មេដឹកនាំអឺរ៉ុប នៅថ្ងៃទី២៥ ខែវិច្ឆិកា បានយល់ព្រមលើសំណើរកិច្ចព្រមព្រៀងចាកចេញរបស់ចក្រភពអង់គ្លេសហើយ។ កិច្ចព្រមព្រៀងនេះកំណត់ពីលក្ខខណ្ឌនានាសម្រាប់ការដកខ្លួនពីសហភាពអឺរ៉ុបរបស់អង់គ្លេស ដែលគ្រោងធ្វើនៅថ្ងៃទី២៩ ខែមីនា ឆ្នាំ២០១៩ ។ អឺរ៉ុបចាត់ទុកការចាកចេញនេះ ជារឿងគួរឲ្យសោកស្ដាយបន្ទាប់ពីការរួមរស់ជាមួយគ្នា៤៦ឆ្នាំ។ យ៉ាងណាមិញ កិច្ចព្រមព្រៀងនេះត្រូវឆ្លងកាត់ការបោះឆ្នោតក្នុងសភាអង់គ្លេសសិនទើបអាចចូលជាធរមានបាន ប៉ុន្តែសមាជិកសភាជាច្រើនមិនពេញចិត្តឡើយ ដ្បិតថាអង់គ្លេសមិនអាចលែងលះដាច់ស្រេចជាមួយអឺរ៉ុបឡើយក្រោមកិច្ចព្រមព្រៀងនេះ។
ក្រោយការចរចាគ្នាអស់ ២០ខែ មេដឹកនាំរដ្ឋសមាជិកសហភាពអឺរ៉ុបទាំង២៧ប្រទេស បានឯកភាពលើកិច្ចព្រមព្រៀងលែងលះជាមួយចក្រភពអង់គ្លេស និងកំណត់ទំនាក់ទំនងនៅពេលអនាគតហើយ។ មេដឹកនាំអឺរ៉ុបចាត់ទុកកិច្ចព្រមព្រៀងដែលជា កិច្ចព្រមព្រៀងល្អបំផុតតែមួយគត់។ ប៉ុន្តែនៅក្រុងឡុងដ៏វិញ សំឡេងប្រឆាំងនឹងកិច្ចព្រមព្រៀងនេះបានកើនឡើងខ្លាំង មិនថាអ្នកនយោបាយបក្សកាន់អំណាច ឬបក្សប្រឆាំងឡើយ គឺមិនសូវពេញចិត្តកិច្ចព្រមព្រៀងដែលនាំឲ្យអង់គ្លេសបន្តមានទំនាក់ទំនងមិនដាច់ស្រលះជាមួយអឺរ៉ុប។
ខឹ្លមសារសំខាន់ៗដែលបានព្រមព្រៀង
សហភាពអឺរ៉ុបបានសម្រេចជាឯកច្ឆន្ទលើកិច្ចព្រមព្រៀងលែងលះជាមួយអង់គ្លេសក្នុងកិច្ចប្រជុំខ្លីមួយនៅទីក្រុងព្រុចសែល។ មេដឹកនាំអឺរ៉ុបមួយចំនួនប្រទេសបានថ្លែងក្នុងកិច្ចប្រជុំនេះ ហើយភាគច្រើនបង្ហាញពីការសោកស្ដាយ និងបំណងរក្សាទំនាក់ទំនងជិតស្និទ្ធជាមួយអង់គ្លេសក្រោយការលែងលះគ្នានេះ។ ករណី «ប្រសិនបើ» មិនត្រូវបានគេឮឡើយក្នុងជំនួបមេដឹកនាំអឺរ៉ុបទាំង២៧ លើកនេះ។
ក្នុងសន្និសីទសារព័ត៌មានក្រោយជំនួបជាមួយមេដឹកនាំអឺរ៉ុប នាយករដ្ឋមន្ត្រីអង់គ្លេស ថេរ៉េសា ម៉េយ៍ ដែលប្រឹងជម្នះការលំបាកទាំងឡាយដើម្បីសម្រេចឲ្យបានកិច្ចព្រមព្រៀងនេះ និយាយថា កិច្ចព្រមព្រៀងដែលអឺរ៉ុបទើបយល់ព្រមនេះ ជាកិច្ចព្រមព្រៀងល្អមួយដែលនាំអនាគតភ្លឺស្វាងឲ្យអង់គ្លេស។ គ្មានទៀតឡើយសេរីភាពដើរហើររវាងអង់គ្លេស និងអឺរ៉ុប។ ក្រោយលែងលះ អង់គ្លេសនឹងអនុវត្តច្បាប់ក្នុងស្រុករបស់ខ្លួនឡើងវិញដែរ។
កិច្ចព្រមព្រៀងនេះ ក៏ក្ដោបលើវិស័យផ្សេងទៀតដែលអង់គ្លេសមានសិទ្ធិគ្រប់គ្រងឡើងវិញដូចជាបញ្ហាហិរញ្ញវត្ថុ សិទ្ធិរបស់ប្រជាជនអង់គ្លេសនៅអឺរ៉ុប និងប្រជាជនអឺរ៉ុបរស់នៅអង់គ្លេស ការយល់ព្រមលើការបើកចំហព្រំដែនអង់គ្លេស និងអៀរឡង់ ក៏ដូចជាការកំណត់ពេល២១ខែសម្រាប់រយៈពេលអន្តរកាលក្រោយអង់គ្លេសដកខ្លួន។ លើសពីនោះ កិច្ចព្រមព្រៀងនេះក៏បន្តឲ្យដែនកោះ Gibraltar ស្ថិតក្នុងចក្រភពអង់គ្លេសដដែល ទោះជាអេស្ប៉ាញមិនពេញចិត្តក្ដី។
ជំហានបន្ទាប់ បាល់ដល់ជើងសភាអង់គ្លេស
ក្រោយទទួលបានការយល់ព្រមពីមេដឹកនាំអឺរ៉ុប លោកស្រី ម៉េយ៍ ត្រូវស្ពាយកិច្ចព្រមព្រៀងនេះដើម្បីបញ្ចុះបញ្ចូលសមាជិកសភាអង់គ្លេសវិញម្ដង។ នេះជាការងារលំបាកសម្រាប់នាយករដ្ឋមន្ត្រីរូបនេះ ព្រោះសមាជិកសភាគ្រប់បក្សបានប្រកាសរួចហើយថា ពួកគេប្រឆាំងកិច្ចព្រមព្រៀងនេះ។ បើតាមសារព័ត៌មាន BBC សភាអង់គ្លេសនឹងបោះឆ្នោតលើកិច្ចព្រមព្រៀងនេះនៅថ្ងៃទី១២ ខែធ្នូ ខាងមុខ ខណៈបក្សពលករ បក្សប្រជាធិបតេយ្យសេរី បក្សជាតិស្កុតឡែន បក្សសហភាពប្រជាធិបតេយ្យ និងសមាជិកខ្លះនៃបក្សអភិរក្សរបស់លោកស្រី ម៉េយ៍ នឹងបោះឆ្នោតប្រឆាំង។
យ៉ាងណាមិញ បើតាមការស្រង់សុន្ទរកថារបស់លោកស្រី ម៉េយ៍ ដែលត្រូវថ្លែងក្នុងសភានៅថ្ងៃទី២៦ ខែវិច្ឆិកា (ម៉ោងក្រុងឡុងដ៏) លោកស្រីនឹងប្រាប់ឲ្យសមាជិកសភាគាំទ្រកិច្ចព្រមព្រៀងនេះ ធ្វើតាមលទ្ធផលប្រជាមតិឆ្នាំ២០១៦ និងបន្តទៅមុខដើម្បីអនាគតល្អប្រសើររបស់អង់គ្លេស។ នាយករដ្ឋមន្ត្រីក៏ព្រមានទុកដែរថា បើសភាជំទាស់កិច្ចព្រមព្រៀងនេះ ស្ថានភាពមិនច្បាស់លាស់នឹងកើតឡើង ហើយគ្រោះថ្នាក់នឹងកើតតាមនឹងដែរ។
ក្នុងករណីកិច្ចព្រមព្រៀងឆ្លងមិនផុតសភាអង់គ្លេស សេណារីយោខ្លះអាចកើតមានដូចជាការវិលត្រឡប់ទៅរកការចរចាម្ដងទៀតដើម្បីបង្កើតកិច្ចព្រមព្រៀងថ្មីផ្សេង។ ប៉ុន្តែអឺរ៉ុបបាននិយាយមុនហើយថា ខ្លួនមិនចូលតុចរចាម្ដងទៀតឡើយ។ កាន់តែធ្ងន់ធ្ងរ លោកស្រី ម៉េយ៍ អាចអស់តំណែងនាយករដ្ឋមន្ត្រី ហើយការបោះឆ្នោតមួយអាចកើតឡើងនៅអង់គ្លេស រួចទុកឲ្យរដ្ឋាភិបាលថ្មីជាចាត់ចែងកិច្ចការលែងលះបន្តទៀត។ ចំណុចបន្ទាប់ គេអាចនឹងឃើញប្រជាមតិលើកទីពីរដើម្បីស្តាប់យោបល់ប្រជាជនអង់គ្លេសជាថ្មីជុំវិញជោគវាសនារបស់អង់គ្លេស។ សេណារីយោចុងក្រោយនោះគឺ អង់គ្លេសអាចដើរចេញពីអឺរ៉ុបដោយគ្មានកិច្ចព្រមព្រៀងណាមួយសោះក៏ថាបាន។ វាជាចំណុចចម្រូងចម្រាសនិងស្មុគស្មាញបំផុតដែរ៕