមគណៈកម្មាធិការជាតិរៀបចំបុណ្យជាតិ និងអន្តរជាតិ។
ប្រជាពលរដ្ឋប្រមាណ ៤,៥លាននាក់ បានចូលរួមក្នុងព្រះរាជពិធីបុណ្យអុំទូក នៅរាជធានីភ្នំពេញ ខណៈប្រជាពលរដ្ឋមួយចំនួន ទៅកម្សាន្តនៅតាមរមណីយដ្ឋាននានាកក្នុងប្រទេសកម្ពុជា។ ព្រះរាជពិធីបុណ្យអុំទូកឆ្នាំ២០១៨នេះ មិនមានព្រឹត្តិការណ៍ណាមួយកើតឡើងជះឥទ្ធិពលអវិជ្ជមានដល់ស្ថានភាពសន្តិសុខឡើយ។
បើតាមគណៈកម្មាធិការជាតិរៀបចំបុណ្យជាតិ និងអន្តរជាតិ រយៈពេល៣ថ្ងៃនេះ សមត្ថកិច្ចបានឃាត់ខ្លួន និងអប់រំដល់ពលរដ្ឋចំនួន ៣៣នាក់ ដែលបានពាក់អាវមានអក្សរ POLICE និង ARMY។ បន្ថែមលើនេះ សមត្ថកិច្ចបានឃាត់ខ្លួនមនុស្ស៣នាក់ ដែលប្រព្រឹត្តបទល្មើសផ្សេងៗ។
ក្នុងពិធីបុណ្យអុំទូករយៈពេលបីថ្ងៃនេះ សមត្ថកិច្ច និងក្រុមប្រតិបត្តិការ បានជួយសង្គ្រោះពិនិត្យ និងព្យាបាលជំងឺ ២៥,២៩៧នាក់ និងបញ្ជូនទៅមន្ទីរពេទ្យចំនួន ៤៩នាក់។ ជាមួយគ្នានេះ បានជួយអន្តរាគមន៍ សង្គ្រោះទូកលិចចំនួន ១១គ្រឿង និងសង្គ្រោះបានកីឡាករបានចំនួន ១១៥នាក់ ដោយសុវត្ថិភាព។ ដោយឡែក ករណីវង្វេងក្រុមគ្រួសារមានចំនួន ១៨១លើក។
គណៈកម្មាធិការជាតិរៀបចំបុណ្យជាតិ និងអន្តរជាតិ អះអាងថា ពិធីបុណ្យអុំទូករយៈពេលបីថ្ងៃនេះ មានលក្ខណៈល្អប្រសើរ ដោយមានប្រជាពលរដ្ឋចូលរួមច្រើនកុះករ។ នេះបើតាមគណៈកម្មាធិការជាតិរៀបចំបុណ្យជាតិ និងអន្តរជាតិដដែល៕
© រក្សាសិទ្ធិដោយ thmeythmey.com