ជាតិ
លោក ប្រាក់ សុខុន នឹងទៅវៀតណាម២ថ្ងៃ ដើម្បីរកមធ្យោបាយលើកកម្ពស់កិច្ចសហប្រតិបត្តិការទ្វេភាគី
× ភ្នំពេញ៖ លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា នឹងធ្វើទស្សនកិច្ចផ្លូវការរយៈពេល២ថ្ងៃ នៅប្រទេសវៀតណាម គឺនៅថ្ងៃទី ២៦ និងថ្ងៃទី២៧ ខែវិច្ឆិកា ដើម្បីប្រជុំពិភាក្សា រកមធ្យោបាយលើកកម្ពស់កិច្ចសហប្រតិបត្តិការទ្វេភាគីលើបញ្ហាផ្សេងៗ ដែលមានប្រយោជន៍ដល់ប្រទេសទាំងពីរ។ សេចក្តីប្រកាសព័ត៌មានរបស់ក្រសួងការបរទេសកម្ពុជាបញ្ជាក់ដូច្នេះ ជាមួយនឹងការជឿថាដំណើរទស្សនកិច្ចលើកនេះ នឹងជំរុញបន្ថែមទៀត ទំនាក់ទំនងមិត្តភាពជាប្រពៃណី និងពង្រឹងស្មារតីសាមគ្គីភាព និងភាពជាអ្នកជិតខាងល្អរវាងកម្ពុជា និងវៀតណាម។
លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នឹងទៅបំពេញទស្សនកិច្ចផ្លូវការ រយៈពេល២ថ្ងៃ នៅប្រទេសវៀតណាម គឺនៅថ្ងៃទី ២៦ និងថ្ងៃទី២៧ ខែវិច្ឆិកានេះ។ នេះបើតាម សេចក្ដីប្រកាសព័ត៌មានរបស់ក្រសួងការបរទេសចេញផ្សាយនៅថ្ងៃទី២៤ វិច្ឆិកា។
តាមប្រកាសព័ត៌មានដដែល ទស្សនកិច្ចផ្លូវការនេះរបស់លោក ប្រាក់ សុខុននៅពេលនេះ គឺដើម្បីជួបប្រជុំ ទ្វេភាគី ជាមួយ លោក ផាម ប៊ិញមិញ ឧបនាយករដ្ឋមន្ត្រី រដ្ឋមន្ត្រីក្រសួងការបរទេសវៀតណាម ពិភាក្សាពីមធ្យោបាយ លើកកម្ពស់កិច្ចសហប្រតិបត្តិការទ្វេភាគីលើបញ្ហាផ្សេងៗ ដែលមានផលប្រយោជន៍ដល់ប្រទេសទាំងពីរ។
ក្នុងអំឡុងទស្សនកិច្ចនេះ លោក ប្រាក់ សុខុន ក៏នឹងជួបសម្ដែងការគួរសម ជាមួយ លោក ង្វៀន សួនហ្វ៊ុក នាយករដ្ឋមន្ត្រីវៀតណាមដែរ។ នេះបើតាមប្រកាសព័ត៌មានរបស់ក្រសួងការបរទេសកម្ពុជា ដែលបន្តបញ្ជាក់ថា ដំណើរទស្សនកិច្ចផ្លូវការនេះ នឹងជំរុញបន្ថែមទៀតទំនាក់ទំនងមិត្តភាពជាប្រពៃណី និងពង្រឹងស្មារតីសាមគ្គីភាព និងភាពជាអ្នកជិតខាងល្អរវាងកម្ពុជា និងវៀតណាម៕
Tag:
ប្រាក់ សុខុន
ទស្សនកិច្ច
វៀតណាម
© រក្សាសិទ្ធិដោយ thmeythmey.com