ប្រជាជនតៃវ៉ាន់បានបោះឆ្នោតប្រឆាំងនឹងការធ្វើប្រជាមតិប្តូរឈ្មោះ «តៃវ៉ាន់» ជំនួសឲ្យ «ឆាយនីសតៃប៉ិ» ដើម្បីប្រើក្នុងការប្រកួតព្រឹត្តិការណ៍អូឡាំពិករដូវក្ដៅឆ្នាំ២០២០ នៅតូក្យូ និងព្រឹត្តិការណ៍កីឡាផ្សេងៗទៀត។ ពលរដ្ឋតៃវ៉ាន់ភាគច្រើនយល់ថា ដំណើរការប្តូរឈ្មោះនេះមានផលវិបាកច្រើនក្នុងការឲ្យអន្តរជាតិទទួលស្គាល់។
ការបោះឆ្នោតធ្វើប្រជាមតិបានចេញជាលទ្ធផលគាំទ្រឲ្យប្រើឈ្មោះឆាយនីសតៃប៉ិដដែលក្នុងចំនួន ៥៥ភាគរយ ទល់នឹង ៤៥ ភាគរយដែលចង់ឲ្យមានការផ្លាស់ប្តូរទៅជា ឈ្មោះតៃវ៉ាន់ក្នុងវិស័យកីឡាលំដាប់អន្តរជាតិ ដោយមានសន្លឹកឆ្នោតបោះសរុបប្រមាណ ១០,៥១ លានសន្លឹក គិតត្រឹមម៉ោង ២:២០ នាទីអាធ្រាត្រ ថ្ងៃទី២៥ ខែវិច្ឆិកា ឆ្នាំ២០១៨។
ការស្នើបង្កើតឲ្យមានប្រជាមតិនេះឡើង បន្ទាប់ពីម្ចាស់ជើងឯកីឡាអូឡាំពិកឆ្នាំ១៩៦៨ របស់តៃវ៉ាន់គឺកីឡាការិនី Chi Cheng ដែលបច្ចុប្បន្នមានវ័យ៧៥ឆ្នាំ រួមទាំងអ្នកកីឡាចាស់ៗដែលល្បីឈ្មោះ បានបង្កើតចលនាតាមដងផ្លូវនៅទីក្រុងតូក្យូ ប្រទេសជប៉ុនកាលពី២ឆ្នាំមុនដើម្បីប្រមូលស្នាមមេដាយពីប្រជាជនដែលយល់ព្រមថាតៃវ៉ាន់ គួរអនុញ្ញាតឲ្យប្រើក្នុងការប្រកួតកីឡាអូឡាំពិកនៅតូក្យូក្រោមឈ្មោះ «តៃវ៉ាន់» ជំនួសឲ្យ«ឆាយនីសតៃប៉ិ»វិញ។
ប៉ុន្តែយ៉ាងណាក៏ដោយគំនិតនៃការចង់ផ្លាស់ប្តូរខាងលើមិនបានទទួលជោគជ័យឡើយ ដ្បិតអ្នកដែលបោះឆ្នោតប្រឆាំងនឹងវិធានការនេះប្រហែលជាមានអារម្មណ៍ ថាដំណើរការដាក់ពាក្យសុំដើម្បីកែឈ្មោះនេះមានផលវិបាកនិងភាពអវិជ្ជមានច្រើនក្នុងការឲ្យអន្តរជាតិទទួលស្គាល់។
មួយវិញទៀតនៅមុនការធ្វើប្រជាមតិនេះ គណៈកម្មាធិការអូឡាំពិកអន្តរជាតិ (IOC) បានផ្ញើសារព្រមានតៃវ៉ាន់ថា កោះនេះអាចនឹងបាត់បង់សិទ្ធិក្នុងការប្រកួតប្រជែង ប្រសិនប្ដូរឈ្មោះនៅពេលចូលរួមព្រឹត្តិការណ៍កីឡាអូឡាំពិកឆ្នាំ២០២០ នៅតូក្យូនោះ។ IOC ថែមទាំងព្រមានទៀតថា គណៈកម្មាធិការអូឡាំពិកឆាយនីសតៃប៉ិ (CTOC) និងរដ្ឋាភិបាលតៃវ៉ាន់ពីផលវិបាកដែលអាចកើតឡើង បើ IOC យល់ថា ការផ្លាស់ប្ដូឈ្មោះនេះ ជារឿងនយោបាយ។
IOC បានបញ្ជាក់យ៉ាងច្បាស់ថាឈ្មោះ «ឆាយនីសតៃប៉ិ» មិនអាចផ្លាស់ប្តូរបានទេ ដោយសារតែវា ត្រូវបានកំណត់រួចហើយនៅក្នុងកិច្ចព្រមព្រៀង Lausanne រវាង IOC និង CTOC នៅឆ្នាំ ១៩៨១។
IOC ព្រមានដាក់សម្ពាធយ៉ាងធ្ងន់ធ្ងរលើ CTOC ដែលរំលោភលើកិច្ចព្រមព្រៀង Lausanne ឬដើម្បីប្រឆាំងនឹងការសម្រេចចិត្តរបស់ក្រុមប្រឹក្សាប្រតិបត្តិរបស់ IOC ដែលត្រូវបានមើលឃើញថាជា «ការជ្រៀតជ្រែកពីខាងក្រៅ» ដែលខុសពីលក្ខខណ្ឌនៃធម្មនុញ្ញកីឡាអូឡាំពិក។ នេះបើតាមលិខិតដែល IOC ផ្ញើទៅកាន់ CTOC កាលពីសប្តាហ៍មុន។
សូមបញ្ជាក់ថា ឈ្មោះឆៃនីសតៃវ៉ាន់ ត្រូវបានប្រើសម្គាល់តៃវ៉ាន់ក្រោយកិច្ចព្រមព្រៀង Lausanne ប្រទេសស្វ៊ីសក្នុងឆ្នាំ១៩៨១ ។ នេះក៏ព្រោះតែចិនដីគោក ចាត់ទុកតៃវ៉ាន់ជាដែនដីរបស់ខ្លួនដដែល បន្ទាប់ពីក្លាយជាតំណាងស្របច្បាប់របស់ចិនក្នុងឆ្នាំ១៩៧១ ។ ចាប់ពីពេលនោះ ក្រុងប៉េកាំងបានជំទាស់ការប្រើប្រាស់ឈ្មោះផ្លូវការរបស់តៃវ៉ាន់ជា «សាធារណរដ្ឋចិន» រហូតទទួលជោគជ័យក្នុងការកែប្រែទៅជា «ឆៃនីសតៃប៉ិ» ដោយគណៈកម្មាធិការអូឡាំពិកអន្តរជាតិតែម្ដងទៅ៕